विश्वकप खेल्ने टिममा लोकेश बमको बलियो दाबेदारी

तस्वीर : क्यान

A+ A A-

नेपालका विस्फोटक ब्याटर लोकेश बमले शुक्रबार आयरल्यान्ड वुल्भ्सविरुद्धको टी२० खेलमा विस्फोटक शतक बनाएसँगै चर्चामा आएका छन् । हुन त लोकेशले यसअघि पनि घरेलु प्रतियोगिताहरूमा विस्फोटक अन्दाजमा ब्याटिङ गरेर क्रिकेटप्रेमीको ध्यान आफूतर्फ तानिसकेका थिए । तर, शुक्रबार आयरल्यान्डविरुद्ध त्रिवि मैदानमा खेलेको उनको इनिङ्ग्स खास छ । किन खास छ भने नेपालमा पहिलोपटक ए टिम बनाएर राष्ट्रिय टिमको बेन्च स्ट्रेन्थ जाँचिएको मात्र छैन, राष्ट्रिय टिममा पुग्ने नयाँ ढोका पनि बनाइएको छ ।

ए टिममा राम्रो प्रदर्शन गरेर आफूलाई राष्ट्रिय टिमको दाबेदार बनाउने अवसर खेलाडीहरूमा छ । शुक्रबार लोकेशले आफूले पाएको अवसरलाई चारैतिरबाट उपयोग गरेका छन् । यसअघि फिनिसरको रूपमा पाँचौ वा छैटौँ नम्बरमा ब्याटिङ गर्दै आएका उनले शुक्रबार विनोद भण्डारीसँगै नेपाली इनिङ्ग्स ओपन गरे । अनुभवी ओपनरका साथ आएका उनले त्रिवि मैदानमा ठूला ठूला सर्टहरू प्रहार गरे । उनले तुक्कामा शतक बनाएका थिएनन्, सर्टहरू क्लिन थिए ।

टी२० मा पहिलो शतक बनाउने क्रममा लोकेशले ५६ बलमा १०६ रन बनाए । उनले ९ चौका र ८ छक्का प्रहार गरे । एक इन्डबाट लगातार विकेट झर्दा पनि उनले प्यासन गुमाएनन् । र लगातार हिटिङ गरिरहे । उनको एप्रोच शतक बनाउनमा मात्र केन्द्रित थिएन, टिमलाई जिताउने खालको थियो । भलै २२३ रनको लक्ष्य पाएको नेपालले जित हात पार्न सकेन । तर, जबसम्म उनी क्रिजमा थिए नेपालले जित्ने सम्भावना बलियो थियो । उनी आउट भएसँगै टिम काेल्याप्स हुँदा नेपालले २१ रनको हार व्यहोर्‍यो ।

नेपाल अहिले जुनमा हुने टी २० विश्वकपको तयारीमा छ । अमेरिका र वेस्ट इन्डिजमा हुने विश्वकपको तयारीका लागि नेपाली राष्ट्रिय टिम भारतको गुजरात प्रस्थान गरेको छ । गुजरातमा भारतीय दुईवटा स्टेट टिमसँग नेपालले त्रिकोणीय सिरिज खेल्नेछ । त्यसपछि नेपाली टिम एसीसी प्रिमियर कप खेल्न ओमान जानेछ । ओमानमा नेपालले उपाधि हात पारे लगातार दोस्रोपटक नेपाल एसिया कपका लागि छनोट हुनेछ ।

यी खेलहरूमा नेपाली खेलाडीले प्रदर्शन गर्ने खेलका आधारमा पनि जुनमा अमेरिका र वेस्ट इन्डिज जाने टिम चयन हुनेछ । नेपालका कप्तान रोहित पौडेलले अहिले टिम चयन भइनसकेको उल्लेख गर्दै प्रदर्शनका आधारमा टिम चयन हुने बताइसकेका छन् । यस्तो अवस्थामा शुक्रबार लोकेशले गरेको प्रदर्शनले उनलाई दाबेदारका रूपमा अगाडि ल्याएको छ । हुन त ओपनर स्लटमा उनले टिममा स्थान बनाउने सम्भावना छैन । आसिफ शेख र कुशल भुर्तेलको ओपनिङ जोडी टुटाउने सम्भावना देखिँदैन । तर, छैटौँ र सातौँ नम्बरमा फिनिसरका रूपमा लोकेशको बलियो दाबेदारी रहने देखिएको छ । अहिले सो स्थानमा विवेक यादवले मौका पाउँदै आएका छन् । तर, उनको प्रदर्शन पनि त्यति सुदृढ छैन ।

लोकेशले आयरल्यान्ड वुल्भ्ससँग थप दुई खेल खेल्न बाँकी छ । यी खेलमा उनको प्रदर्शन कस्तो रहन्छ, त्यसले पनि उनको दाबेदारीलाई बल दिनेछ । लोकेशले हालसम्म नेपालका लागि ११ टी २० आई खेलेका छन् । ती खेलहरूमा उनको सम्झन लायक प्रदर्शन छैन । उनले १२ टी २० खेलेका छन् । जसमा एक शतक र एक अर्धशतक बनाएका छन् ।

प्रकाशित मिति: शुक्रबार, चैत १६, २०८० १८:५९