समाज भड्काउने तत्त्वसँग सतर्क गराउने नाटक 'शत्रु'

A+ A A-

कलालय इटहरीले विश्वेश्वरप्रसाद कोइरालाद्वारा लिखित कथालाई नाट्य रूपान्तरण गरेर प्रस्तुत गरेको नाटक 'शत्रु' शिलापत्रको अनलाइन सर्वेक्षणमा साल २०८० को उत्कृष्ट नाटकभित्र परेको छ । विधाविज्ञको रायमा मनोनयन गरिएका १० नाटकको सूचीबाट पाठकको मतका आधारमा एक वर्ष नाटक र ४ उत्कृष्ट नाटक चयन गरिएको हो ।

काठमाडौ‍ंबाहिर रहेर नाट्य विधामा सक्रिय कलालयले इटहरी र भारतको पश्चिम बङ्गालमा प्रस्तुत गरेको 'शत्रु' वर्ष नाटकअन्तर्गत उत्कृष्ट ५ मा पर्न सफल भएको हो । नाटकमा मानिसभित्रको सकारात्मक र नकारात्मक ऊर्जा मनोविज्ञान प्रस्तुत गर्न खोजिएको छ । समाजमा सकारात्मक सन्देश दिनेभन्दा पनि बिगार्ने तत्त्व बढेको इंगित गर्दै नकारात्मक पक्ष चिर्नुपर्नेमा नाटकले जोड दिएको छ ।

पहिलोपटक ‘दोस्रो अन्तरदेशीय साझा रङ्गमञ्च २०८०’का अवसरमा २१ कात्तिकमा 'शत्रु' प्रदर्शन गरिएको थियो । इटहरी र आसपासका दर्शकहरूको माग भएपछि कलालयले गत पुस २ देखि ६ सम्म नाटक प्रदर्शन गरेको थियो । इटहरीमा दुईपटक प्रस्तुत नाटक 'शत्रु' भारतीय रङ्गमञ्चमा समेत प्रदर्शित भयो । गएको पुस ११ देखि १५ सम्म भारतको पश्चिम बङ्गालमा आयोजित नाट्य उत्सवमा शत्रुको ‘शो’ भएको थियो ।

नाट्यकर्मी प्रज्वल पराजुलीको निर्देशनमा तयार भएको नाटकमा कलालयका आफ्नै कलाकर्मीहरू थिए । कलालय इटहरीका अध्यक्ष रहेका सोनु जयन्तीका अनुसार कलालयबाटै प्रशिक्षितहरूले नाटकमा अभिनय गरेका छन् ।

सामान्यतया वार्षिक आयोजना गर्ने 'स्कुल थिएटर'बाट विभिन्न समयमा निस्किएका कलाकारहरूको समूहले शत्रुको लेखन र अभिनय गरेका थिए । प्रज्वल दुलाल, विकास श्रेष्ठ, डेभिड विष्ट, करण प्याकुरेल, आशिष पुरी, सक्षम किराँती, नीतिका घिमिरे, जेम्स श्रेष्ठ, र अविन ठटालले शत्रुमा अभिनय गरेका छन् ।

०००

१५ चैतदेखि १० दिनको समय राखेर शिलापत्रले विभिन्न विधामा भर्चुअल्ली मत हाल्न पाउने गरी फारम राखेको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई र वर्षसिनेमा जारी घोषणा गरिसकिएको छ ।

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ । गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट वर्षव्यक्तिमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ । वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । वर्षव्यक्ति २०८० चैत ३० गते (शुक्रबार) घोषणा गरिने छ । यो सूची कसरी तयार गरियो भन्ने जान्न यहाँ क्लिक गर्नुहोस् ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: बिहीबार, चैत २९, २०८० ०६:००