चिहानजस्तै बनिसकेको गाजा, अस्पतालमै कब्जापछि स्थिति झनै चिन्ताजनक

A+ A A-

१ सय ७० दिनअघि इजरायलमाथि हमासले गरेको आक्रमणको भारी मूल्य गाजावासी लाखौँ प्यालेस्टाइनीले चुकाइरहेका छन् । गाजास्थित घरबाट भागेर ज्यान जोगाएका केही प्यालेस्टाइनीलाई उद्धृत गर्दै समाचार संस्था अलजजिरा लेख्छ, ‘इजरायलले गाजालाई चिहानमा परिणत गरिदिएको छ ।’

प्यालेस्टाइनको स्वास्थ्य मन्त्रालय, प्यालेस्टाइन रेड क्रिसेन्ट सोसाइटी र इजरायली आर्मीको विवरणअनुसार युद्धमा अहिलेसम्म इजरायलतर्फ ११ सय ३९ जना मारिँदा गाजामा ३२ हजार २ सय २६ जना मारिइसकेका छन् ।

इजरायलको कब्जामा रहेको वेस्ट बैंकमा १ सय १६ बच्चासहित ४ सय ३७ जना मारिएका छन् । घाइते हुनेमा इजरायलतर्फ ८ हजार ७ सय ३०, प्लोस्टाइनतर्फ ७४ हजार ५ सय सय ८७ र वेस्ट बैंकमा ४ हजार ७ सय छन् ।

स्वीट्जरल्यान्डको जेनेभास्थित युरो–मेड ह्युमन राइट्स मनिटरका अनुसार गाजामा युद्ध सुरु भएयता इजरायली सेनाको आक्रमणबाट तीन विश्वविद्यालयका अध्यक्ष र ९५ विश्वविद्यालयका डिन र प्रोफेसर मारिएका छन् । कैयौँ पत्रकार, स्वास्थ्यकर्मीहरू मारिएका छन् ।

अन्तर्राष्ट्रिय मिडियाका अनुसार, जारी आक्रमण हेर्दा इजरायल गाजालाई मान्छे बस्न नमिल्ने गरी बिगार्न चाहन्छ । गाजा मात्र होइन, आफ्नो कब्जामा रहेको वेस्ट बैंकमा समेत इजरायली सेनाको ज्यादतिबारे खबर आइरहेका छन् । आक्रमणको विरोधमा प्रदर्शन गर्दा बालबालिकासहित दर्जनौँ मान्छेलाई इजरायली सेनाले गोली हानिसकेको छ ।

केही दिनयता इजरायली सेनाले गाजामा रहेका अस्पतालहरूसमेत कब्जा गरिरहेको वाफा न्युज एजेन्सीले जनाएको छ । अल सिफा अस्पतालमा जारी इजरायली घेराबन्दीपछि भागेका प्यालेस्टाइनीहरूको भनाइमा, इजरायली ट्यांक र बख्तरबन्द बुलडोजरले कम्तीमा चार शव र एम्बुलेन्सलाई कुल्चेको छ । इजरायली सेनाले दक्षिणी गाजास्थित खान युनिसमा रहेको अल–अमल र नासिर अस्पताललाई पनि नियन्त्रणमा लिएको छ ।

नासिर र अल–अमल अस्पताल पछिल्लो २४ घण्टादेखि पूर्णतः इजरायली घेराबन्दीमा छ । खान युनिसबाट भागेका एक प्यालेस्टाइनी युवाले अल जजिरासित भनेका छन्, ‘इजरायली आर्मीको ट्याङ्क र बख्तरबन्द गाडी अस्पतालमा शव र एम्बुलेन्सलाई कुल्चिँदै अघि बढेका छन् ।’

विस्थापित २२ हजार मानिस अल–सिफा अस्पतालको छेउछाउ शरण लिएर बसेका छन् । अन्तको तुलनामा अस्पतालमा सुरक्षित महसुस उनीहरूले गरेका छन् ।

अल–सिफा अस्पतालबाट हमासका ५ सय लडाकुलाई गिरफ्तार गरिएको इजरायली सेनाले दाबी गरेको छ । अस्पताल कब्जापछि कम्तीमा २० लडाकुलाई मारिएको सेनाले जनाएको छ ।

अस्पतालमा हमास र इजरायली सेनाको बम हानाहानमा ठूलो संख्यामा सर्वसाधारण मारिएका छन् भने गम्भीर बिरामीहरू अस्पतालमै फसेका छन् ।

‘राति साढे २ बजेदेखि हामीमाथि इजरायली युद्धक विमानले बम हानिरहेको छ । नासिर अस्पतालनजिक पूरै क्षेत्र यसरी हल्लिरहेको थियो कि मानौँ भूकम्प नै आएको छ’, घरबाट विस्थापित भएका एक युवकले अल जजिरामा भनेका छन्, ‘इजरायली सेनाले हामी रहेको घेराबन्दी गर्ने भएपछि हामी ज्यान जोगाएर भाग्यौँ । अरु थुप्रै त्यहाँ फसेका छन् ।’

