विश्वकप छनोट फुटबल : नेपालले बहराइनसँग खेल्दै

A+ A A-

फिफा विश्वकप तथा एएफसी एसियन कप छनोटअन्तर्गत दोस्रो चरणको आफ्नो चौथो खेलमा नेपालले आज बहराइनसँग प्रतिस्पर्धा गर्दै छ । बहराइनको राष्ट्रिय रङ्गशालामा हुने नेपाल र बहराइनबीचको खेल नेपाली समय अनुसार राति पौने १ बजेदेखि सुरु हुनेछ ।

विश्वकप छनोटको सम्भावनालाई कायमै राख्न नेपालसामु आजको खेल जित्नैपर्ने दबाब छ । आजको खेलमा नेपाल पराजित भएमा विश्वकप र एसिया छनोट खेल्नबाट बाहिरिनेछ ।

नेपाल पहिलो चरणको खेलमा लाओसलाई पराजित गर्दै प्रतियोगिताको दोस्रो चरणमा प्रवेश गरेको थियो । त्यस्तै, दोस्रो चरणको खेलमा नेपालले जित हासिल गर्न सकेको छैन । दोस्रो चरणअन्तर्गत नेपालले तीनवटै खेलमा पराजय भोगेको थियो । संयुक्त अरब इमिरेट्स (यूएई) मा भएको पहिलो खेलमा नेपाल यूएईसँग ४–० गोलअन्तरले पराजित भएको थियो ।

त्यसैगरी, घरेलु मैदानमा भएको यमनविरुद्धको दोस्रो खेलमा नेपाल २–० गोलअन्तरले पराजित भएको थियो । यही चैत ८ मा भएको दोस्रो चरणअन्तर्गतको तेस्रो खेलमा नेपाल बहराइनसँग ५–० गोलअन्तरले पराजित भएको थियो ।

दोस्रो चरणमा नेपाल समूह ‘एच’मा रहेको छ । नेपालको ससमूहमा बहराइन, यमन र संयुक्त अरब इरिमेट्स छन् । तीन खेलमा तीनवटैमा जित हासिल गर्दै यूएई नौ अङ्कका साथ अङ्क तालिकाको शीर्ष स्थानमा छ । त्यस्तै, समान तीन खेल खेलेको बहराइन दुई खेलमा जित हासिल गर्दै ६ अङ्कका साथ दोस्रो स्थानमा छ । त्यसैगरी, तीन खेलमा तीन अङ्क बटुल्दै यमन तेस्रो स्थानमा छ । समान तीन खेल नै खेलको नेपाल तीनै खेलमा हार व्यहोर्दै अङ्कविहीन छ ।

नेपाली टोलीमा गोलकिपर किरण चेम्जोङसहित विशाल सुनार र अभिषेक राई छन् । त्यसैगरी, डिफेन्डरमा अभिषेख लिम्बू, अनन्त तामाङ, छिरिङ लामा, अजय चौधरी, शनिस श्रेष्ठ, सौभाग्य राई र सुमित श्रेष्ठ छन् ।

त्यस्तै, मिडफिल्डरमा भरत खवास, विशाल बस्नेत, लाकेन लिम्बू, मणिकुमार लामा, मनिष डाँगी, रोहन कार्की र उत्सव राई छन् भने फरवार्डमा अञ्जन विष्ट, दिनेश हेन्जन, समिर तामाङ, सञ्जीव विष्ट, हिसुब थपलिया र जिलेस्पीजङ्ग कार्की छन् ।

प्रकाशित मिति: मंगलबार, चैत १३, २०८० १३:२०