सुहाङलाई साथमा राखेर ओलीले प्रचण्डलाई भने– उपनिर्वाचनमा वामपन्थी मिलेर जाऊँ

सुहाङलाई साथमा राखेर ओलीले प्रचण्डलाई भने– उपनिर्वाचनमा वामपन्थी मिलेर जाऊँ

A+ A A-

आइतबार बालुवाटारमा प्रधानमन्त्री र एमाले अध्यक्षबीच उपनिर्वाचनका बारेमा छलफल भएको छ । आइतबार साँझ दुई नेताबीच छलफल भएको बालुवाटार स्रोतले बतायाे ।

बालुवाटारमा भएको छलफलमा ओलीले इलाममा माओवादीको साथ खोजेको स्रोतले बताएको छ । उक्त स्रोतले भन्यो, ‘एमाले अध्यक्ष ओलीजी सुहाङलाई लिएर बालुवाटार आउनुभएको थियो । दुई नेताबीच छलफल हुँदा प्रधानमन्त्री प्रचण्डले पार्टीमा छलफल गरेर जानकारी गराउने भन्नुभएको छ । छलफल सकारात्मक भएको छ ।’

छलफलमा प्रधानमन्त्री प्रचण्डले मिलेर सहमतिमा नै अगाडि बढ्न तयार रहेको वचन ओलीलाई दिएको स्राेतकाे दाबी छ ।

प्रधानमन्त्री प्रचण्ड अहिले इलाममा एमालेलाई साथ दिएर बझाङमा माओवादीका लागि साथ माग्ने तयारीमा रहेको बालुवाटार स्रोत बताउँछ । स्रोतले भन्यो, ‘नयाँ गठबन्धन भएको छ । वामपन्थी गठबन्धन भएकाले एक ठाउँ एमालेलाई र अर्को ठाउँ माओवादीलाई दिएर सहमति अगाडि बढ्न सक्छ । प्रधानमन्त्री त्यसका लागि सकारात्मक हुनुहुन्छ ।’

अहिलेसम्म नेकपा माओवादी केन्द्रले इलाम २ र बझाङ प्रदेशसभा १‘१’का लागि उम्मेदवार कसलाई बनाउने भन्नेबारेमा अहिले पनि छलफल सुरु गरेको छैन ।

माओवादी केन्द्रले उपनिर्वाचनका लागि प्रदेश र जिल्लामा तयारी जारी राखेको छ । माओवादीको प्रदेश समितिले आफ्नो पार्टीको तर्फबाट उम्मेदवार उठाउने गरी आन्तरिक तयारी गरेको प्रदेश अध्यक्ष हर्क नेम्वाङ मेक्सोले बताए । उनले भने, ‘हामी इलाम २ मा माओवादीको तर्फबाट उम्मेदवार उठाउँछौँ । तीन जना साथीहरूको दाबी छ । यसबारेमा प्रधानमन्त्री तथा अध्यक्ष कमरेडलाई जानकारी गराएका छौँ । एक/दुई दिनमा निर्णय हुन्छ ।’

माओवादीले २०७९ सालकाे निर्वाचनमा कांग्रेससँग गठबन्धन गरेको थियो । अहिले साे गठबन्धनबाट नेपाली कांग्रेस बाहिरिएको छ ।

अहिले अरु पार्टींसँग छलफल नभए पनि माओवादीले इलाम २ मा आफ्नो उम्मेदवार उठाउने तयारी गरेको जिल्ला संयोजक विजय खम्बू बताउँछन् । उनले भने, ‘उपनिर्वाचन जनमत बुझ्ने अवसर पनि हो । माओवादीले आफ्नो जनमत बुझ्न र सकेसम्म विजयका लागि प्रयास गर्नेछ । माओवादीको उम्मेदवारलाई गठबन्धन घटक समाजवादी मोर्चाको साझा उम्मेदवार बनाउने पनि हुन सक्छ । यस्तो अवस्थामा हामी विजयी हुन्छौँ ।’

माओवादीले इलाममा आफ्नो उम्मेदवारलाई समाजवादी मोर्चाको साझा उम्मेदवार बनाउने पनि प्रयत्न गर्ने देखिन्छ । तर, अहिलेसम्म समाजवादी मोर्चाका कुनै पनि दलले यो विषयमा छलफल प्रस्ताव नगरेको नेकपा एकीकृत समाजवादीका प्रवक्ता जगन्नाथ खतिवडा बताउँछन् । उनले भने, ‘अहिलेसम्म समाजवादी मोर्चामा उपनिर्वाचनका बारेमा छलफल भएको जानकारी आएको छैन । उता सत्ता गठबन्धनबाट एमालेले उम्मेदवार घोषणा गरिसकेको छ । मोर्चामा छलफल भएको छैन । आज हामीले पनि उम्मेदवारका बारेमा छलफल गर्छौं ।’

