प्रहरी महानिरीक्षक कुँवरको दाबी– सहकारी प्रकरणमा लामिछानेको संलग्नताको आधार प्रमाण देखिएन

प्रहरी महानिरीक्षक कुँवरको दाबी– सहकारी प्रकरणमा लामिछानेको संलग्नताको आधार प्रमाण देखिएन

A+ A A-

नेपाल प्रहरीका महानिरीक्षक वसन्तबहादुर कुँवरले सहकारी प्रकरणमा उपप्रधानमन्त्री एवं गृहमन्त्री रवि लामिछानेको संलग्नताको आधार प्रमाण नदेखिएको दाबी गरेका छन् । बुधबार राज्यव्यवस्था तथा सुशासन समितिको बैठकमा बोल्दै महानिरीक्षक कुँवरले पोखराको सूर्यदर्शन सहकारी प्रकरणमा लामिछानेको संलग्नताको आधार, प्रमाण नरहेको बताएका छन् ।

उनले गृहमन्त्री लामिछानेको सम्बन्धमा ठाडो उजुरी आएको र अनुसन्धान गर्दा तथ्य प्रमाण नभेटिएको दाबी गरे । उनले जीबी राईको सम्बन्धमा नेपाल प्रहरी संवेदनशील रहेको र सोहीअनुरुप पक्राउ गर्ने प्रक्रियामा लागेको बताए । राई मलेसियामा भए पनि नेपाल र मलेसियाका बीचमा सुपुर्दगी सन्धि नभएका कारण नेपाल पठाउन मलेसिया सरकार बाध्य नभएको बताए ।

उनले भने, ‘जीबी राईको इस्युमा हामी संवेदनशील छौँ । यो इस्युको मेन जड त्यही हो भन्ने हामीलाई लाग्छ । हामीले डिफ्युजन नोटिस जारी गर्‍यौँ । रेड कर्नर नोटिस जारी गर्‍यौँ । सम्बन्धित पक्ष मलेसियामा छ नै भन्छौँ । मलेसियामा सुपुदर्गी सन्धि छैन । हामीले आग्रह पत्र पठाएका भए पनि मलेसियन सरकार बाध्य भएको छैन । इन्टरपोलले फिर्ता पठाउन सक्दैन । अझै पनि हामी हाम्रो तहबाट काम गर्दै छौँ । सहकारीको विषयमा ठाडो उजुरी आयो । अनुसन्धान गर्दाखेरी तथ्य प्रमाण भेटिँदैन, रवि लामिछानेमा अहिलेसम्मको तथ्य, प्रमाणमा कुनै पनि आधार देखिँदैन ।’

महानिरीक्षक कुँवरले प्रहरीले पक्राउ गरी बयान गराउँदा सांसद विनोद चौधरीको व्यक्तिगत स्वतन्त्रतामा अतिक्रमण हुने ठानेर प्रहरी अतिरिक्त सचेत बन्दै संसदलाई पत्र पठाएको स्पष्ट पारे । उनले चौधरीमाथि किर्ते प्रकरणमा अनुसन्धान जारी रहेको र सो अनुसन्धान एक वर्षसम्म चल्ने बताए ।

महानिरीक्षक कुँवरले पूर्वसभामुख कृष्णबहादुर महराले सुन तस्करी प्रकरणको अनुसन्धानमा नसघाउने देखेर पक्राउ गर्नुपरेको दाबी गरे । महराले गाडी र पीएसओसमेत छोडेर हिँडेपछि पक्राउ गर्नुपरेको बताए । महराको स्वास्थ्य अवस्थाका कारण रिहाइ गरिएको भन्दै उनले कुनै दबाब र प्रभावमा नगरिएको बताए ।