प्रचण्डकी बुहारी बिनालाई सुदूरपश्चिमको सहइन्चार्ज नस्वीकार्ने भन्दै पाँच केन्द्रीय सदस्यले गरे बैठक बहिष्कार

प्रचण्डकी बुहारी बिनालाई सुदूरपश्चिमको सहइन्चार्ज नस्वीकार्ने भन्दै पाँच केन्द्रीय सदस्यले गरे बैठक बहिष्कार

A+ A A-

नेकपा माओवादी केन्द्र सुदूरपश्चिम प्रदेशको सहइन्चार्जको विषयलाई लिएर विवाद भएको छ ।

सिनियर नेताहरूलाई पाखा लगाएर जुनियर बिना मगरलाई प्रदेशको सहइन्चार्ज बनाइएको भन्दै सुदूरपश्चिम प्रदेशबाट प्रतिनिधित्व गर्ने केन्द्रीय सदस्यहरूले बैठक बहिष्कार गरेका छन् । उनीहरूले बिनालाई सहइन्चार्जका रूपमा स्वीकार्न नसकिने बताएका छन् ।

माओवादी केन्द्रको स्थायी समितिको १६ फागुनमा बसेको बैठकले उपमहासचिव गिरिराजमणि पोखरेललाई सुदूरपश्चिम प्रदेशको इन्चार्ज र केन्द्रीय सदस्य बिना मगरलाई सहइन्चार्ज बनाउने निर्णय गरेको थियो । सहइन्चार्ज बनाइएकी बिना प्रधानमन्त्री तथा पार्टी अध्यक्ष पुष्पकमल दाहाल प्रचण्डकी बुहारी हुन् । सुदूरपश्चिम प्रदेशको इन्चार्ज यसअघि सचिव डिलाराम आचार्य र सहइन्चार्ज स्थायी समिति सदस्य खगराज भट्ट थिए ।

उपमहासचिवसमेत रहेका इन्चार्ज पोखरेलले बिहीबार धनगढीमा सुदूरपश्चिम प्रदेशबाट प्रतिनिधित्व गर्ने केन्द्रीय सदस्यहरूको बैठक बोलाएका थिए । बैठकमा सहइन्चार्जका मगर पनि सहभागी थिइन् । तर, सहइन्चार्ज मगर बैठकमा सहभागी भएको भन्दै पाँच जना केन्द्रीय सदस्यहरूले बैठक बहिष्कार गरेको केन्द्रीय सदस्य हरि ज्ञवालीले बताए ।

‘सिनियर साथीहरू बस्ने भनेर इन्चार्ज पोखरेलले बैठक बोलाउनु भएको थियो । हामी बैठकमा गयौँ । तर, धेरै जुनियरलाई सहइन्चार्ज बनाएको कुरा मान्य छैन भनेर बैठक बहिष्कार गर्‍यौँ,' ज्ञवालीले शिलापत्रसँग भने ।

बिनालाई सहइन्चार्ज बनाउने निर्णय सच्याउनुपर्ने ज्ञवालीको माग छ । ‘स्थायी समितिले गलत निर्णय गरेको छ । बिनालाई सहइन्चार्ज बनाउने निर्णय सच्याउनुपर्छ । पार्टी बनाउने हो भने विधिमा चल्नु पर्‍यो । पार्टीमा उचित मूल्यांकन हुनु पर्‍यो । यो निर्णय हामीले स्वीकार्दैनौँ,’ उनले भने ।

धेरै सिनियर नेताहरूलाई पाखा लगाएर अध्यक्ष प्रचण्डले आफ्नी बुहारी बिनालाई सहइन्चार्ज बनाएकाले विवाद सुरु भएको उनले बताए । ‘प्रचण्डलाई यो पार्टी बनाउनुपर्छ भन्ने भन्दा पनि आफ्नो परिवारको व्यवस्थापनको चिन्ता छ । यो गलत निर्णय नसच्याउँदासम्म हामीहरू बैठकमा जाँदैनौँ,’ उनले भने ।

उपमहासचिव पोखरेलले बोलाएको बैठक ज्ञवालीसहित केन्द्रीय सदस्यहरू नेपबहादुर चौधरी, विरमान चौधरी, भगत बडुवाल र हेमराज भट्टराईले बहिष्कार गरेका हुन् । ‍संगठनमा खट्नेहरूले जिम्मेवारी नपाउने तर प्रचण्डको बुहारी भएकै कारण सहइन्चार्ज बनाइएपछि सुदूरपश्चिम प्रदेशका नेताहरू पनि रुष्ट बनेको प्रदेश समितिका एक सदस्यले बताए ।

