बागमती प्रदेशमा हानेपाका बज्राचार्य मन्त्री बन्दै

A+ A A-

बागमती प्रदेश सरकारमा हाम्रो नेपाल पार्टी सहभागी हुने भएको छ ।

मुख्यमन्त्री शालिकराम जम्कट्टेलले हानेपाका प्रदेशसभा सदस्य शैलेन्द्रमान बज्राचार्यलाई मन्त्री बनाउन लागेका हुन् ।मुख्यमन्त्री जम्कट्टेल बज्राचार्यलाई संस्कृति, पर्यटन तथा सहकारी मन्त्रालयको जिम्मेवारी दिँदैछन् ।

मुख्यमन्त्रीका राजनीतिक सल्लाहकार डिपी ढकालले बज्राचार्य मन्त्री बन्न तयार भएको र शपथ ग्रहण आजै हुने जानकारी दिए । ‘हानेपाका सांसद बज्राचार्यले सरकारमा सहभागी हुने बताएकाले मुख्यमन्त्री कार्यालयले प्रक्रिया अगाडि बढाएको छ । आजै शपथ हुन्छ होला,’ ढकालले शिलापत्रसँग भने । हानेपाले जम्कट्टेल नेतृत्वको सरकारलाई दिएको समर्थन केही दिनअघि मात्रै फिर्ता लिएको थियो ।

उता, बज्राचार्य मन्त्री बन्न लागेको थाहा पाउनासाथ हानेपाले पार्टीको बैठक बोलाएको बागमती प्रदेश सांसद सरिता खड्गीले बताइन् । ‘हाम्रो पार्टीले सरकारमा सहभागी हुनेबारे अहिले नै निर्णय लिएको छैन । बैठक जारी छ । बैठकले के निर्णय गर्छ, त्यसपछि मात्र सरकारमा सामेल हुने/नहुने थाहा हुन्छ,’ उनले भनिन् ।

केन्द्रमा नयाँ सत्ता समीकरण बनेसँगै कांग्रेस बागमती सरकारबाट बाहिरिएको थियो । कांग्रेस सरकारबाट बाहिरिएपछि माओवादी केन्द्र, एमाले, नेकपा एसलगायत मिल्दा पनि सरकार बनाउन एक सांसद कम हुन्थ्यो । यस्तोमा हानेपाका बज्राचार्य मन्त्री बनेपछि भने मुख्यमन्त्री जम्कट्टेल नेतृत्वको सरकार बहुमतमै हुनेछ ।

११० सदस्यीय प्रदेशसभामा सरकार बनाउन ५६ सांसदको समर्थ आवश्यक पर्छ । प्रदेशसभामा सत्ता गठबन्धनको एमालेका २७, माओवादी केन्द्रका २१ र नेकपा एसका ७ सांसद छन् । प्रदेशसभाको सबैभन्दा ठूलो दल कांग्रेसका ३७ सांसद छन् । यस्तै, राप्रपाका १३, नेपाल मजदुर किसान पार्टीका ३ र हाम्रो नेपाली पार्टीका २ सांसद छन् ।

प्रकाशित मिति: बिहीबार, चैत १५, २०८० १७:१३