मोदीको मन जितेकी कंगना: आफैँलाई सफल बनाएका बलिउडकर्मीमाथि नै निसाना

A+ A A-

बलिउडमा सफलतासँगै केही पटक विवादमा आएकी अभिनेत्री कंगना रनौत अब राजनीतिमा होमिएकी छन् । महाराष्ट्रको शिवसेना नेतृत्वको सरकार र मुख्यमन्त्री उद्धव ठाकरेका विषयमा दिएको अभिव्यक्तिका कारण विवादमा आएकी कंगनालाई भारतीय जनता पार्टी (भाजपा) ले हिमाचल प्रदेशको मन्डीबाट लोकसभा उम्मेदवार बनाएको हो ।

सुशान्त सिंह राजपूतको घटनामा तत्कालीन महाविकास अघाडी सरकारमाथि दिएको आक्रामक अभिव्यक्ति र उनलाई दिएको वाइ प्लस सुरक्षासँगै रनौत भाजपाको राजनीतिमा आउने अनुमान गरिएको थियो । कंगना रनौत बलिउडमा आफ्नो अभिनय र लडाइँ झगडाका कारण सधैँ चर्चा र विवादमा रहँदै आएकी छन् । हिमाचलमा जन्मिएर करियर खोज्दै मुम्बई पुगेकी कंगनाले सुरुमा निर्देशक अरविन्द गौडदेखि आदित्य पन्चोलीसँग काम गरिन् ।

सन् २००६ मा उनलाई महेश भट्टले ग्याङस्टार फिल्ममा मुख्य भूमिका दिए । जुन फिल्मले कंगनालाई चर्चित नायिका बनाइदियो । यो फिल्ममा गरेको अभिनयले उनले वाहवाही मात्रै पाइनन्, उनलाई फिल्म फेयरको बेस्ट डेब्यु अवार्डसमेत दिइयो । त्यसपछि उनले आफ्नो करियरमा पछि फर्किएर हेर्नु परेन ।

सन् २००७ मा कंगनाका ‘वो लम्हे’ र ‘लाइफ इन ए मेट्रो’ जस्ता फिल्म आए । तर, २००८ को फिल्म ‘फेशन’ ले उनलाई नयाँ गन्तव्य दियो । प्रियंका चोपडा लिड रोलमा भएको यो फिल्ममा कंगनाको छोटो तर मजबुत अभिनयले उनले सपोर्टिङ रोलका लागि राष्ट्रिय पुरस्कार पाइन् ।

२००८ मा नै रिलिज भएको फिल्म राज-३ का नायक अध्ययन सुमनसँगको सम्बन्धका कारण उनी समाचारको हेडलाइन बनिन् । तर, केही समयमा नै सम्बन्ध टुट्यो । जब फिल्ममा कुनै भूमिका हिट हुन्छ भने त्यसको लाइन नै लाग्छ । २०११ मा तनु वेड्स मनुले उनलाई नयाँ मोडमा पुर्‍यायो र उनले सर्वश्रेष्ठ अभिनेत्रीको पुरस्कार पाइन् भने २०१४ सम्म उनी बक्स अफिस क्विन बनिसकेकी थिइन् ।

मणिकर्णिकामा कंगना झाँसीकी रानी बनिन् । तर, उनी जति सफलताको शिखर चढ्दै गइन्, विवादकी पनि रानी बन्दै गइन् । जसले आफ्नो करियरमा भूमिका खेले, उनीहरूलाई समेत कंगनाले निसाना बनाइन् । ग्याङस्टार र लाइफ इन ए मेट्रोको सफलतापछि आदित्य पंचोलीविरुद्ध मदिरा पिएर शारीरिक शोषण गरेको आरोपमा उजुरी गरिन् ।

सन् २०१० मा ‘काइट्स’ फ्लप भएपछि उनी निर्देशक अनुराग बसुसँगै भिडिन् । जुन उनको पहिलो फिल्म ‘ग्याङस्टार’ का निर्देशकसमेत थिए । अध्ययन सुमनसँगको ब्रेकअपदेखि ऋतिक रोशनसँगको झगडाले उनी पुलिस स्टेसन नै पुग्नु पर्‍यो । ऋतिक रोशनपछि करण जौहरको पछि लागिन् । करणलाई ‘मूभी माफिया’ देखि नेपोटिज्मसम्मको आरोप लगाइन् ।

त्यसपछिका कयौँ फिल्ममा उनलाई काम र सफलता दिलाएका फिल्मकर्मीहरू एकपछि अर्को गरी उनको निसानामा परे । सुशान्त सिंह राजपूतको मृत्युपछि उनले फेरि नेपोटिज्म र मूभी माफियाको मुद्दा उचालिन् । महेश भट्ट, करण जौहरदेखि सलमान खान, शाहरुख र अमिर खानसम्मलाई निसाना बनाइन् । सुशान्तको मृत्युपछि उनले बलिउडमा ९९ प्रतिशतले नसा प्रयोग गर्ने विवादित अभिव्यक्ति दिइन् । पछिल्ला केही समयदेखि फिल्म क्षेत्रसँगै राष्ट्रिय मुद्दामा पनि प्रतिक्रिया दिँदै आएकी थिइन् ।

उनी पूर्ण रूपमा मोदी सरकारको समर्थनमा उत्रिने गरेकी थिइन् । केही पटक कंगनाको भाषा मर्यादाको तुलामा जोख्दा निकै अल्का र फिक्का बन्ने गरेका थिए । दिल्ली दंगापछि बहिनी रंगोलीको ट्वीटर ह्यान्डलबाट उनले दिल्लीलाई सिरिया बनाएको आरोप लगाइन् भने कांग्रेस, एनसीपी र शिवसेना सम्मिलित महाराष्ट्र सरकार, पाकिस्तान प्रशासित काश्मिरसम्मका मुद्दामा कंगनाले विवाद सिर्जना गरिन् । जसमा भाजपा खुलेरै कंगनाको साथमा उत्रियो र वाई प्लस सुरक्षा दियो ।

बलिउडमा बेसाएको विवाद र राजनीतिक टिप्पणीमा प्रोमोदी फन्डाको जगमा कंगना राजनीतिमा हाम फालेकी छन् । उनलाई राजनीतिमा पनि विवादले छाड्ने संकेत देखिएको छैन । भाजपाको उम्मेदवार बनेलगत्तै कांग्रेस प्रवक्ता सुप्रिया श्रीनेतसँगको विवाद सतहमा आएको छ । सफलता र विवादले सधैँ घेरिँदै आएकी कंगना राजनीतिमा जम्न सक्छिन् वा फिल्मी कहानी दोहोर्‍याउँछिन्, त्यो भने हेर्न बाँकी छ ।

प्रकाशित मिति: मंगलबार, चैत १३, २०८० १६:२२