चलाखीपूर्वक धरानमा सम्भावित दंगा रोकेकी सीडीओ हुमकला पाण्डे

A+ A A-

गएको साउनको अन्तिम हप्ता सामाजिक सञ्जालमा गोरु काटेर भोज गरेको भिडियो भाइरल भयो । गोरु काटेको अभियोगमा प्रहरीले पक्राउ गरेका विन्द्राकुमार राई र राजन परियार थुनामुक्त भएपछि गोरु काटेर भोज लगाइएको थियो । त्यही भिडियो सामाजिक सञ्जालमा भाइरल भयो ।

गोरु काटेर खाएको भिडियो साेसल मिडियामा पोस्ट भएपछि ठूलै विवाद सिर्जना गर्‍यो । हिन्दु पक्षधर सङ्घसंस्थाहरू विरोधमा उत्रिए । धरानभित्र अघोषित रूपमा चल्ने गरेको गोरुवधलाई सामाजिक सञ्जालले व्यापक सतहमा ल्याइदियो त्यतिबेला । हिन्दुवादी सङ्गठनहरूले गोरु काटेको विषयमा कडा विरोध गरेपछि विभिन्न आदिवासी जनजाति घटकहरूका काउन्टर विज्ञप्ति पनि लगालग निस्किए त्यतिबेला । स्थिति थप विवादित बन्दै गयो ।

हिन्दु धर्मका 'गुरु'हरूले भदौ ९ गते शान्तिपूर्ण र्‍याली गर्ने भन्दै धरानमा भेला हुन आह्वान गरेपछि प्रतिवाद गर्ने चेतावनीसमेत दिए । नाममा सद्भाव र्‍याली भने पनि दुवै पक्ष मुठभेड हुने 'दुर्भाव' स्थितिको पूर्वाभाष भने सामाजिक सञ्जालमा देखिन्थ्यो । यस क्रममा सुरक्षा निकायको चासो ह्वात्त बढेको थियो, धरानमा । सुरक्षा कायम गर्ने मुख्य जिम्मा थियो जिल्ला प्रशासन कार्यालय सुनसरीको । प्रशासनको नेतृत्वमा थिइन् सीडीओ हुमकला पाण्डे ।

धार्मिक विषयमा गम्भीर मतभेद चलिरहँदा धरानलाई डेंगीले थलाएको थियो । करिब १५ हजार जनालाई डेंगीको सङ्क्रमणले छोएको प्रतिवेदनसमेत सार्वजनिक भएको थियो । धर्मको विषयमा द्वन्द्व बढ्ने देखेपछि सीडीओको रूपमा रहेकी हुमकला पाण्डेले कोभिड मारामारीको बेला संघीय सरकारले प्रयोग गरेको कानुन धरानमा प्रयोग गरिन् । डेंगी नियन्त्रण गर्ने भन्दै सीडीओ पाण्डेले 'संक्रामक रोग ऐन २०२०' को आवरणमा सम्भावित धार्मिक द्वन्द्वको सङ्क्रमण रोक्न निषेधाज्ञा लगाइन् उतिबेला ।

'डेंगी' महामारी फैलिएका कारणले शुक्रबार राति १२ बजेदेखि शनिबार राति १२ बजेसम्मका लागि धरानमा कुनै पनि सामाजिक, धार्मिक, राजनीतिक सभा, र्‍याली, प्रदर्शनलगायतका कार्य निषेध गरिएको छ,' जिल्ला प्रशासन कार्यालयको लेटरप्याडमा पाण्डेको हस्ताक्षरमा आदेश निस्कियो । डेंगीको आडमा जारी निषेधाज्ञाले धरानमा सम्भावित ठूलो धार्मिक द्वन्द्व टरेको थियो, उतिबेला ।

सुरक्षा निकायले ठूलो क्षति हुनबाट जोगिएको रिपोर्टिङ माथिल्लो तहमा गरेका थिए । निषेधाज्ञाको पक्ष र विपक्षमा सामाजिक सञ्जालमा वाद/प्रतिवाद पनि उस्तै थियो त्यतिबेला । सद्भाव र्‍यालीको आह्वान गरेका हिन्दु धर्मका गुरुहरूले भने सनातनीहरूको कार्यक्रम रोक्न सीडीओ नियोजित भएर लागेको आरोप पनि लगाए । विवादमा तान्न पनि खोजियो पाण्डेलाई त्यतिबेला । जुन किसिमले र्‍याली निकाल्न खोजिएको थियो, त्यो र्‍यालीलाई प्रतिवाद गर्ने समूह पनि उत्तिकै तयारी अवस्थामा थियो । तर, प्रशासनले निकालेको त्यो निषेधाज्ञाले एउटा ठूलो संकट भने टार्‍यो ।

प्रकाशित मिति: शुक्रबार, चैत ३०, २०८० १०:४०