मुख्यमन्त्री बन्न विद्रोह, गठबन्धन तोडिनुका कारक

A+ A A-

पछिल्लो एक वर्ष कोशी प्रदेशले देशका मुख्य सञ्चारमाध्यमहरूको ध्यान खिच्यो । केन्द्रको राजनीतिक समीकरणमा आएको परिवर्तन र जटिल संसदीय गणितका कारण कोशी चर्चामै रह्यो । कोशीसँगै चर्चामा रहेका पात्र हुन कोशीका मुख्यमन्त्री, केदार कार्की ।

गएको असोज २७ गते पार्टी निर्णयभन्दा बाहिर गएर कांग्रेसका ८ सहित एमालेका ३९ सांसदको समर्थनमा कार्की मुख्यमन्त्री बनेका थिए । त्यतिबेला कांग्रेस माओवादीसँगको गठबन्धनमा थियो । गठबन्धनले त्यतिबेला माओवादीका इन्द्र आङ्बोलाई कोशीको मुख्यमन्त्रीको रूपमा अघि बढाएको थियो ।

तर, संविधानको धारा १६८ को उपधारा ५ अनुसारको सरकार गठन आह्वान हुँदा सांसदहरूले स्वतन्त्र निर्णय गर्न पाउने सर्वोच्च अदालतको व्याख्या भएकाले कांग्रेसका ८ सांसदहरू कार्कीको पक्षमा विद्रोह गरेर उत्रिएका थिए । त्यो विद्रोहलाई विपक्षी एमालेका ३९ सांसदले समर्थन गरे । र, कार्की ९३ सदस्यीय कोशी प्रदेशसभाको ४७ सांसदहरूको समर्थनमा 'ठ्याक्कै' बहुमतका साथ मुख्यमन्त्रीमा नियुक्त भए ।

कार्कीको सञ्चारमाध्यमहरूमा चर्चा मुख्यमन्त्री नियुक्ति लिँदा बखत मात्र होइन, त्यसपछि पनि जारी नै रह्यो । मुख्यमन्त्रीमा नियुक्त भएपछि कार्कीलाई कांग्रेसले पुनः स्वीकार गर्‍यो त्यतिबेला । कांग्रेसले मात्र होइन, मुखैमा मुख्यमन्त्री पद आएर गुमाएको माओवादी केन्द्रले समेत कार्कीलाई 'आफूहरूकै' गठबन्धनको मुख्यमन्त्रीसमेत रहेको स्वीकार्‍यो । जुन परिणाम कार्कीले प्रदेशसभामा विश्वासको मत लिँदा देखियो । ९३ सदस्यीय प्रदेशसभामा कार्कीले ८६ सांसदको विश्वासको मत पाएका थिए ।

सदनको औधी विश्वास पाएका कार्कीको शक्तिमा गिरावट भने एमालेले सरकार छाडेपछि सुरु भयो । एमालेको 'बुई' चढेर मुख्यमन्त्री बनेका कार्की गठबन्धनमै फर्किएपछि एमालेले सरकार छोड्यो । त्यसपछि कार्कीले आफूलाई समर्थन दिइरहेको पार्टी एमालेले कडा प्रतिपक्षीको रूपमा सामना गर्नुपर्‍यो ।

काठमाडौंमा प्रधानमन्त्री प्रचण्डले सत्ताको पार्टनर कांग्रेसलाई छोडेर एमाले रोजेपछि पुनः विराटनगरका कार्की चर्चामा छन् । चर्चाका कारण पनि सत्तासँगै जोडिन्छ । कार्कीलाई मुख्यमन्त्री बनाएको एमालेका सांसदले केही दिनअघि मात्र सरकारलाई दिएको समर्थन फिर्ता लिएका छन् । तर, कार्की भने एमालेका सांसदहरूले आफूलाई दिएको समर्थन फिर्ता गर्न नमिल्ने बताउँदै आएका छन् । सञ्चारमाध्यमहरूले 'विश्वासको मत कहिले लिनुहुन्छ ?' भन्दा कार्कीले 'अहिले' भन्ने गरेको जस्ता प्रश्न सोध्नुभन्दा अगाडि संविधान पढेर मात्र आउनू ।

प्रकाशित मिति: शुक्रबार, चैत ३०, २०८० १०:४६