एमाले र माओवादीबीच लुम्बिनी र कर्णाली हेरफेर हुने संकेत, कँडेल बन्लान् कर्णालीको मुख्यमन्त्री ?

एमाले र माओवादीबीच लुम्बिनी र कर्णाली हेरफेर हुने संकेत, कँडेल बन्लान् कर्णालीको मुख्यमन्त्री ?

A+ A A-

एमाले र माओवादीसहितको नयाँ गठबन्धनका लागि प्रदेशको मुख्यमन्त्री बाँडफाँट र सरकार बनाउन निकै सकस देखिएको छ । मुख्यमन्त्रीलाई विश्वासको मत पाउन र नयाँ समीकरण बनाउनका लागि एमाले र माओवादीलाई समस्या भइरहेको बेला प्रदेशको मुख्यमन्त्री बाँडफाँट पनि मिलेको छैन ।

माओवादीले लामो समयदेखि नेतृत्व गरेको कर्णाली प्रदेशको मुख्यमन्त्री भने यपपटक एमालेको भागमा पार्ने गरी छलफल अघि बढेको छ । माओवादीले झण्डै ५ वर्ष कर्णाली प्रदेश सरकारको नेतृत्व गरेको छ । अघिल्लो प्रदेशसभामा एमालेले बहुमत सदस्य आफ्नो हुँदा पनि सरकार बनाउन पाएको थिएन । त्यसै कारण अहिले सरकारको नेतृत्वमा दाबी गरिरहेको छ ।

केन्द्रीय तहमा चरणबद्ध छलफल भए पनि टुंगो भने लागेको छैन । तर, एमाले स्रोतका अनुसार कर्णालीको प्रदेश सरकारमा यसपटक एमालेले अडान राख्ने गरी छलफल भइरहेको छ । माओवादीले लामो समय शासन गरेका कारण अबको सरकार हेरफेरमा एमालेले दाबी गर्ने नेताहरूको भनाइ छ । एमालेले भाग पाएमा भने मुख्यमन्त्री यामलाल कँडेल हुनेछन् । उनी २०७४ देखि निरन्तर मुख्यमन्त्रीको दाबीमा रहेका छन् । २०७४ यता मात्रै करिब पाँचपटक उनले प्रयास गरेका थिए । ती सबै प्रयास असफल भएपछि २०७९ मंसिरको चुनावपछि बनेको एमाले र माओवादीको गठबन्धनका समयमा पनि कँडेलले मुख्यमन्त्रीका लागि दाबी गरेका थिए ।

कर्णालीका एमाले नेताहरूको टोली नै आएर कँडेलको पक्षमा अध्यक्ष केपी ओली निवासमा डेलिगेसन गएका थिए । तर, एमाले र माओवादीबीच भागवण्डा हुँदा कर्णाली फेरि पनि माओवादीको भागमा परेको थियो । त्यसले गर्दा अर्कोपटक पनि कँडेलको प्रयास असफल भएको थियो । यद्यपि, पछिल्ला दिनमा एमाले अध्यक्ष केपी ओलीसँग नै प्रतिस्पर्धा गर्ने शैलीमा पार्टीको नेतृत्वको निर्देशन र संकेतविपरीत निर्णय गर्ने र प्रदेश कमिटी चलाइरहेका छन् । त्यसले गर्दा अध्यक्ष ओली भने कँडेलसँग रुष्ट छन् । त्यसैले पनि कतिपयले भने एमाले र माओवादीभित्र मुख्यमन्त्रीमा भागवण्डा हुँदा कर्णाली माओवादीकै भागमा पर्ने अनुमान गरिरहेका छन् । तर, एमालेभित्र योपटक मुख्यमन्त्री लिनुपर्ने मत पनि उठिरहेको छ । महासचिव शंकर पोखरेलले सार्वजनिक रूपमा पनि सोही कुरा दोहोर्‍याएका छन् । त्यसैले, अहिले कँडेलको सम्भावना रहेको बताइन्छ ।

त्यसो त अहिलेका मुख्यमन्त्री राजकुमार शर्माले कर्णालीमा खासै काम गर्न नसकेको भन्दै आलोचना भइरहेको छ । अघिल्लोपटकको चार वर्ष र अहिलेको एक वर्ष गरेर झण्डै ५ बर्ष माओवादीले कर्णाली प्रदेशको सरकार चलाएको छ । माओवादीको प्रभाव क्षेत्र भएकै कारण उसले मुख्यमन्त्रीमा दाबी गर्ने गरेको भए पनि नतिजा भने गतिलो दिन नसकेको भन्दै आलोचना भइरहेको हुन्छ ।

एकातिर मुख्यमन्त्री शर्माको कार्यक्षमतामा प्रश्न उठिरहेको बेलामा प्रचण्डले कर्णालीकै नेता जनार्दन शर्मालाई साइजमा राख्ने रणनीति पनि लिएका छन् । शर्माको साथ पाएर मुख्यमन्त्री भएका राजकुमार शर्माको सट्टा एमालेलाई दिने हो भने जनार्दन शर्मालाई दबाबमा राख्ने रणनीति प्रचण्डले लिन सक्ने चर्चा पनि माओवादीभित्र छ । त्यस्तो अवस्थामा भने अर्का नेता वर्षमान पुन हावी हुन सक्छन् । पुनको इच्छाअनुसार लुम्बिनी प्रदेश सरकारको नेतृत्व माओवादीले लिने र कर्णाली एमालेलाई दिने सहमति हुन सक्ने बताइन्छ ।

कर्णालीका एमाले नेताहरूले कर्णाली प्रदेश सरकारको नेतृत्व आफूहरूको हुने र लुम्बिनीका माओवादीले प्रदेश सरकार आफूहरूको नेतृत्वमा हुने बताउनुले पनि उक्त संकेत गरेको बताइएको छ ।

प्रकाशित मिति: आइतबार, चैत ११, २०८० १३:०७