‘सर’लाई सुविधा : तलब त्रिविमा, पढाउने निजीमा

A+ A A-

त्रिभुवन विश्वविद्यालय (त्रिवि)बाट तलब बुझिरहेका करिब १ हजार ५ सय प्राध्यापकहरू नीजि क्याम्पसहरूमा पढाइरहेको पाइएको छ । त्रिविकै स्वीकृतिमा प्राध्यापकहरू अन्य क्याम्पसमा पढाइरहेको त्रिवि अनुगमन निर्देशनालयका कार्यकारी निर्देशक विष्णु खनालले जानकारी दिए ।

निर्देशनालयसम्बन्धी विनियममा त्रिविका प्राध्यापक पूर्वस्वीकृति लिएर मात्र अन्य शैक्षिक संस्थामा आंशिक समयका लागि पढाउन पाउने व्यवस्था छ । सोहीअनुसार बर्सेनि त्रिविका आंगिक क्याम्पसका प्राध्यापकले निजी क्याम्पस तथा कलेजमा पढाइरहेका छन् ।

बाहिर पढाउनका लागि स्थायी र करार प्राध्यापकले निर्देशनालयमा निवेदन दिई स्वीकृति लिनुपर्दछ । उनका अनुसार आर्थिक वर्ष २०७५/०७६ मा १ हजार ३ सय ५८ प्राध्यापकले बाहिर पढाउनका लागि स्वीकृति लिएका छन् भने आव २०७४/०७५ मा १ हजार ४ सय १७ प्राध्यापकले निर्देशनालयबाट स्वीकृति पाएका छन् ।

‘विनियमअनुसार प्राध्यापकले क्याम्पसलाई कुनै असर नपर्ने गरी अन्यत्र पढाउन पाउँछन्’, उनले भने, ‘हामीले प्राध्यापकबाट आएका निवेदन हेरेर अन्यत्र पढाउने अनुमति दिने गरेका छौं ।’

‘त्रिविको नाम, निजीमा काम, दिमागमा दाम’ हुनाले त्रिविको गुणस्तर खस्कँदै गएको छ । राष्ट्रिय सतर्कता केन्द्रको प्रतिवेदनमा एउटै सिफ्टमा दुई–तीनतिर पढाउनेहरू पनि भेटिएको उल्लेख छ । करिब १८ प्रतिशत प्राध्यापकले अनुमति लिएर अन्यत्र पढाइरहेको केन्द्रको प्रतिवेदनमा उल्लेख छ । अनुमति नलिई निजीतिर धाउनेको संख्या पनि प्रशस्तै छ । गैरसरकारी संस्थामा कन्सल्टेन्सी गर्नेहरूका बारे त अझ अध्ययन भएको छैन ।

विश्वविद्यालयको ‘लोगो’ लगाएर त्यही लोगो बेच्दै तन, मन र ऊर्जा अन्यत्र खर्च गर्ने र सार्वजनिक शिक्षामा प्वाल पार्ने धमिरे प्रवृत्ति मौलाएको छ । त्रिविमा पूर्णकालीन करिब ८ हजार प्राध्यापक रहेका छन् । उनका अनुसार विनियमअनुसार नआएका निवेदनलाई भने त्रिविले स्वीकृति दिने छैन ।

त्रिविले आव २०७५/०७६ मा १४ जना र आव २०७४/०७५ मा ११ जना प्राध्यापकलाई स्वीकृत दिएको थिएन । ती पदाधिकारी भएकाले अध्यापनका लागि स्वीकृति नदिएको निर्देशनालयका कार्यकारी निर्देशक खनालले जानकारी दिए । त्रिविले पदाधिकारी भनी उल्लेख गरिएका पदका प्राध्यापकलाई भने अन्यत्र पढाउनका लागि पूर्व स्वीकृति दिने गरेको छैन ।

त्रिविका पदाधिकारी, विभागका डीन, सहायक डीन, निर्देशनालयका निर्देशक, उपनिर्देशक, परीक्षा नियन्त्रक, क्याम्पस प्रमुख र सहायक क्याम्पस प्रमुखलाई पदाधिकारी भनी व्याख्या गरिएको छ ।

विशिष्ट चिकित्सकलाई भने अन्यत्र काम गर्न दिइने

यसैगरी। त्रिविको पदाधिकारी नै भएपनि चिकित्सा सेवाका विशेषज्ञ चिकित्सकलाई भने अन्यत्र काम गर्न दिइनेबारेमा छलफल भएको कार्यकारी निर्देशक खनालले जानकारी दिए ।

‘त्रिविको शिक्षण अस्पतालमा मात्र कुनै एकमात्र विशेषज्ञ चिकित्सक छन् भने मानवीय संवेदनशिलतालाई हेरेर अन्यत्र काम गर्न दिइने भन्नेबारे प्रस्ताव आएको छ’, उनले भने, ‘छलफल गरेर हामीले यस्ता विशेषज्ञ चिकित्सकलाई अन्यत्र काम गर्न दिने सोचमा छौं ।’

त्रिविका ६१ आंगिक क्याम्पस, ३९ निकाय, ९ डिन कार्यालय र ४ अनुसन्धान विभाग रहेका छन् । यस आवमा पनि त्रिविले सूचना प्रकाशित गरी अन्यत्र पढाउनका लागि प्राध्यापकसँग निवेदन माग गरेको छ ।

निर्देशनालयका उपनिर्देशक ओम बरालका अनुसार अहिलेसम्म करिब ५०० प्राध्यापकले अन्यत्र पढाउनका लागि निवेदन दिइसकेका छन् । त्रिविले साउनदेखि मंसिर मसान्तसम्म निवेदन माग गरेको छ । यसैगरी त्रिविले स्वीकृति नलिएर पढाउने २० जना कारबाहीका लागि त्रिवि कार्यकारी परिषदमा सिफारिश गरिएको निर्देशनालयका कार्यकारी निर्देशक खनालले जानकारी दिए ।

प्रकाशित मिति: मंगलबार, कात्तिक ५, २०७६ १९:३१