एसईईमा कर्णालीबाट ३५ हजार विद्यार्थी सहभागी हुँदै

A+ A A-

आजदेखि माध्यमिक शिक्षा परीक्षा (एसईई) सञ्चालन हुँदै छ । राष्ट्रिय परीक्षा बोर्डले परीक्षाको सबै तयारी पूरा गरिसकेको जानकारी दिएको छ । बिहीबारदेखि सुरु हुने परीक्षा २७ चैतसम्म चल्नेछ ।

यस वर्षको एसईईमा देशभरबाट पाँच लाख विद्यार्थी सहभागी हुँदै छन् । जसमा कर्णाली प्रदेशमाबाट ३५ हजार आठ सय आठ जना विद्यार्थीहरू छन् । त्यसमध्ये छात्र १७ हजार ६ सय २३ र छात्रा १८ हजार एक सय ५८ छन् । शिक्षा विकास निर्देशनालय सुर्खेतका अनुसार परीक्षाका लागि प्रदेशभर एक सय ८६ वटा परीक्षा केन्द्रहरू निर्धारण गरिएको छ ।

जिल्लागत विवरण हेर्दा रुकुम पश्चिममा २३ वटा परीक्षा केन्द्रहरू रहेका छन् भने तीन हजार पाँच सय ९३ जना परीक्षार्थीहरू रहेका छन् । यस्तै २५ वटा परीक्षा केन्द्र रहेको सल्यानमा चार हजार पाँच सय ८२ परीक्षार्थी छन् । हिमाली जिल्ला डोल्पाबाट सात सय ३३ जना विद्यार्थीहरूले एसईई दिँदैछन् । यहाँ चारवटा मात्रै परीक्षा केन्द्रहरू तोकिएको छ ।

हुम्लामा ६ वटा मात्र परीक्षा केन्द्रहरू रहेका छन् भने विद्यार्थी एक हजार एक सय ९५ परीक्षार्थीहरू रहेका छन् । मुगुमा आठ वटा परीक्षा केन्द्र र एक हजार एक सय १३ परीक्षार्थी छन् । यस्तै २४ वटा परीक्षा केन्द्र रहेको कालिकोटमा तीन हजार सात सय ३६ परीक्षार्थी एसईईमा सहभागी हुनेछन् ।

जुम्लामा १६ परीक्षा केन्द्रमा दुई हजार पाँच सय ५७, जाजरकोटमा २२ परीक्षा केन्द्र र ४ हजार ६ सय ९४, दैलेखमा २५ परीक्षा केन्द्रमा पाँच हजार दुई सय ५७ र सुर्खेतमा सबैभन्दा बढी ३३ वटा परीक्षा केन्द्रहरूमा आठ हजार तीन सय ४८ परीक्षार्थीहरू परीक्षामा सहभागी हुँदै छन् ।

घट्दै विद्यार्थी, खस्कँदो गुणस्तर

कर्णालीमा हरेक वर्ष एसईई दिने परीक्षार्थीहरूको संख्या घट्दै गइरहेको तथ्याङ्कले देखाउँछ । गत वर्ष प्रदेशका ३८ हजार नौ सय ७० जना विद्यार्थीहरू एसईईमा सहभागी भएकोमा यो वर्ष तीन हजार एक ६२ जना विद्यार्थीहरू घटेको देखिन्छ ।

प्रदेशको राजधानीसमेत रहेको सुर्खेतमा पनि विद्यार्थीको संख्या घटेको देखिन्छ । सुर्खेतमा गत वर्ष तुलनामा झण्डै एक हजार विद्यार्थीको संख्या घटेको छ । गत वर्ष सुर्खेतबाट नौ हजार एक सय ३९ विद्यार्थीले एसईई दिएका थिए । सुर्खेतमा मात्रै होइन कर्णालीका सबै जिल्लामा विद्यार्थीको संख्या घटेको देखिन्छ ।

तथ्याङ्कमा विद्यार्थीको संख्या घटे पनि विद्यार्थीहरू किन घटिरहेका छन् भनेर राज्यले अध्ययन तथा विश्लेषण गरेको देखिँदैन । तर, अन्य प्रदेशको तुलनामा भौगोलिक रूपमा विकट हुनु, राज्यले शिक्षामा पर्याप्त लगानी नगरिदिनु, गरिबीजस्ता कारणले कर्णाली शिक्षामा पछि परेको शिक्षाविद्हरू बताउँछन् ।

हिमाली जिल्लाहरूमा पनि विद्यार्थीको संख्या घटिरेहको छ । विद्यार्थीको संख्या घट्नुको पछाडि गरिबी जोडिन्छ । आर्थिक अभावका कारण कतिपय विद्यार्थीहरू ७–८ कक्षा पढ्दापढ्दै स्कुल छाड्ने गर्दछन् ।

आर्थिक रूपले सम्पन्न परिवार सरकारी विद्यालय भन्दा निजीतिर आकर्षित हुनाले पनि सरकारी विद्यालयमा विद्यार्थीको संख्या घट्दै गइरहेको सरोकारवालाहरू बताउँछन् । उसै पनि कर्णालीमा १ कक्षामा भर्ना भएकामध्ये कक्षा १० सम्म पुग्दा विद्यार्थीहरू निकै न्यून हुने गरेको विभिन्न तथ्याङ्कहरूले देखाउँदै आएको छ ।

नेपाल राष्ट्र बैंकले कर्णालीमा गरेको सर्वेक्षण अनुसार गत आर्थिक बर्ष वर्ष २०७९/८० मा सरकारी तथा सामुदायिक विद्यालयमा चार दशमलव १ प्रतिशतले विद्यार्थी संख्या घटेको छ । तर, निजी विद्यालयमा भने २२ दशमलव २३ प्रतिशतले वृद्धि भएको देखाएको छ ।

प्रकाशित मिति: बिहीबार, चैत १५, २०८० ०७:२१