सशस्त्र प्रहरीको स्टोरमा आगलागी घटनाको आन्तरिक छानबिन सुरु

A+ A A-

सशस्त्र प्रहरी बलको बलम्बुस्थित केन्द्रीय स्टोरमा भएको आगलागी घटनाबारे छानबिन गर्न गठित आन्तरिक समितिले काम सुरु गरेको छ । आगलागीको घटनापछि कार्यविभाग प्रमुख सशस्त्र प्रहरी अतिरिक्त महानिरीक्षक वंशीराज दाहालको अध्यक्षतामा ९ सदस्यीय छानबिन समिति गठन गरिएको थियो । सो समितिले मंगलबार घटनास्थललाई सिल गरेको छ भने सुरक्षाका लागि नयाँ टोली राखिएको छ ।

आगलागीबाट क्षति भएका सामानको विवरण संकलन गर्ने कार्यसमेत तीव्र रुपमा अघि बढाइएको सशस्त्रका सहप्रवक्ता डीएसपी शैलेन्द्र थापाले जानकारी दिए । उनका अनु्सार प्रयोगमा ल्याउन मिल्ने सामान छुट्याई सिल गरी सुरक्षित स्थानमा राखिएको छ । समितिले भण्डार महाशाखामा रहेको सम्पूर्ण सक्कल अभिलेखहरुको अध्ययन गरीप् के–कति सामान रहको र कति क्षति भएको भन्ने विवरण समेत संकलन गरिरहेको उनले जानकारी दिए ।

छानबिन समितिले भण्डार महाशाखामा कार्यरत सशस्त्र प्रहरी उपरीक्षकसहित ७ जनासँग भण्डारण गरिएको सामानको विवरण र अवस्थाबारे सोधपुछका लागि झिकाएको छ । सशस्त्र प्रहरी बल, नेपाल नम्बर ९ पशुपतिनाथ बाहिनीबाट सुरक्षा जिम्मेवारीमा रहेका र त्यस दिनको ड्युटीमा रहेका सशस्त्र प्रहरी उपरीक्षकसहित ११ जना र नेपाल एपीएफ अस्पतालको सुरक्षा टोलीबाट मेनगेटमा खटिएका २ जनालाई समेत सोधपुछका लागि मुख्यालय झिकाइएको छ ।

सो स्टोरको सुरक्षार्थ राखिएको सीसी क्यामेराको फुटेजसमेत समितिले अध्ययन गरिरहेको छ ।

सो आगलागीबाट फ्रि स्केलका सामान, विपद् उद्धारका सामान समेत जलेर नष्ट भएका छन् ।

सशस्त्र प्रहरी बलको मुख्य स्टोर हलचोकमा रहेकोमा केही वर्ष अघिदेखि शाखा स्टोरको रुपमा सो ठाउँमा जिन्सी सामान भण्डारण गरिएको थियो । केही फ्रि स्केलका सामान भण्डारण गरिएको र त्यसको पूर्ण प्रक्रिया समाप्त नभएकोले मातहत कार्यालयमा पठाउने तयारीको अवस्थामा अचानक आगलागी भएकोले कर्मचारीका लागि वितरण गर्ने सामान जलेर नष्ट भएको डीएसपी थापाले जानकारी दिए ।

प्रकाशित मिति: बुधबार, चैत २८, २०८० १८:१२