गृहमन्त्री रवि लामिछानेको प्रस्टीकरण- विनोद चौधरीसँग प्रतिशोध साँधिएको होइन

गृहमन्त्री रवि लामिछानेको प्रस्टीकरण- विनोद चौधरीसँग प्रतिशोध साँधिएको होइन

A+ A A-

उपप्रधानमन्त्री तथा गृहमन्त्री रवि लामिछानेले बाँसबारी छाला जुत्ता कारखाना जग्गा प्रकरणमा सांसद विनोद चौधरीलाई कुनै प्रकारको प्रतिशोध नसाँधिएको बताएका छन् ।

बुधबार राज्य व्यवस्था तथा सुशासन समितिको बैठकमा गृहमन्त्री लामिछानेले कांग्रेसका सांसद विनोद चौधरीमाथि कुनै प्रकारको प्रतिशोध नसाँधिएको स्पष्ट पारेका हुन् । उनले विधिको शासनलाई पालना गरेर अनुसन्धान गरिएको बताए ।

गृहमन्त्री लामिछानेले पूर्ण व्यवसायिक मान्छेले व्यक्तिगत, राजनीतिक वा व्यवसायिक प्रतिशोधलाई मध्यनजर राखेर नहेर्ने भन्दै त्यस्तो व्यक्ति राज्यको निकायमा बस्न लायकसमेत नहुने बताए । उनले आफूले आफ्नो कार्यकालमा कुनै राजनीतिक पूर्वाग्रह नराख्ने पनि बताए ।

गृहमन्त्री लामिछानेले कानुनले दिएको अधिकारलाई दुरुपयोग नगर्ने पनि बताए । ‘सरकारले पहिला थुन्ने अनि त्यसपछि सुन्ने भन्ने कुराको जुन गुनासो देखिएको थियो । सांसद विनोद चौधरीको केसमा त्यस्तो कुरा देखिएन जस्तो लाग्छ,’ उनले भने ।

गृहमन्त्री लामिछानेले मेडिकल व्यवसायी दुर्गा प्रसाईंलाई हतियारको अनुमतिको सम्बन्धमा कानुनले दिएको भन्दा बढी अधिकार प्रदान गरिएको बताए । उनले त्यस सम्बन्धमा प्रहरीले अनुसन्धान गरिरहेको पनि बताए । अधिकारप्राप्त व्यक्तिभन्दा अन्य व्यक्तिको साथसँग हतियार रहेकाले प्रहरीले पक्राउ गर्नुपरेको उनको भनाइ छ । यद्यपि सम्बन्धित व्यक्तिहरूलाई रिहाइ गर्ने सर्वोच्च अदालतको आदेशको सरकारले सम्मानपूर्वक ग्रहण गर्ने बताए ।

गृहमन्त्री लामिछानेले सहकारी प्रकरणमा आफ्नो नाम मात्रै जोडिएको भन्दै त्यसमा अन्य कुनै प्रमाण नभएको बताए । उनले आफ्नो नाम भएको ठाउँमा हस्ताक्षर, ल्याप्चे, निवेदन अथवा सामान्य केवाइसीसमेत नभएको बताए । अदालतमा आफ्नोविरुद्ध मुद्दा नभएको र प्रतिवादीहरूले समेत आफ्नो नाम नलिएको जानकारी आफूसँग रहेको उनको भनाइ छ ।

प्रकाशित मिति: बुधबार, चैत १४, २०८० १५:४३