बझाङका बुढाले मानेनन् प्रचण्डको निर्देशन, जनार्दनको आडमा उत्रिए चुनावी मैदानमा

बझाङका बुढाले मानेनन् प्रचण्डको निर्देशन, जनार्दनको आडमा उत्रिए चुनावी मैदानमा

A+ A A-

माओवादी केन्द्रका नेताहरूको आन्तरिक लडाइँले बझाङको उपचुनाव प्रभावित भएको छ । माओवादी कैन्द्रका अध्यक्ष तथा प्रधानमन्त्री पुष्पकमल दाहाल प्रचण्डले सोमबार नै फोन गरेर एमाले उम्मेदवारलाई सहयोग गर्न निर्देशन दिएका थिए । त्यही निर्देशनका आधारमा प्रदेश कमिटीले तयारी गरेको थियो । माओवादीका उम्मेदवार जनक बुढाले मंगलबार दिउँसो उम्मेदवारी फिर्ता लिने तयारी भइरहेको थियो ।

बुढालाई पार्टी कमिटीले निर्देशन दिएको थियो । तर, बुढासहित बझाङका माओवादी नेताहरू मात्र होइन, केन्द्रीय नेताहरूले समेत बुढालाई उम्मेदवारी फिर्ता नलिन दबाब दिएका छन् । सोही दबाबका कारण बुढा एमालेका लागि मैदान खाली गर्न तयार नभएको माओवादी नेताले बताएका छन् । माओवादी केन्द्रका अध्यक्ष प्रचण्डसँग पछिल्लो समय टक्कर लिइरहेका उपमहासचिव जनार्दन शर्माले बुढाको उम्मेदवारी रोकेको माओवादी स्रोतको दाबी छ । शर्मानिकट मानिएका बुढा सुदूरपश्चिम प्रदेश कमिटीको सचिव पनि हुन् ।

कर्णालीमा शर्मानिकट मुख्यमन्त्री राजकुमार शर्मालाई सरकारबाट हटाएर प्रचण्डले एमालेलाई सरकार बनाउन निर्देशन दिएका थिए । त्यही तोडमा रहेका शर्माले सुदूरपश्चिममा उम्मेदवारी फिर्ता गर्न नदिएको माओवादी केन्द्रका एक केन्द्रीय सदस्यको दाबी छ । हुन पनि शर्माले सुदूरपश्चिम प्रदेश कमिटीको पार्टीमा फरक मत राखिरहेका थिए । प्रचण्डको ग्रीन सिग्नलमा स्थायी कमिटी सदस्यसमेत रहेका सुदूरपश्चिमका नेता खगराज भट्टलाई बिना मगर, सरल भाटसहितको टोलीले प्रदेशसभाको संसदीय दलको नेताबाट हटाएका थिए ।

माओवादीतर्फबाट भावी मुख्यमन्त्री भनेर हेरिएका भट्टलाई अपमानजनक ढंगलाई संसदीय दलको नेताबाट हटाएपछि उपमहासचिव शर्माले आपत्ति जनाएका थिए । पार्टीको स्थायी कमिटी बैठकमा लिखित फरक मत राखेका शर्माले त्योबाहेक भट्टलाई सुदूरपश्चिम प्रदेशको इन्चार्जबाट हटाएकोमा पनि विरोध गरेका थिए ।

संसदीय दलबाट हटाई भट्टलाई अपमानित गरेर नपुगेर प्रचण्ड सुदूरपश्चिमको इन्चार्जबाट पनि बर्खास्त गरेको भन्दै पार्टीमा चर्को आवाज उठाएका थिए । अझ बुहारी बिना मगरलाई सहइन्चार्ज बनाएको विषयमा शर्मा र भट्ट दुवैको आपत्ति थियो । कतिसम्म भने केही साताअघि सुदूरपश्चिम प्रदेश कमिटीले सुदूरपश्चिमका केन्द्रीय नेताहरूसँग इन्चार्ज र सहइन्चार्जसँगको छलफलमा शर्मा समूहका नेताहरूले बहिष्कार गरेका थिए । मगरको सहइन्चार्जसिप अस्वीकार गरेर शर्मा निकट पाँच जना केन्द्रीय सदस्यले धनगढीमा भएको छलफल बहिष्कार गरेका थिए ।

इन्चार्ज गिरिराजमणि पोखरेलले पटकपटक आग्रह गर्दा पनि उनीहरूले अस्वीकार गरेका थिए । त्यसैले, कर्णाली र सुुदूरपश्चिम प्रदेशमा प्रचण्ड र शर्माको लडाइँ मैदानमै देखिने गरी हुन थालेको माओवादी नेताहरूले बताएका छन् । त्यसै कारण कर्णालीमा सरकार बन्न समस्या भइरहेको छ भने सुदूरपश्चिम प्रदेशमा प्रचण्डको निर्देशनविपरीत बुढाको उम्मेदवारी फिर्ता नभएको हो ।

शिलापत्रसँग माओवादीका एक केन्द्रीय सदस्यले प्रधामन्त्री प्रचण्डले सोमबार बझाङमा पनि एमालेले सहयोग गर्न आग्रह गरेको छ, के हुन्छ ? सकिन्छ भने सहयोग गरौँ भनेर फोन गरेको बताए । केन्द्रीय सदस्यले भने, ‘सोमबार प्रधानमन्त्रीले बझाङको उम्मेदवारी फिर्ता लिनेबारेमा चासो राख्नुभएको थियो । तर, आज प्रदेश समितिले उम्मेदवारी दर्ता गराएकाले लड्दा नै राम्रो हुने निष्कर्ष निकालेको छ । अब फिर्ता नलिने भएको हो ।’

माओवादीले आज बिहान उम्मेदवारी फिर्ता लिने नलिने विषयमा निर्णय गर्न बैठक बसेको थियो । तर, अन्तिममा उम्मेदवारी फिर्ता नलिने निर्णय गरेको हो । शिलापत्रसँगको कुराकानीमा बुढाले प्रधानमन्त्रीले के भन्नुभयो भएन थाहा भएन, तर यहाँ उम्मेदवारी फिर्ता लिने भन्ने विषयमा कुरा नभएको दाबी गरे । बुढाले भने, ‘अरु कुरा थाहा छैन । मैले उम्मेदवारी फिर्ता लिएको छैन । मेरो माओवादी केन्द्रबाट उम्मेदवारी हो । हामीले बरु अरु दललाई समर्थन गर्न आग्रह गरेका छौँ ।’