को हुन् गरिमा विकास बैंकका नवनियुक्त सीईओ उपाध्याय ?

A+ A A-

गरिमा विकास बैंकको प्रमुख कार्यकारी अधिकृत (सीईओ)मा माधवप्रसाद उपाध्याय नियुक्त भएका छन् । बैंक सञ्चालक समितिको बुधबार बसेको ३०४औँ बैठकले उनलाई बढुवा गरेर सो पदमा नियुक्त गर्ने निर्णय गरेको हो ।

उपाध्यायलाई १ वैशाख २०८१ देखि लागू हुने गरी ४ वर्षको लागि सो पदमा नियुक्त गरिने भएको हो । उनी यसअघि सो बैंकमा नायब प्रमुख कार्यकारी अधिकृतको जिम्मेवारीमा कार्यरत थिए ।

व्यवस्थापनमा स्नातकोत्तर गरेका उपाध्याय गरिमा विकास बैंकमा स्थापनाकालदेखि नैै कार्यरत रहेका छन् । उनी यस बैंकमा विगत १५ वर्षदेखि कम्पनी सचिवको रुपमा र विगत ११ वर्षदेखि नायब प्रमुख कार्यकारी अधिकृत पदमा कार्यरत थिए । उनी बैंकिङ क्षेत्रमा प्रवेश गर्नुपूर्व करिब डेढ दशक अध्यापन/प्राध्यापन पेसामा संलग्न थिए ।

यस विकास बैंकमा विगत १५ वर्षदेखि निरन्तर सीईओेको जिम्मेवारी सम्हाल्दै आएका गोविन्दप्रसाद ढकालको कार्यकाल २०८० चैत मसान्तमा सकिने भएसँगै १ वैशाख २०८१ देखि रिक्त हुने सो पदमा उपाध्यायलाई नियुक्त गरिएको हो ।

सञ्चालक समितिको सोही बैठकले विकास बैंकमा कार्यरत सहायक प्रमुख कार्यकारी अधिकृत अनिल रेग्मीलाई बिहीबारदेखि लागू हुने गरी विकास बैंकको कम्पनी सचिवमा नियुक्त गर्ने निर्णय पनि गरेको छ ।

काठमाडौंको लाजिम्पाटमा केन्द्रीय कार्यालय रहेको गरिमा विकास बैंकले काठमाडौं उपत्यकाभित्र २२ सहित देशभर १२३ शाखा कार्यालय, १ एक्सटेन्सन काउन्टर र ५१ वटा एटीएममार्फत आफ्ना ग्राहकहरूलार्ई गुणस्तरीय बैंकिङ सेवा प्रदान गर्दै आइरहेको छ ।

प्रकाशित मिति: बिहीबार, चैत १५, २०८० १३:२२