इजरायलले घरमा बम हानिरहेकाले हजारौँ मान्छे घर छोडेर सुरक्षित ठाउँ खोज्दै भागिरहेका छन् । तीमध्ये कतिपय अस्पताल परिसरमा शरण लिन पुगेका छन् । अस्पतालसमेत इजरायलले कब्जा गरेपछि गाजाको अवस्था थप भयावह बनेको छ ।

हमासलाई सिध्याउने कसम खाएका इजरायली प्रधानमन्त्री बेन्जामिन नेतान्याहुको निर्देशनमा बहुसंख्यक प्यालेस्टाइनीका लागि बस्नलायक नरहने गरी गाजामाथि आक्रमण भइरहेको छ ।

इजरायली सेनाले सडकमा हिँडिरहेका मान्छेमाथि समेत गोली चलाइरहेको अल जजिराको समाचारमा उल्लेख छ । सडकमा कैयौँ लासहरू देखिन्छन् । नासिर र जोर्डनका अस्पताल दुवैलाई इजरायली ट्याङ्कहरूले घेरेका छन् । अस्पतालबाट चिकित्सक र कर्मचारीलाई गिरफ्तार गरिएको छ ।

उत्तरी गाजामा खाद्य राहत लग्न पनि इजरायलले दिएको छैन । पछिल्लो २४ घण्टामा गाजामा इजरायली हवाई आक्रमणबाट दर्जनौँ प्यालेस्टाइनी मारिएका छन् । डेर अल–बलाहमा एक घरमा बम आक्रमण हुँदा १८ मानिस मारिए ।

दक्षिणी गाजाको राफामा पाँच घरलाई निशाना बनाएर इजरायलले हानेको बममा महिला, बच्चासहति २७ भन्दा बढी मारिएका छन् । फ्रान्सका राष्ट्रपति इमानुएल म्याक्रोँले इजरायली प्रधानमन्त्री नेतान्याहुलाई फोन गरेर भनेका छन्, ‘राफाबाट मानिसहरूलाई कुनै पनि जबर्जस्ती स्थानान्तरण युद्ध अपराध हुनेछ ।’

कब्जामा रहेको वेस्ट बैंकको बिट फ्युरिक शहरमा इजरायली सेनाले १४ र १६ वर्षका दुई प्यालेस्टाइनी बालकलाई गोली हानेर मारेको छ ।

इजरायलका प्रधानमन्त्री बेन्जामिन नेतान्याहुले हमासका नेता याह्या सिनवारको पनि हत्या गर्ने बताएका छन् । गाजामा मानिसहरू गोलीबाट बच्दै खान र बस्नका लागि अन्तिम सास गनिरहेका छन् । इजरायलले भने हमासका कारण नै सर्वसाधारण मारिइरहेको दाबी गरेको छ । अस्पतालभित्र छिरेर हमासले नागरिकलाई मोहरा बनाएको उसले जिकिर गरेको छ ।

शुक्रबार अमेरिकासमर्थित मस्यौदा अस्वीकृत भएपछि संयुक्त राष्ट्रसंघ सुरक्षा परिषद्‌मा सोमबार अर्को नयाँ युद्धिविराम प्रस्तावमा मतदान हुँदै छ । जर्मनीकी विदेशमन्त्री एनालेना बेयरबक गाजा संकट वार्ताको एक अर्को भ्रमणका लागि विदेशमन्त्री समेह शौकरीसँग भेट्न आज इजिप्ट जाँदै छिन् । यसपछि उनी इजरायल र प्यालेस्टाइनको भ्रमणमा पनि जानेछिन् । ७ अक्टुबरपछि यो उनको छैटौँ यात्रा हो ।

हमासका राजनीतिक विभाग अधिकारी बासेम नइमले दोहामा जारी युद्धविराम वार्ताबारे मिडियामा धेरै गलत सूचनाहरू प्रसारित गरिएको बताएका छन् । उनका अनुसार, इजरायली पक्ष बन्दीको रिहाइबाहेक अन्य विषयमा गम्भीर छैन । हमासले तीन माग अघि सारेको छ, युद्धको स्थायी अन्त्य, गाजाबाट इजरायली सेना पूर्ण फिर्ता र विस्थापित मानिसको पुनर्स्थापना ।

७ अक्टुबरमा हमासका लडाकुले जमिन, आकाश र जलमार्फत इजरायल छिरेर आक्रमण थालेपछि इजरायलले हमास सिध्याउने कसम खाँदै युद्धको घोषणा गरेको थियो । दुवैतर्फ गरी ३०औँ हजार मानिस मारिइसकेका छन् । कतारको मध्यस्थतामा युद्धविराम भए पनि त्यो सकिएलगत्तै फेरि हानाहान भइरहेको छ । हमासले पनि सकेसम्म इजरायलतर्फ रकेटहरू हानिरहेको छ । इजरायल हमासलाई जरैबाट सखाप पार्ने संकल्पका साथ मैदानमा छ । सन् २००७ देखि हमास गाजाको सत्तामा छ ।

प्रकाशित मिति: सोमबार, चैत १२, २०८० १६:४२