पूर्वपश्चिम राजमार्ग विस्तारकाे काममा ढिलाइ हुँदा सिरहा र सप्तरीका बासिन्दा हैरान

पूर्वपश्चिम राजमार्ग विस्तारकाे काममा ढिलाइ हुँदा सिरहा र सप्तरीका बासिन्दा हैरान

A+ A A-

पूर्वपश्चिम राजमार्गअन्तर्गत सिरहा र सप्तरी खण्डको सडक विस्तारको काम समयमा नहुँदा उक्त मार्गमा यात्रा गर्ने यात्रुले सास्ती भोग्दै आइरहेका छन् । सडकको काममा ढिलाइ हुँदा यात्रुहरूले जोखिमपूर्ण यात्रा गर्न बाध्य हुनुपरेकाे छ । सडक निर्माणमा भएकाे ढिलाइका कारण धुलोले स्वास्थ्यमा समस्या भएको भन्दै सथानीयवासीले आन्दोलनसमेत गरेका थिए । तर पनि सडक निर्माणकाे कामले गति नलिँदा सास्ती भइरहेकाे सिरहा गोलबजारका गणेश साहले दुखेसाे पाेखे ।

संयुक्त राष्ट्र सङ्घको पहलमा विस्तार सुरु गरिएको एसियन हाइवे नेटवर्कमा सहभागी भएको १९ वर्षपछि धनुषाको कमलादेखि सप्तरीको कञ्चनपुरसम्म ८३ किलोमिटर सडक विस्तारको काम चलिरहेको छ । एसियाली विकास बैङ्क (एडीबी) को ऋण सहयोगमा निर्माण सुरु भएको कमला कञ्चनपुर सडकको हालसम्म भौतिक प्रगति ५५ प्रतिशत भएको आयोजना निर्देशनालय जनाएको छ ।

एसियन हाइवे मापदण्ड अनुसार यी दुवै जिल्लामा रहेको सडकको सबै जसो पीच भत्काएको कारण सवारी साधन गुड्दा धुलो उड्ने समस्याले स्थानीयवासीलाई आजित पारेको छ । कमलादेखि कञ्चनपुरसम्मको सडक निर्माणको काम दुई फेजमा हुँदै छ । जस अन्तर्गत सङ्घीय सरकारको कुल १५ अर्ब ५६ करोडको लागतमा कमलादेखि कञ्चनपुरसम्म पूर्वी सडक खण्डमा पहिलो प्याकेज र दोस्रो प्याकेज अन्तर्गत ७ अर्ब २७ करोडको लागतमा सप्तरीको कुशहादेखि कञ्चनपुरसम्म ३९ किलोमिटरमा सडक विस्तारको काम भइरहेको पूर्वी सडक प्रमुख खड्गलाल श्रेष्ठले बताए ।

कमला कञ्चनपुर सडक योजना अन्तर्गत ८३ किलोमिटर क्षेत्रमा २९ वटा मुख्य पुल ११४ वटा कल्भर्ट र ६ किलोमिटर नाला निर्माणको काम भइरहेको छ । केही पुलको ढलान भइसकेको छ भने कल्भर्ट निर्माणको काम अन्तिम चरणमा रहेको प्रमुख श्रेष्ठले बताए ।

सिरहाको बलान (कुशाहा)देखि पश्चिम कमलासम्म दोस्रो प्याकेजकाे सडक विस्तारको काम नयाँ प्रविधिबाट भइरहेकाे छ । तर काममा ढिलाइ हुँदा दुर्घटनाकाे जाेखिम बढ्नुका साथै धुलाेले स्वास्थ्यमा नकारात्मक असर पारिरहेकाे स्थानीयकाे गुनासाे छ । उनीहरूले धुलाे उडेपछि सडकमा सवारीसाधन चलाउन आँखासमेत नदेखिने गरेकाे बताएका छन् । ८६ किलोमिटरकाे दूरी पार गर्न अहिले सवारी साधनलाई कम्तीमा ५ घण्टा समय लाग्ने गरेको छ । सडकको दुवै खण्डमा अहिले दैनिक एक हजारभन्दा बढी श्रमिक सडक विस्तारको काममा लागेका छन् ।