शिक्षामा पर्याप्त बजेट विनियोजन गर्न सांसदहरूको माग

A+ A A-

राष्ट्रियसभा सदस्यहरूले आगामी आर्थिक वर्ष २०८१/०८२ को बजेटमा शिक्षा क्षेत्रमा लगानी बढाउन सरकारसँग आग्रह गरेका छन् । सोमबारको संघीयता सबलीकरण तथा राष्ट्रिय सरोकार समिति बैठकमा बोल्दै सांसदहरूले सरकारले शिक्षामा लगानी बढाउनुपर्नेमा जोड दिएका हुन् । उनीहरूले नेपालमा कृषि र शिक्षा क्षेत्रमा लगानी गरेर नै विकास र समृद्धि सम्भव रहेको भन्दै शिक्षामा लगानी बढाउन जोड दिए ।

उनीहरूले सांसदहरूका आफ्नाआफ्ना चाहनाअनुसार बजेट माग गरे पनि प्राथमिकताका आधारमा मात्रै बजेट छुट्याउन आवश्यक रहेको बताए । परम्परावादी बजेटलाई ब्रेक गरेर अघि बढेमात्रै शिक्षा क्षेत्रमा परिवर्तन गर्न सम्भव रहेको बताए । समितिको बैठकमा बोल्दै नकेपा (माओवादी केन्द्र) बाट राष्ट्रियसभा सदस्य जगप्रसाद शर्माले नयाँ आवमा शिक्षामा धेरै छुट्याउन आवश्यक रहेको बताए । उनले पुरानो र परम्परावादी बजेटबाट शिक्षा क्षेत्रमा सुधार गर्न सम्भव नहुने जिकिर गरे । उनले निजी, सरकारी विद्यालयहरूको पाठ्यक्रम एउटै बनाउन आवश्यक रहेको बताए ।

समितिको बैठकमा बोल्दै नेकपा एमालेका सांसद इन्दिरा गौतमले शिक्षा विकासका मेरुदण्ड रहेकाले पर्याप्त बजेट छुट्याउन आवश्यक रहेको बताए । उनले बालविकास केन्द्रलाई अझै व्यवस्थित बनाई शिक्षालाई अगाडि बढाउन आवश्यक रहेको बताए ।

उनले भने, ‘शिक्षा विकासका मेरुदण्ड हो । त्यसकारणले यसलाई पर्याप्त मात्रामा बजेट छुट्याउनुपर्छ । साथै शिक्षालाई माथि उठाउनुपर्छ, बालबालिकाहरू धेरै कुरासँग गाँसिन्छ, दिमागको विकास भनेको धेरै कुरासँग गाँसिन्छ । हामीले बालविकास केन्द्र ठाउँ ठाउँमा राखेका छौँ, त्यसबाट नै हामीले शिक्षालाई अघि बढाउनुपर्छ ।’

बैठकमा बोल्दै नेकपा (एकीकृत समाजवादी) की सांसद राजेन्द्रलक्ष्मी गैरेले बाल विकासका शिक्षकलाई स्थायी बनाउनुपर्ने माग गरिन् । उनले बालबालिकाहरूको स्याहार गरेर बस्ने शिक्षक शिक्षिकाहरूको पारिश्रमिक पनि बढाउन आवश्यक रहेको उल्लेख गरिन् ।

समितिको बैठकमा बोल्दै नेपाली कांग्रेसका सांसद किरणबाबु श्रेष्ठले शिक्षा कुनै पनि देशको आर्थिक, सामाजिक विकासका लागि सबैभन्दा महत्वपूर्ण कुरा रहेकाले शिक्षामा आवश्यक बजेट विनियोजन गर्नुपर्ने धारणा राखे । उनले बजेट राखेर मात्रै नहुने भन्दै कार्यान्वयनमा पनि जोड दिन सुझाव दिए ।

उनले सामुदायिक विद्यालयहरूमा गुणस्तरीय शिक्षा नभएकै कारण निजी विद्यालयहरूमा विद्यार्थीहरूको भिड लाग्ने गरेको भन्दै सामुदायिक विद्यालयको शिक्षा गुणस्तर वृद्धि गर्न आवश्यक रहेको बताए ।

प्रकाशित मिति: सोमबार, चैत १९, २०८० १५:५३