अब मधेश सरकारको नेतृत्व एमालेले लिन्छ : शंकर पोखरेल

A+ A A-

नेकपा एमालेका महासचिव शंकर पोखरेलले मधेश प्रेदश सरकारको नेतृत्व अब नेकपा एमालेले गर्ने बताएका छन् । बुधबार नेकपा एमाले बाराको प्रतिनिधि परिषद् बैठकलाई सम्बोधन गर्दै महासचिव पोखरेलले मधेसमा अन्य दलले नेतृत्व लिएर काम गरिसकेको बताउँदै अब मधेशको नेतृत्व एमालेले लिन चाहेको बताए । मधेश प्रदेश सरकारको नेतृत्व लिएर एमालले कसरी विकास गर्छ भन्ने कुरा देखाउन चाहेको पोखरेलले धारणा राखे ।

मधेशको विकास र समृद्धिका लागि योजनाबद्ध पहलकदमी अघि बढाउने पार्टी नेकपा एमाले भएको उनले बताए । तराईको मुख्य सडकको रूपमा रहेको हुलाकी सडक नेकपा एमालेकै पालामा बनेको स्पष्ट पारे । नेपाली जनता र मधेसका जनताको हितका लागि एमाले अध्यक्ष केपी शर्मा ओलीले भारतका प्रधानमन्त्रीसँग आँखा जुधाएर कुरा गर्नुभएको पोखरेलले बताए ।

जिम्मा लिएर १० वर्षसम्म भारतले रोकेको हुलाकी सडक ओली प्रधानमन्त्री हुँदा बनाएको उनले स्मरण गराए । ‘तराई मधेशको विकासका लागि नेतृत्व गर्ने पार्टी हो नेकपा एमाले, त्यो पार्टीलाई क्षेत्रीय पार्टीहरू मधेस विरोधी भन्ने गर्दछन्’, उनले भने । मधेशका जनतामा देखिएको निराशा नै आफूलाई मधेसवादी भन्ने दलहरूले लिएको बाटो भएको पोखरेलले बताए ।

मधेशको निराशा तोड्ने र आशा जगाउने काम गर्ने पार्टी नेकपा एमाले भएको उनले दाबी गरे । मधेशमा देखिएका नयाँ नयाँ काम नेकपा एमालेले नै गरेको पोखरेलले बताए ।

विकास नगर्नेहरू मधेशका समर्थक र विकास गर्ने पार्टी मधेस विरोधी हुन नसक्ने उनले बताए । यो सच्चाइलाई बुझ्न आवश्यक रहेको उनको धारणा छ । हिमालबाट बग्ने पानीबाट मधेसमा सिँचाई गर्नुपर्दछ भनेर भेरी डाइभर्सन तथा सुनकोसी–मरिण डाइभर्सनको काम नेकपा एमालेले अघि बढाएको उनले बताए । ‘सुनकोसी–मरिण डाइभर्सनको सुरुङ निर्माणको काम अन्तिम चरणमा पुगेको छ’, उनले भने ।

विगतमा एमालेलाई तराई मधेसमा छिर्न नदिने भनेर जनताका सपना र विकासलाई रोक्ने काम भएको उनले बताए । एमाले बेलैमा सरकारमा गएको भए मधेश अहिले निक्कै अगाडि बढिसकेको हुने उनले स्पष्ट पारे । नेपालको विकास र समृद्धि देख्न चाहनेले नेकपा एमालेलाई रोक्ने र विभाजित गर्ने काम गरेका उनले बताए ।

पार्टीका नेता कार्यकर्ताको मेहनत र समर्पणका कारणले नेकपा एमाले कठिन परिस्थितिमा पनि देशको सबैभन्दा लोकप्रिय दल बनेको उनले बताए । अहिले पुरानो सत्ता गठबन्धन टुटेर नयाँ सत्ता समीकरण बनेको भन्दै पोखरेलले यसमा नेकपा एमालेले कुनै भाग नखोजेको बताए । एमालेको ध्यान भागबण्डामा होइन, देशको विकास र बढ्दै गएको निराशालाई आशामा परिणत गराउने तर्फ केन्द्रित रहेको उनले स्पष्ट पारे ।

एमालेले देशको ओरालो लागेको यात्रालाई रोक्ने सोचका साथ नयाँ समीकरण गरेको पोखरेलले बताए । अहिलेको सत्ता समीकरणलाई पूर्णसमयसम्म लैजाने कुरामा एमालेको प्रयास रहेन उनको भनाइ छ ।

नेकपा एमालेलाई अब निर्णायक शक्तिका रूपमा विकास गर्नुपर्ने बताउँदै पोखरेलले यसका लागि जनताको बिचमा जानु पर्ने बताए । सामाजिक अपराधका घटनाबाट जनतालाई मुक्ति दिलाउन, सामाजिक विकास समृद्धिको अगुवाइ गर्न कार्यक्रममा देखिएर मात्र नहुने बताउँदै पोखरेलले त्यसको लागि जनताका बिचमा जानुपर्ने र जनताकै विश्वास जित्नुपर्नेमा जोड दिए ।

प्रकाशित मिति: बुधबार, चैत १४, २०८० १८:४०