एनसीएचएल र नेप्सबीच प्राप्ति गर्नेसम्बन्धमा अन्तिम सम्झौता

A+ A A-

नेपाल क्लियरिङ हाउस लिमिटेड (एनसीएचएल)ले नेपाल इलेक्ट्रोनिक पेमेन्ट सिस्टम्स लिमिटेड (नेप्स)लाई प्राप्ति गर्न दुवै संस्थाहरूबीच प्राप्ति सम्बन्धि अन्तिम सम्झौता भएको छ ।

बिहीबार बसेको संयुक्त मर्जर प्राप्ति समितिको बैठकमा एनसीएचएल र नेप्सका संयोजक क्रमश: महेश शर्मा ढकाल र संजीव श्रेष्ठले अन्तिम सम्झौतापत्र आदान प्रदान गरेका हुन् ।

बैठकमा दुवै कम्पनीका सञ्चालक समितिका अध्यक्षद्वय रामु पौडेल, विश्वम्भर न्यौपाने र सम्पूर्ण सञ्चालकहरू तथा प्रमुख कार्यकारी अधिकारीहरूसमेतको उपस्थिति थियो ।

उक्त अन्तिम सम्झौतापश्चात् दुवै संस्थाहरूले छुट्टाछुट्टै विशेष साधारणसभामार्फत आफ्ना शेयरधनीहरूको समर्थन लिई नेपाल राष्ट्र बैंकको अन्तिम स्वीकृतिपछि कम्पनी रजिस्ट्रार कार्यालयको आवश्यक प्रक्रिया सम्पन्न गरी एकीकृत कार्य हुनेछ ।

बैंक वित्तीय संस्थाहरूबाट प्रवर्द्धित दुवै संस्था नेपाल राष्ट्र बैंकबाट भुक्तानी प्रणाली संचालकको अनुमति प्राप्त गरी विगत लामो समयदेखि आ–आफ्नो क्षेत्रमा कार्य गर्दै आएका संस्था हुन् । नेप्सले हालसम्म विभिन्न कार्ड स्किमका लागि कार्ड स्वीचको पूर्वाधार विस्तार गर्दै बैंक वित्तीय संस्थाहरूलाई सेवा दिँदै आएको छ । त्यस्तै, एनसीएचएलले कार्डबाहेकका विभिन्न विद्युतीय भुक्तानी प्रणाली, पूर्वाधार तथा प्ल्याटफर्ममार्फत आफ्ना सदस्यहरूलाई सेवा दिँदै आइरहेको छ ।

विद्युतीय भुक्तानी पूर्वाधारको विकास तथा यसको प्रयोग वृद्धि गरी डिजिटल नेपालले परिकल्पना गरेको उक्त क्षेत्रलाई आधुनिकीकरण तथा अन्तरआबद्धता कायम गर्न र यससम्बन्धी दूरगामी परियोजनाहरूको सफल कार्यान्वयनका लागि राष्ट्रिय भुक्तानी स्वीचलगायतका थप पूर्वाधारहरू विस्तार गर्न यस साझेदारीले सहयोग हुने अपेक्षा गरिएको छ ।

दुवै संस्थाका प्रणाली, पूर्वाधार र कारोबारलाई एकीकृत गरी थप सुधार, प्रतिस्पर्धात्मक र प्रतिफलमूलक हुने गरी राष्ट्रिय र अन्तराष्ट्रिय भुक्तानीको क्षेत्रमा आफ्नो उपस्थितिलाई सशक्त गर्नसमेत एनसीएचएल र नेप्सबीचको प्राप्तिले उल्लेखनीय भूमिका खेल्ने विश्वास गरिएको छ । प्राप्तिपश्चात् कम्पनीको पुँजी थप वृद्धि हुनुका साथै पहुँच, अनुभव र क्षमताका आधारमा यस क्षेत्रमा नेपाल सरकार र नेपाल राष्ट्र बैंकले परिलक्षित गरेको दीर्घकालीन उद्देश्य प्राप्ति गर्नसमेत योगदान पुग्नेछ ।

प्रकाशित मिति: शुक्रबार, चैत २३, २०८० १६:३५