दशौँ राष्ट्रिय खेलकुदको प्रवर्द्धन गर्न वैशाखमा कर्णाली हाफ म्याराथन

A+ A A-

कर्णालीमा पहिलोपटक हुन लागेको दशौँ बृहत राष्ट्रिय खेलकुदको तयारीमा प्रदेश खेलकुद परिषद् जुटेको छ । २०८१ मंसिर पहिलो साता हुने खेल उत्सवका लागि रंगशाला निर्माण भइरहेको छ । कर्णालीको खेल इतिहासमै बहुप्रतिक्षित बृहत् खेलकुद्को प्रवर्द्धनका लागि वैशाख अन्तिम साता कर्णाली हाफ म्याराथन हुने भएको छ ।

रेस नेपालको आयोजना एवं क्रियटिभ गन्ज मिडिया एण्ड इभेन्ट म्यानेजमेन्टको व्यवस्थापनमा कर्णाली हाफ म्याराथन हुन लागेको हो । कर्णाली प्रदेशको राजधानी वीरेन्द्रनगरमा २९ वैशाख शनिबार हाफ म्याराथन गर्न लागिएको आयोजक अध्यक्ष टीएस ठकुरीले बताए । कर्णाली हाफ म्याराथनमा २१.०९७५ किमी पुरुष तथा महिला, ५ किलोमिटर स्कुल स्तरीय छात्र एवं छात्रा दौड, ५ किलोमिटर ह्वीलचेयर, ५ किलोमिटर कर्पोरेट रन र ४२१.९५ मिटर किड्स रन समावेश गरिएको छ ।

म्याराथनका क्रममा खेलकुदसँग शिक्षा, स्वास्थ्य र पर्यटनबारे विचार विमर्शसमेत समेत गरिने उल्लेख गर्दै ठकुरीले भने, ‘हामीले पश्चिम नेपालमा एक दशकदेखि नेपालगन्ज म्याराथन गर्दै आएका छौँ । कर्णाली हाफ म्याराथन मूलतः त्यही अभियानको अर्को शृंखला हो, खेल संस्कृतिको विस्तारको अभ्यास हो ।’

नेपालगन्ज म्याराथनको भगिनी दौड प्रतियोगिताका रूपमा विभिन्न दुरीका अलगअलग दौड प्रतियोगिता सुरुवात गर्ने क्रममा कर्णाली हाफ म्याराथन हुन लागेको आयोजकको भनाइ छ । यसलाई क्रमशः अन्तर्राष्ट्रिय मान्यता दिलाउने प्रक्रियामा अघि बढाउने र कर्णाली म्याराथनलाई विश्व म्याराथनको छातामुनि लैजाने पनि रेस नेपालले तयारी गरेको छ ।

कर्णाली प्रदेश खेलकुद विकास परिषदसँगकोसाझेदारी तथा अन्य स्थानीय पालिका एवं नीजी क्षेत्रको सहयोगमा कर्णाली हाफ म्याराथन हुन लागेको हो ।