माओवादीले केही दिनभित्रमा उम्मेदवारका विषयमा छलफल गरेर टुङ्गो लगाउने माओवादी उपाध्यक्ष तथा प्रवक्ता अग्नि सापकोटाले बताए । उनले भने, ‘हामीले उपनिर्वाचनका लागि छिट्टै उम्मेदवारबारे निर्णय गर्छौं । अहिले निर्णय भएको छैन ।’

माओवादीले सकेसम्म समाजवादी मोर्चाको साझा उम्मेदवारको रूपमा माओवादीका उम्मेदवारहरू बनाउने गरी छलफल गर्ने, नभए एकल उम्मेदवार उठाएर निर्वाचनमा जाने तयारी गरेको एक केन्द्रीय सदस्य बताउँछन् । ती केन्द्रीय सदस्यले भने, ‘निर्वाचनमा माओवादी एकल उम्मेदवार उठाएर भए पनि जान्छ । जनमत घटेको छ कि बढेको छ भन्ने पनि थाहा हुन्छ । सधैँ गठबन्धनले गर्दा अर्को पार्टीलाई भोट हाल्नुपरेको छ । एक्लै भए पनि उम्मेदवारी दिने हो ।’

इलामबाट माओवादीका तीन जना आकांक्षी छन् । केन्द्रीय सदस्य तथा इलाम जिल्ला इन्चार्ज धीरेन्द्र शर्मा, प्रदेश समिति सचिवालय सदस्य तथा जिल्ला सह–इन्चार्ज कान्छा लावती र प्रदेश समिति सदस्य ओम गुरुङ छन् । यी तीन जनाको नाम मंगलबार जिल्लाले प्रदेश समितिमा पठाउने र मंगलबार अथवा बुधबार प्रदेशले केन्द्रमा पठाउने तयारी गरेको छ ।

माओवादीले बझाङमा प्रदेशसभा १'१'का लागि पनि उम्मेदवारी तय गरेको छैन । यो क्षेत्रमा पनि १५ वैशाखमा उपनिर्वाचन हुँदै छ । यहाँ पनि माओवादीले एकल उम्मेदवारी दिएर निर्वाचनमा जाने तयारी गरेको माओवादी केन्द्रका सुदूरपश्चिम प्रदेश समिति सचिव जनक बुढाले बताए । उनले भने, ‘निर्वाचनमा माओवादीले आफ्नो उम्मेदवार उठाउँछ । भए समाजवादी मोर्चासँग गठबन्धन हुन्छ, नभए पनि माओवादी निर्वाचनमा एक्लै भए पनि लड्छ । एक/दुई दिनमा उम्मेदवारको बारेमा टुङ्गो लाग्छ ।’

माओवादीले उम्मेदवारी मंगलबारसम्म टुङ्ग्याउने तयारी गरेको छ । प्रदेश र जिल्लामा छलफल भइरहेको र भोलि उम्मेदवार टुङ्गो लगाउने प्रदेश समिति अध्यक्ष हरि चौधरीले बताए । उनले भने, ‘भोलि माओवादी केन्द्रले बझाङको उपनिर्वाचनका लागि उम्मेदवारको टुङ्गो लगाउँछ । माओवादी हुने भए गठबन्धन गर्छ, नहुने भए एक्लै चुनावमा होमिन्छ ।’

माओवादीबाट आकांक्षीमा केन्द्रीय सदस्य देवराज रेग्मी, मीनबहादुर कुँवर, प्रदेश समिति सचिव जनक बुढा र जिल्ला संयोजक टोपबहादुर खड्का छन् ।

माओवादीले अहिलेसम्म दुवै क्षेत्रबाट उम्मेदवारको नाम सिफारिस नगरे पनि एमालेले दुवै क्षेत्रबाट आफ्नो उम्मेदवारको नाम टुंग्याइसकेको छ । एमालेले इलामबाट सुहाङ नेम्वाङ र बझाङमा दमन भण्डारीलाई उम्मेदवार घोषणा गरेको छ ।

माओवादीले अहिले पनि सकेसम्म एमालेसँग मिलेर जाने तयारी गरेको देखिन्छ । त्यसमा ओलीले इलामका उम्मेदवार सुहाङलाई प्रधानमन्त्रीसँग भेटघाटमा सँगै राखेर सहयोग गर्न प्रस्ताव गरेका छन् । प्रचण्ड ओलीको प्रस्तावमा सकारात्मक रहेको बताइन्छ ।

यो उपनिर्वाचन दलहरूको आफ्नो जनमत बुझ्ने अवसर हो । नयाँ बनेको गठबन्धनका लागि पुन: मिलेर जाने अवसरको रूपमा पनि दलहरूले लिएका छन् । माओवादी–एमाले उपनिर्वाचनमा मिलेर गएमा गठबन्धनका अन्य दलहरू भने आआफ्नै तरिकामा उपनिर्वाचनमा भाग लिने तयारीमा छन् ।

प्रकाशित मिति: सोमबार, चैत १२, २०८० १७:२३