इशान किशनदेखि ग्लेन म्याक्सवेलसम्म : यी हुन् आईपीएलमा सुपरफ्लप बनिरहेका खेलाडी

इशान किशनदेखि ग्लेन म्याक्सवेलसम्म : यी हुन् आईपीएलमा सुपरफ्लप बनिरहेका खेलाडी

A+ A A-

इन्डियन प्रिमियर लिग (आईपीएल) क्रिकेटका १९ खेल सकिएका छन् । जसमा अहिलेसम्म राजस्थान रोयल्स र कोलकत्ता नाइट राइडर्स अपराजित रहँदै पहिलो र दोस्रो स्थानमा छन् । यो सिजन पनि उपाधिको दाबेदारका रूपमा हेरिएको रोयल च्यालेन्जर्स बैंग्लोरले सबैभन्दा बढी पाँच खेल खेल्दा चार खेलमा हारको सामना गरेको छ भने पाँच पटकको च्याम्पियन मुम्बई इन्डियन्स अंक जोड्न संघर्षरत् छ ।

केही टिमले स्टार खेलाडी भए पनि नतिजा आफ्नो पक्षमा पार्न सकेका छैनन् । आईपीएलमा निकै क्षमतावान पाँच खेलाडी अहिलेसम्म पनि रन जोड्ने संघर्षमै छन् । जोस बटलर पनि सुरुवाती तीन खेलमा फ्लप थिए । तर, उनले बैंग्लोरविरुद्ध शतक प्रहार गरेका छन् । उनको शतकीय पारीका कारण राजस्थान विजयी हुँदा विराट कोहलीको शतकका बाबजुद बैंग्लोर पराजित भयो । तर, आईपीएलमा केही यस्ता खेलाडी छन् जसको प्रदर्शन सुध्रिने हो भने जुनसुकै बेला टिमको प्रदर्शन सुधारिन सक्छ ।

यस्तै क्षमतावान खेलाडी हुन्, मिचेल मार्श । उनको आईपीएलको यो सिजन खराब बनिरहेको छ । विस्फोटक ब्याटर मार्सले ४ खेलमा ६१ रन मात्रै बनाउन सकेका छन् । उनले एक खेलमा सबैभन्दा बढी २३ रन बनाएका छन् । मुम्बई इन्डियन्सविरुद्धको खेलमा चोटका कारण टिममा नरहे पनि उनी आगामी खेलमा धमाका मच्चाउन सक्ने खेलाडी हुन् ।

चेन्नई सुपर किंग्सले आईपीएलको सिजन सुरु हुनुभन्दा अघिल्लो दिन मात्रै ऋतुराज गायकवाडलाई कप्तान बनायो । तर, उनको कप्तानी पनि कमजोर देखिन थालेको छ । सुरुवाती दुई खेल जितेपछि चेन्नईले लगातार दुई खेल हारेको छ । गायकवाड कप्तान भए पनि महेन्द्रसिंह धोनी नै कप्तानको रूपमा देखिने गरेका छन् । गायकवाडले चार खेलमा जम्मा ८८ रन बनाएका छन् । चेन्नईले उपाधि जितेको गत सिजन गायकवाडले ५ सय ९० रन बनाएका थिए ।

यस्तै अर्का फ्लप खेलाडी हुन्, इशान किशन । मुम्बई इन्डियन्सका विकेटकिपर ब्याटर किशन लामो समयदेखि विवादमा छन् । रणजी ट्रफी नखेलेका कारण उनलाई बीसीसीआईले कन्ट्र्याक्टबाहिर राखेको छ । ईशानले आईपीएलमा पनि आफ्नो जादु देखाउन सकेका छैनन् । उनले चार खेलमा जम्मा ९२ रन बनाएका छन् । पछिल्ला दुई सिजन चार सय भन्दा बढी रन बनाएका उनी उत्कृष्ट क्षमतामा खेल्न सक्ने खेलाडी हुन् ।

आईपीएलको यो सिजनमा अहिलेसम्म जादु देखाउन नसकेका अर्का खेलाडी यशस्वी जायसवाल हुन् । इंग्ल्याण्डविरुद्धको पाँच खेलको टेस्ट सिरिजमा ७ सयभन्दा बढी रन बनाएर चर्चा कमाएका जायसवालले आईपीएलका चार खेलमा ३९ रन मात्रै बनाउन सकेका छन् । पछिल्ला दुई खेलमा त उनी पहिलो ओभरमै पभेलियन फर्किएका छन् ।

आईपीएलमा अर्का सुपरफ्लप खेलाडी बनेका छन्, ग्लेन म्याक्सवेल । अस्ट्रेलियाका म्याक्सवेल जुनसुकै बेला खेललाई आफ्नो टिमको पक्षमा पार्नसक्ने खुबी भएका खेलाडी हुन् । गत विश्वकप क्रिकेटमा उनले अफगानिस्तानविरुद्ध दोहोरो शतक प्रहार गर्दै एक्लैले खेल जिताएका थिए ।

बैंग्लोरको टिममा रहेका अलराउण्डर म्याक्सवेलको ब्याटबाट अहिले भने रन बन्न सकेको छैन । उनले पाँच खेलमा जम्मा ३२ रन बनाएका छन् । उनको सबैभन्दा ठूलो पारी भनेकै २८ रनको हो । बाँकी चार खेलमा उनले चा रनमात्रै जोडेका छन् । यसैबाट म्याक्सवेलको रन बनाउने संघर्ष स्पष्ट हुन्छ । उनले पछिल्ला तीन सिजनमा आईपीएलमा १२ सयभन्दा बढी रन बनाएका छन् । उनको स्ट्राइक रेट १५० भन्दा माथि छ । टिमको जितका लागि म्याक्सवेलको ब्याट चल्नु अनिवार्य देखिन्छ । बलिङतर्फ भने उनले चा विकेट लिएका छन् । बैंग्लोरले सन् २०२२ मा उनलाई ११ करोड भारुमा रिटेन गरेको थियो ।

प्रकाशित मिति: आइतबार, चैत २५, २०८० १७:५१