कोशी प्रदेश : माओवादी छलफलमा, समर्थन फिर्ता लिन एमाले सांसदको हस्ताक्षर तयार

कोशी प्रदेश : माओवादी छलफलमा, समर्थन फिर्ता लिन एमाले सांसदको हस्ताक्षर तयार

A+ A A-

केदार कार्की नेतृत्वको सरकार परिवर्तन गर्न एमाले र माओवादीबीच छलफलहरू पछिल्ला दिन बाक्लिएका छन् । अन्य प्रदेशहरूमा सरकार परिवर्तनको क्रम सुरु भएसँगै कोशीमा एमालेको नेतृत्वमा सरकार बनाउने गरी गठबन्धनमा कसरत सुरु भएको छ ।

एमाले स्रोतका अनुसार सरकार परिवर्तनको प्रक्रिया सुरु गर्न मुख्यमन्त्री केदार कार्कीलाई एमालेका ३९ सांसदले दिएको समर्थन फिर्ता लिने तयारी लगभग पूरा गरेको छ । जसका लागि ‘समर्थन फिर्ता’ लिएको कागजमा ३९ सांसदहरूको छुट्टाछुट्टै निवेदन तयार पारेर हस्ताक्षरसमेत गराइएको छ । माओवादीका सांसदहरूको आइतबार बिहानसम्म हस्ताक्षर आए आइतबारै प्रदेश प्रमुख कार्यालय पुगेर समर्थन फिर्ता लिएको सूचना दिने तयारीमा एमाले रहेको छ ।

एमालेले आफ्नो तर्फबाट प्रक्रिया सुरु गरेको जनाउ दिए पनि माओवादीले भने ठ्याक्कै यही दिन सरकारको समर्थन गर्ने भनेर मिति भने तोकेको छैन । ‘सरकारको नेतृत्व कसले गर्ने ?’ भन्ने प्रश्नमा माओवादीले आफ्नो नेतृत्वमा सरकार बन्नुपर्ने सङ्केत दिँदै आएको थियो । नेतृत्व लिने विषयमा माओवादीको प्रदेश संसदीय दलसमेत तयार रहेको देखिन्थ्यो । तर, केन्द्रीय नेतृत्वले एमालेलाई नै मुख्यमन्त्री बनाउने भएपछि माओवादीभित्र केही सांसदहरूमा भने असन्तुष्टि भने अझै देखिन्छ ।

तर, एमाले संसदीय दलका प्रमुख सचेतक रेवतीरमण भण्डारी भने नयाँ गठबन्धनका दलहरू सरकार परिवर्तन गर्ने अन्तिम तयारीमा रहेको बताउँछन् । ‘गठबन्धनभित्र छलफल भएको छ, ठ्याक्कै यो समय भनेर भन्ने कुरा त अहिले भएन । तर, छिट्टै सरकार परिवर्तनको प्रक्रिया सुरु हुन्छ’, भण्डारीले शिलापत्रसँग भने । बजेट समेत बनाउनुपर्ने भएकाले एमालेले भने सरकार परिवर्तन समयमै हुनुपर्ने बताउँदै आएको छ ।

तर, शक्ति बाँडफाँटको टुङ्गो लागेपछि सरकार परिवर्तनको प्रक्रिया अघि बढाउने ‘मुड’मा गठबन्धनका अन्य दलहरू रहेका छन् ।

माओवादीले सरकार परिवर्तनको विषयलाई लम्ब्याएको भन्ने टिप्पणीलाई भने माओवादीका सांसदहरू अस्वीकार गर्छन् । माओवादीका प्रदेश सांसद दुर्गा चापागाईँ सचिन केही समयभित्रै सरकार परिवर्तनको प्रक्रिया सुरु गर्ने बताउँछन् । ‘यही मितिमा सरकारको समर्थन फिर्ता लिने भन्ने समय त तोकिएको छैन तर, छिट्टै सरकार परिवर्तनको प्रक्रिया भने सुरु हुन्छ’, चापागाईँले भने, ‘केही प्रक्रियाको विषयमा थप छलफल जारी छ ।’

संवैधानिक प्रक्रियामा कन्फ्युजन

एमालेका ३९ र काङ्ग्रेसबाट तत्कालीन अवस्थामा विद्रोह गरेका ८ सांसदहरूको समर्थनमा गएको असोजमा केदार कार्की संविधानको धारा १६८ को उपधारा ५ अनुसार मुख्यमन्त्री बनेका थिए । पछि विश्वासको मत दिने अवस्थासम्म कार्कीको पक्षमा कांग्रेस, माओवादी, नेकपा एस र जसपा पनि थपियो । त्यो अवस्थासम्म कार्की शक्तिशाली मुख्यमन्त्रीको रूपमा देखिएका थिए ।

तर, गठबन्धनको परिस्थिति बदलिएपछि राजनीतिक रूपमा अल्पमतमा देखिएका कार्की तत्काल सरकार छाड्ने मनस्थितिमा भने देखिँदैनन् । संविधानले परिकल्पना गरेको अन्तिम विकल्पको मुख्यमन्त्री भएको र आफूविरुद्ध दुई वर्षसम्म अविश्वास प्रस्तावसमेत ल्याउन नपाउने दलिल कार्कीले पेस गर्दै आएका छन् । उपधारा ५ को व्यवस्थाअनुसार स्वतन्त्र सांसदहरूको समर्थन आफू मुख्यमन्त्री बनेको भन्दै कार्कीले सरकार ढाल्न खोजे प्रदेशसभा विघटन हुने चेतावनीसमेत दिँदै आएका छन् ।

गठबन्धन परिवर्तन भएपछि सरकार परिवर्तन हुनसक्ने भन्दै प्रदेश प्रमुखको कार्यालयले पनि सरकार फेरबदलका लागि हुनसक्ने विभिन्न प्रयासको विषयमा छलफल गरिसकेको छ । केदार कार्की नेतृत्वको सरकार विस्थापित गर्नका लागि सरकारलाई दिएको समर्थन फिर्ता लिन सांसदहरू लिखित रूपमा सशरीर उपस्थित हुने अनुमानमा प्रदेश प्रमुख कार्यालयसमेत देखिन्छ । गठबन्धनभित्र अहिले बहुमत सांसदले प्रदेश प्रमुख समक्ष सरकारको समर्थन फिर्ता लिएको लिखित पत्र बुझाउने तयारी भइरहेको छ । समर्थन फिर्ता लिएपछि संविधानको धारा १८८ को उपधारा २ लागू हुने र मुख्यमन्त्रीले ३० दिनभित्र विश्वासको मत लिनुपर्ने तर्क एमालेको छ ।

प्रकाशित मिति: शनिबार, चैत २४, २०८० १९:४६