पुराना काण्ड नसेलाउँदै सुन तस्करीमा जोडिएका महरा

A+ A A-

माओवादीले सशस्त्र विद्रोह सुरु गर्नुअघि २०४८ सालकै आमनिर्वाचनमा रोल्पाबाट निर्वाचित नेता हुन्, कृष्णबहादुर महरा । शिक्षण पृष्ठभूमिका उनी माथिल्लो तहमा पुगेका माओवादी नेताहरू अहिले पनि गुरु मान्छन्, ‘महरा सर’ भन्छन् । माओवादी ‘जनयुद्ध’भर एउटा इमानदार नेताको परिचय बनाएका महरा शान्ति प्रक्रियामा आएपछि भने एकपछिअर्को प्रकरणमा मुछिए ।

२०६७ सालमा अध्यक्ष पुष्पकमल दाहाल प्रचण्डलाई प्रधानमन्त्री बनाउन सांसद खरिद गर्न भन्दै चिनियाँ व्यापारीसँग ५० करोड मागेको अडियो सार्वजनिक भएपछि उनी विवादमा आए । त्यसको एक दशकपछि २०७६ मा यौनहिंसाको आरोपमा उनले सभामुख पद गुमाउनुपर्‍यो । अहिले आफ्नै अध्यक्ष प्रचण्ड प्रधानमन्त्री रहेका बेला सुन तस्करीको आरोपमा पक्राउ परेका छन् ।

पूर्वसभामुख एवं माओवादी केन्द्रका उपाध्यक्ष महरा सुन तस्करीमा संलग्न रहेको आरोपमा ५ चैतमा रूपन्देहीबाट पक्राउ परेका हुन् । सुनको अवैध पैठारी (तस्करी) नियन्त्रणसम्बन्धी जाँचबुझ आयोगले गृहमन्त्री रवि लामिछानेलाई प्रतिवेदन बुझाएको थियो । त्यसपश्चात् मन्त्रिपरिषद्को बैठकले आयोगको प्रतिवेदन कार्यान्वयन गर्ने निर्णय गरेको थियो ।

आयोगले ९ चिनियाँ नागरिक, पूर्वसभामुख महरासहित १२ जनालाई कारबाहीको सिफारिस गरेको थियो ।

२०७९ साल पुसमा विद्युतीय चुरोट (भेप) मा लुकाएर ल्याइएको ९ किलो सुन तस्करीमा संलग्न चिनियाँ नागरिकसँग पूर्वसभामुख तथा माओवादी केन्द्रका उपाध्यक्ष महरा र उनका छोरा राहुल महराको नाम जोडिएको थियो । उक्त प्रकरणमा उनका छोरा राहुल महरा १३ भदौमा नै पक्राउ परेर जेल परेका छन् ।

महरामाथि सुन तस्करलाई सहयोग गरेको अर्थात् मतियारको आरोपमा प्रहरीले पक्राउ गरेको थियो । प्रहरीले महरा संगठित रूपमा सुन तस्करी कसुर गर्न चिनियाँ मूलका दावाजिन वाङसमेतलाई सहयोग गरी संगठित अपराध निवारण ऐन, २०७० को दफा ३ र दफा ४ बमोजिम मतियारको कसुरदारको रूपमा भूमिका निर्वाह गरेको आधार प्रस्तुत गरेको थियो ।

तर, विभिन्न रोग लागेको र आफू अस्वस्थ रहेको बताएका महराको स्वास्थ्य उपचारको व्यवस्था गर्न पनि अदालतले निर्देशन दिएको थियो । अदालतको निर्देशनपछि महरालाई थापाथलीस्थित नर्भिक अस्पतालमा भर्ना गरिएको थियो । उनकाे स्वास्थ्य स्थिति नाजुक भन्दै सीआईबीले बयान लिएर छाडेको छ । सुन तस्करीमा उनको संलग्नताबारे भने अनुसन्धान भइरहेको प्रहरीले जनाएको छ ।

के हो वर्षव्यक्ति र समाचार निर्माता ?

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ ।

गत वर्ष गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट १५ चैतदेखि १० दिनको समय राखेर विभिन्न विधामा भर्चुअल्ली मत हाल्न पाउने गरी फारम राखिएको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई, वर्षसिनेमा 'जारी' र वर्षनाटक 'दमिनी भीर' घोषणा गरिसकिएको छ । वर्षव्यक्ति २०८० आज (शुक्रबार) घोषणा गरिँदैछ । वर्षव्यक्तिको सूचीमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ ।

वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । शिलापत्र वर्षव्यक्ति, समाचार निर्माता र अन्य विधाको मनोनयन, छनौट र नतिजाको विस्तृत विवरण केही दिनमा सार्वजनिक गरिने छ ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: शुक्रबार, चैत ३०, २०८० १४:२०