अटेर गरेपछि अमेरिकी राष्ट्रपति बाइडेनले इजरायली प्रधानमन्त्रीलाई दिए चेतावनी

अटेर गरेपछि अमेरिकी राष्ट्रपति बाइडेनले इजरायली प्रधानमन्त्रीलाई दिए चेतावनी

A+ A A-

गाजामाथिको आक्रमणलाई लिएर आफ्ना कुरा नसुनेपछि इजरायलसँग अमेरिका चिढिएको छ । अन्तर्राष्ट्रिय मञ्चमा अमेरिका सधैं इजरायलको ‘पोलिटिकल ब्याकअप’ रहँदै आएको छ । तर, गाजा आक्रमणलाई लिएर इजरायलले अमेरिकालाई बेवास्ता गरिदिएकाे छ ।

हमाससँगको दुश्मनीमा निहत्था गाजावासी र खाद्य राहतकर्मीसमेत मारिने क्रम नरोकिएपछि अमेरिकाले युद्धविराम गर्न इजरायललाई आग्रह गर्दै आएको छ ।

समाचार संस्था एपीका अनुसार, बिहीबार अमेरिकी राष्ट्रपति जो बाइडेन र इजरायली प्रधानमन्त्री बेन्जामिन नेतन्याहूबीच फोनमा ३० मिनेट कुराकानी भयो । त्यस क्रमममा बाइडेनले इजरायलसँग अनुरोधको शैलीमा नभएर चेतावनीको शैलीमा कुरा गरेका एपीको समाचारमा उल्लेख छ । ‘आफ्ना वार्ताकारलाई ढिलासुस्ती नगरी युद्धविरामको सम्झौता गर्न बाइडेनले नेतान्याहूलाई दबाब मात्र दिएनन्, भनेको नमाने भविष्यमा अमेरिकी समर्थनमा पुनर्विचार गर्ने चेतावनीसमेत दिए ।’

अमेरिकी नेताले इजरायललाई पहिलोपल्ट यस्तो चेतावनी दिएका हुन् ।

अमेरिकाले रणनीति नबदलोस् भन्ने चाहेको भए इजरायलले गाजाको रणनीति बदल्नुपर्ने र त्यहाँ धेरेभन्दा धेरै मानवीय सहायताको अनुमति दिनुपर्ने अमेरिकी राष्ट्रपतिको भनाइ थियो ।

अमेरिकी नीतिमा के परिवर्तन हुन सक्छ भन्ने कुरा प्रस्ट नभए पनि इजरायललाई दिँदै आएको युद्ध सहायता र विश्व मञ्चमा अमेरिकाको समर्थन परिवर्तन हुन सक्ने एपीको समाचारमा उल्लेख छ ।

गाजामा इजरायली हवाई आक्रमणबाट सात खाद्य राहतकर्मी मारिएको केही दिनपछि बाइडेन र नेतन्याहूबीच फोन कुराकानी भएको हो । गत ७ अक्टोबरमा इजरायली भूमिमा छिरेर प्यालेस्टाइनी विद्रोही समूह हमासले अभूतपूर्व आक्रमण गरेपछि हमासलाई सक्ने कसम खाएर इजरायलले गाजामाथि निरन्तर आक्रमण गरिरहेको छ । इजरायलको आक्रमणबाट हजारौं निर्दोष प्यालेस्टाइनीसँगै सयौं उद्धारकर्मी र समाजिक कार्यकर्तासमेत मारिएका छन् ।

०००

सिफारिसः

शिलापत्रको वर्षान्त अभियानमा सहभागी हुनुहोस् र चुन्नुहोस् आफूलाई मनपर्ने चर्चित पात्र र सिर्जनाहरू । तल राखिएको गुगल फारममार्फत आफ्नो मत जाहेर गर्न सक्नुहुनेछः

Loading…

प्रकाशित मिति: शुक्रबार, चैत २३, २०८० ०९:०३