‘पार्टीले अन्तिम सास फेरिरहेको छ । यसलाई बनाउनेभन्दा पनि सक्न नेताहरूबीच लागिरहेका छन् । सिनियरलाई पाखा लगाएर जुनियरलाई जिम्मेवारी दिने काम भयो । निर्णय नसच्चिए पार्टी बिस्तारै सकिन्छ,' ती नेताले शिलापत्रसँग भने ।

तर, अध्यक्ष प्रचण्डनिकट नेताहरूले भने बिनालाई सहइन्चार्ज बनाएको विषयमा विवाद नभएको दाबी गर्छन् । उनीहरूले उपमहासचिव जनार्दन शर्मा समूहले बिनालाई सहइन्चार्जका रूपमा नस्वीकारेको बताउँछन् । 'सुदूरपश्चिममा गुटको असर देखिएको छ । उपमहासचिव शर्माको समूहले बिनाजीलाई सहइन्चार्ज नस्वीकारेको हो । हामीले पार्टीको निर्णय मान्छौँ,' ती केन्द्रीय सदस्यले भने ।

केन्द्रीय सदस्य कर्णबहादुर विकले भने बिहीबारको अनौपचारिक छलफलमा केही नेताहरूले स्थायी समितिको निर्णयप्रति असहमति जनाएर बैठकबाट बाहिरिएको बताए । उनका अनुसार प्रदेशमा भएका केन्द्रीय सदस्यहरूको बैठक शुक्रबार (आज) बस्न लागेको छ । तर, आज बोलाइएको बैठक पनि आफूहरूले बहिष्कार गर्ने केन्द्रीय सदस्य ज्ञवालीले बताएका छन् ।

माओवादी केन्द्र सुदूरपश्चिम प्रदेशमा नेताहरूबीचको गुटगत लडाइँ तीव्र छ । गुटगत लडाइँकै कारण सुदूरपश्चिम प्रदेशसभा संसदीय दलको नेताबाट स्थायी समिति सदस्य खगराज भट्टलाई हटाइएको थियो । प्रदेशसभामा रहेका माओवादी केन्द्रका ११ सांसदमध्ये ६ सांसदले १२ माघमा छुट्टै भेला गरेर भट्टलाई संसदीय दलको नेताबाट हटाएर मानबहादुर धामीलाई संसदीय दलको नेता बनाएका थिए ।

भट्टलाई संसदीय दल नेतामा हटाउन संसदीय दलका उपनेता अक्कलबहादुर रावल, मानबहादुर धामी, शिवसिंह ओली, ओमविक्रम भाट, लक्ष्मी विक र गीतादेवी माल एकजुट भएका थिए ।

प्रकाशित मिति: शुक्रबार, चैत १६, २०८० १३:५५

शिलापत्र संवाददाता

प्रतिक्रिया दिनुहोस्

भर्खरै

बझाङमा कांग्रेसको अग्रता, एमाले पछ्याउँदै

युक्रेनका सेना प्रमुख भन्छन्- अवस्था अत्यन्तै खराब छ

बझाङमा कांग्रेस अघिअघि, पछ्याउँदै एमाले

इलाममा सुहाङलाई २६ सय मतको अग्रता, अन्य उम्मेदवारको अवस्था के छ ?

कांग्रेसका डम्बरसँग मतान्तर बढाउँदै सुहाङ, डकेन्द्रभन्दा ३३ सय २९ मतले पछाडि मिलन

लोकप्रिय

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

बुद्धनगरमा कांग्रेस–एमालेका चार नेताकाे वार्ता, बालकाेट पुग्दासम्म गगन थापा निराश

इलाम २ः प्रारम्भिक मतपरिणाममा एमाले र 'पूर्वएमाले'बीच टक्कर

इलाम २ अपडेटः यस्तो छ प्रारम्भिक मतपरिणाम

विचार

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

तीन जनाको मुट्ठीमा ३ करोड जनताको लोकतन्त्र

बीसौँ शताब्दीका प्रभावशाली नेता लेनिन (भिडियो)

ब्लग

कसरी हटाउने सार्वजनिक सवारीको बेथिति ?

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

शिक्षा

युवा विद्यार्थी लक्षित परिसंवाद गर्दै हिमालयन ह्वाइटहाउस स्कुल, एमाले अध्यक्ष ओली पनि सहभागी हुने

बौद्धिक पलायन रोक्न पाठ्यक्रम समय सान्दर्भिक बनाऔँ : प्रधानमन्त्री

कक्षा १२ को परीक्षा आजदेखि, तीन लाख ९० हजार परीक्षार्थी सहभागी हुँदै