संवैधानिक परिषद्को बैठक भोलि, ११ महिनादेखि रिक्त महालेखापरीक्षक नियुक्तिको सिफारिस होला ?

संवैधानिक परिषद्को बैठक भोलि, ११ महिनादेखि रिक्त महालेखापरीक्षक नियुक्तिको सिफारिस होला ?

A+ A A-

प्रधानमन्त्री पुष्पकमल दाहाल 'प्रचण्ड'ले संवैधानिक परिषद्को बैठक बोलाएका छन् । उनले सोमबार बस्ने गरी बैठक बोलाएका हुन् ।

नयाँ सत्ता समीकरण बनेपछि प्रचण्डले बोलाएको बैठकमा संवैधानिक पदमा रिक्त रहेका पदहरूमा पदपूर्ति हुने सम्भावना छ । त्यसमा पनि महालेखापरीक्षकको नियुक्तिको विषयमा छलफल हुनेछ ।

संवैधानिक परिषद्ले नियुक्त गर्ने संवैधानिक पदहरूमा पदाधिकारीहरू रिक्त छन् । गत १८ साउनको बैठकले महालेखापरीक्षक, निर्वाचन आयुक्त, प्राकृतिक स्रोत तथा वित्त आयोगको सदस्य र मुस्लिम आयोगको सदस्यका लागि इच्छुकहरूको आवदेन गर्नुपर्ने व्यवस्थाका लागि प्रक्रिया सुरु गर्ने निर्णय गरेको थियो ।

७ जेठ २०८० मा महालेखापरीक्षक टंकमणि शर्माको पदावधि सकिएपछि महालेखापरीक्षकको कार्यालय नेतृत्वविहीन छ । राजनीतिक दलहरूबीच संवैधानिक नियुक्तिमा सहमति नजुटेका कारण महालेखापरीक्षक नियुक्ति हुन नसकेको हो ।

एमाले अध्यक्ष केपी ओलीले संवैधानिक नियुक्ति प्याकेजमा गर्ने अडान राखेपछि गत साउनको संवैधानिक परिषद् बैठकमा सहमति जुटेको थिएन । अहिले एमाले सत्तापक्ष भएपछि परिषद् बैठकमा उनको उपस्थिति रहने छैन ।

प्रधानमन्त्री अध्यक्ष हुने संवैधानिक परिषदमा सभामुख, राष्ट्रियसभाका अध्यक्ष, प्रधानन्यायाधीश र प्रमुख प्रतिपक्षी दलका नेता रहन्छन् । प्रमुख प्रतिपक्षी दलको नेताको रुपमा अब कांग्रेस सभापति शेरबहादुर देउवा परिषद् बैठकमा उपस्थित हुनेछन् ।

प्रकाशित मिति: आइतबार, चैत ११, २०८० १३:४७