बाबुराम भन्छन्– ठूला माछालाई तह लगाउने स्वायत्त जनलोकपाल बनाऔँ

A+ A A-

डा. बाबुराम भट्टराईले बाबुराम एक्लियो भनी चिन्ता नलिन आग्रह गर्दै प्रत्यक्ष निर्वाचित कार्यकारीको वकालत गरेका छन् । सामाजिक सञ्जालमा उनले चिन्ता र बहस गर्नुपर्ने भन्दै तीनवटा विषय उल्लेख गरेका छन् ।

उनले भनेका छन्, ‘बर्षमा तीन चोटी गठबन्धन र सरकार परिवर्तन हुने र उनै भिजनविहीन, गफाष्टक,आत्मकेन्द्रित, विवादास्पद मान्छेबीच कुर्सी साटासाट भैरहने हो भने भिजिनरी नेतृत्वसहितको राजनीतिक स्थिरता कसरी हासिल हुन्छ ? लोकतान्त्रिक स्थिरता विना देश कसरी सुशासित र समृद्ध हुन्छ ? यस निम्ती छिटो संविधान संशोधन गरेर प्रत्यक्ष निर्वाचित कार्यकारी र पूर्ण समानुपातिक ढाँचामा प्रत्यक्ष निर्वाचित व्यवस्थापिका प्रणालीमा किन नजाने ?’

उनले भ्रष्टाचार नियन्त्रणका लागि बलियो स्वायत्त जनलोकपालजस्तो संयन्त्र बनाउनुपर्ने बताएका छन् । उनले भनेका छन्, ‘पालैपालो सबै प्रमुख दल र नेताको नेतृत्व रहेका सरकारहरू अरबौं अर्बका भ्रष्टाचार काण्डहरूमा मुछिएको जगजाहेर भैसक्दा उनीहरूले नै अहिले भएकै शक्तिविहीन संस्थाहरू मार्फत् भ्रष्टाचारीलाई कार्वाही गर्छन् र देशमा सुशासन कायम हुन्छ भनेर आशा गर्नु नीतिकथाको स्यालले ‘झर्ला र खाउँला’ भनेजस्तै हुन्न र ? अधिकारसम्पन्न र स्वायत्त जनलोकपाल वा यस्तै वैकल्पिक संयन्त्र निर्माण गरेर ‘ठूला माछा’ लाई समेत तह लगाउने र देशमा कडाइपूर्क विधिको शासन कायम गर्ने दिशामा किन नजाने ?’

उनले वर्तमान नेतृत्वबाट आर्थिक प्रगति नहुने पनि बताएका छन् । उनले भनेका छन, ‘दशकौंदेखि ३–४ प्रतिशतभन्दा माथि आर्थिक बृद्धिदर हासिल नभएको, देश श्रम निर्यात र वस्तु आयातको दुष्चक्रमा फसेको,व्यापार घाटा र वैदेशिक ऋण बर्सेनि चुलिदै गएको, पहिले उद्योग र पछि कृषि क्षेत्र पूरै धरासायी हुॅदै गएको, शिक्षा र स्वास्थ्य क्षेत्रको सुधारको कुरा छेपारोको कथामा सीमित भैरहेको आदि गम्भीर अर्थ(राजनीतिक संरचनात्मक समस्या हल नगरी देश कसरी समृद्ध बन्छ ? यिनै भिजनविहीन, निष्ठारहित मान्छेहरूबाट यी कुरा सम्भव होलान् ?

प्रकाशित मिति: शनिबार, चैत १०, २०८० २१:४५