नेपाल लाइफद्वारा जीवन बीमाका समसामयिक विषयउपर छलफल गर्न विशेष अन्तर्क्रिया कार्यक्रम आयोजना

नेपाल लाइफद्वारा जीवन बीमाका समसामयिक विषयउपर छलफल गर्न विशेष अन्तर्क्रिया कार्यक्रम आयोजना

A+ A A-

नेपाल लाइफ इन्स्योरेन्सले जीवन बीमाका समसामयिक विषयउपर छलफल गर्ने अभिप्रायले काठमाडौंमा विशेष अन्तर्क्रिया कार्यक्रम सम्पन्न गरेको छ ।

कम्पनीले विश्वमै चर्चित तथा सबैभन्दा ठूलो स्वतन्त्र एक्चुरियल र परामर्शदाता संस्था मिलिम्यान समूहका पार्टनर तथा यस कम्पनीका एक्चुअरी फिलिप ज्याक्सनको उपस्थितिमा उक्त अन्तर्क्रिया कार्यक्रम आयोजना गरेको जानकारी दिएको छ ।

नेपाल बीमा प्राधिकरणका अध्यक्ष सूर्यप्रसाद सिलवालको प्रमुख आथित्यतामा सम्पन्न उक्त विशेष कार्यक्रममा नेपाल बीमा प्राधिकरणका उच्चपदस्थ कर्मचारीहरू, जीवन बीमा कम्पनीका प्रमुख कार्यकारी अधिकृतहरू तथा नेपाल लाइफ इन्स्योरेन्सका उच्चपदस्थ कर्मचारीहरूको उपस्थिति थियो ।

कार्यक्रममा नेपाल लाइफ इन्स्योरेन्सका प्रमुख कार्यकारी अधिकृत प्रवीणरमण पराजुलीले नेपालको बीमा क्षेत्रमा रहेका समसामयिक चुनौती र अवसरहरूका बारेमा चर्चा गर्ने अभिप्रायले उक्त कार्यक्रम आयोजना गरिएको बताए । उनले भने, 'यस किसिमको विचार मन्थन गर्ने परिपाटीको विकासले नेपाली बीमा बजारमा क्रियाशील रहेकाहरूलाई अन्तर्राष्ट्रियस्तरमा भइरहेका विकासक्रम तथा असल अभ्यासहरूसँग चिरपरिचित हुन सहज हुनुका साथै नलेज शेयरिङ पनि हुनेमा हामी विश्वस्त छौँ ।'

नेपाल बीमा प्राधिकरणका अध्यक्ष सूर्यप्रसाद सिलवालले अहिलेको बदलिँदो परिवेशमा बीमा बजारको सुधारका निम्ति नियामकको रूपमा विभिन्न पहलकदमीहरू चालिरहेको बताए । उनले संसारमा भइरहेका अभ्यासहरूको जानकारी सोही क्षेत्रमा प्रत्यक्ष रूपमा काम गरिरहेका फिलिप ज्याक्सनसँग अनुभव साटासाट गर्न पाउँदा मन प्रफुल्लित भएको बताए । उनले बीमा बजारको विकासका निम्ति नवीनतम प्रविधिको अधिकतम प्रयोग गर्दै विभिन्न सुधारात्मक कार्यहरू हुँदै आएको र सोको निरन्तरता हुने प्रतिबद्धता व्यक्त गरे ।

मिलिम्यान समूहका पार्टनर तथा नेपाल लाइफ इन्स्योरेन्सका एक्चुअरी फिलिप ज्याक्सनले नेपालको बीमा क्षेत्रका अवसर, समस्या र चुनौतीका बारेमा बृहत् प्रस्तुतीकरण दिए । नेपाली जीवन बीमा कम्पनीहरूलाई अहिलेको निर्देशनले भ्यालुएसनमा पारेको प्रभाव, त्यसका सीमाहरू र फ्युचर बोनस प्रोभिजनिङ तथा त्यसका आयामहरूका बारेमा समेत उनले प्रकाश पारे ।

त्यसैगरी, ज्याक्सनले नेपालमा कार्यान्वयन गर्न लागिएको रिस्क बेस्ड क्यापिटलका बारेमा पनि आफ्नो विचार राखे । अरु मुलुकमा यसको कार्यान्वयनमा रहेको सहजता र जटिलताका बारेमा प्रकाश पार्दै नेपालमा सहज तरिकाले यसलाई कार्यान्वयन गर्न के कस्तो रणनीति अवलम्बन गर्न सकिन्छ भन्ने विषयमा पनि उनले सारगर्भित सल्लाहहरु दिए । अहिलेको नीति नियममा रहेका केही कमी कमजोरीहरूलाई औँल्याउँदै यसलाई अन्तर्राष्ट्रिय अभ्यासहरूसँग दाँजेर कसरी अगाडि बढ्न सकिन्छ भन्ने बारेमा सल्लाह सुझाव पनि उनले दिए ।

कार्यक्रममा नेपाल बीमा प्राधिकरणका उच्चपदस्थ अधिकारीहरू र बीमा कम्पनीका प्रमुख कार्यकारी अधिकृतहरूबाट आएका जिज्ञासाहरूको जवाफ पनि ज्याक्सनले दिएका थिए ।

प्रकाशित मिति: शुक्रबार, चैत ९, २०८० १७:५५