सहकारी प्रकरणले गृहमन्त्री लामिछानेबारे सत्ता गठबन्धनमा देखियाे दुई दुईधार

सहकारी प्रकरणले गृहमन्त्री लामिछानेबारे सत्ता गठबन्धनमा देखियाे दुई दुईधार

A+ A A-

उपप्रधानमन्त्री तथा गृहमन्त्री रवि लामिछानेमाथि सहकारी ठगी प्रकरणमा छानबिनकाे विषयलाई लिएर सत्ता गठबन्धमै दुई धार देखिएकाे छ । संसदमा प्रमुख प्रतिपक्षी दल कांग्रेसले संसदीय छानबिन समिति बनाउनुपर्ने मागलाई बटमलाइन बनाएका बेला सत्ता गठबन्धन एकमत नहुँदा प्रधानमन्त्री पुष्पकमल दाहाल प्रचण्ड दबाबमा परेका छन् ।

बुधबार संसदकाे बैठकमै सत्ता गठबन्धनकाे नेकपा एसले कांग्रेसले राख्दै आएकाे मागमा समर्थन मात्र जनाएन साे माग पूरा गर्नसमेत माग गरेकाे छ । प्रतिनिधिसभाकाे बैठकमा बाेल्दै नेकपा एसका उपाध्यक्ष राजेन्द्र पाण्डेले कांग्रेसकाे मागअनुसार संसदीय छानबिन समिति बनाउन सरकारले ध्यान दिनुपर्ने बताए । उनले सहकारी ठगीको विषयमा प्रमुख प्रतिपक्ष दलले लगातार संसद् अवरोध गरेकोमा विशेष ध्यान दिनसमेत सरकारलाई आग्रह गरे ।

जबकी सत्ता गठबन्धनका नेकपा एमाले र नेकपा माओवादी केन्द्र संसदीय छानबिन समिति गठनमा सकरात्मक छैनन् । एमाले अध्यक्ष केपी शर्मा ओली त लगातार लामिछानेकाे बचाउमा उत्रिदै आएका छन् ।

संसद बैठकमा बाेल्दै नेता पाण्डेले भने, ‘सहकारी ठगीको विषयमा प्रमुख प्रतिपक्षीले केही दिनदेखि संसद अवरोध गरिरहेको छ । उनीहरूको मागमा सरकारले विशेष ध्यान दिनु जरुरी छ ।’ सात दिनभित्र जनताको पक्षमा सरकारले काम नगरे संसद अवरुद्ध पार्नेसमेत उनले चेतावनी दिए ।

‘चालु आर्थिक वर्षको बजेटबाट सेना, प्रहरी, न्यायाधीश, प्रशासक सबैले सुविधा लिइरहेका छन् । तर हामीलाई अमूल्य मत दिएर पठाएका जनतालाई सेवा र सुविधा दिन सरकारले मानिरहेको छैन । सात दिनभित्र जताको पक्षमा सरकारले काम नगरे संसद्मा अवरोध गर्छौँ’, सभामुखमार्फत पाण्डेले सरकारको ध्यानाकर्षण गराए ।

उनले भने, ‘सहकारी ठगीको छानबिन र भ्रष्टाचारको छानबिन गर्ने कुरा जोडदार उठिरहेको बेला ०४७ सालदेखिकै भ्रष्टाचारको छानबिन गर्ने कुरो पनि आयो । नेकपा(एकीकृत समाजवादी) पार्टीको तर्फबाट म के भन्न चाहान्छु भने ठीक छ, ०४७ सालदेखिकै भ्रष्टाचार छानबिनको काम गरौँ । दोषीहरूलाई कारबाही गर्ने गरी छानबिन गरौँ । उम्काउने गरी होइन ।’

प्रकाशित मिति: बुधबार, चैत २८, २०८० १५:५८