माछापुच्छ्रे बैंकद्वारा सुदूरपश्चिमको शैलेश्वरी उच्च माध्यमिक विद्यालयमा आठवटा शौचालय निर्माण

माछापुच्छ्रे बैंकद्वारा सुदूरपश्चिमको शैलेश्वरी उच्च माध्यमिक विद्यालयमा आठवटा शौचालय निर्माण

A+ A A-

माछापुच्छ्रे बैंकले आफ्नो संस्थागत सामाजिक उत्तरदायित्वअन्तर्गत सुदूरपश्चिम प्रदेशको एक विद्यालयमा आठपटा शौचालय निर्माण गरेको छ ।

बैंकले सुदूरपश्चिम प्रदेशको कैलाली जिल्ला, गोदावरी नगरपालिका– ६, बडेहाँस्थित श्री शैलेश्वरी उच्च माध्यमिक विद्यालय परिसरमा सो परिमाणको शौचालय निर्माण गरी हस्तान्तरण गरेको हो ।

निर्माण सम्पन्न गरिएका ती शौचालय हिजो बिहीबार एक औपचारिक कार्यक्रमका बीच विद्यालय व्यवस्थापन समिति एवं विद्यालय प्रशासनलाई हस्तातरण गरिएको बैंकले जनाएको छ ।

शौचालय हस्तान्तरण कार्यक्रममा गोदावरीनगरपालिका– ६ का वडा अध्यक्ष जहरु साउदले माछापुच्छ्रे बैंकले कैलाली जिल्लाको सरकारी स्कुललाई शौचालय निर्माण गरी सहयोग गरेकोमा धन्यवाद दिए ।

कार्यक्रममा माछापुच्छ्रे बैंकका महाप्रबन्धक प्रसिद्धराज अर्यालले सो विद्यालयमा अति आवश्यक पर्ने शौचालयको असुविधाका कारण पठनपाठनमा समेत समस्या भइरहेको जानकारी पाएपश्चात् बैंकले उक्त विद्यालयको अवस्था अवलोकन गरी शौचालय निर्माण गरी हस्तान्तरण गरिएको बताए ।

विद्यालय व्यवस्थपन समितिका अध्यक्ष खगराज पाठकले माछापुच्छ्रे बैंकले आफ्नो विद्यालयप्रति गरेको सामाजिक कार्यको सराहना गर्दै यस्ता सहयोगले विद्यालय संचालनका लागि उत्प्रेरणा मिल्ने बताए ।

Maxa puchhre Bank- 21711107928.jpg

विद्यालय व्यवस्थपन समितिका अध्यक्ष पाठकका अनुसार १८०० भन्दा बढी विद्यार्थी र ३५ जना शिक्षक/कर्मचारी कार्यरत श्री शैलेश्वरी उच्च माध्यमिक विद्यालयमा भएको अस्थायी शौचालयको अवस्था निकै नै खराब थियो । यस विद्यालयका विद्यार्थी एवं शिक्षकहरूले भोगिरहेको समस्यालाई मध्यनजर गरी बैंकले विद्यालय परिसरमा आठवटा शौचालय तथा सेफ्टी ट्याङ्कीको निर्माण गरेको हो ।

बैंकका अनुसार निर्माण गरिएका ८ वटा शौचालयहरूमध्ये दुईवटा विद्यालयका कर्मचारी, तीनवटा महिला तथा तीनवटा पुरुष विद्यार्थीले प्रयोग गर्नेछन् ।

बैंकले आफ्नो संस्थागत सामाजिक उत्तरदायित्वअन्तर्गत देशका विभिन्न स्थानहरूमा विभिन्न संघसंस्थाहरूसँग मिलेर स्वास्थ्य, शिक्षा, पूर्वाधार निर्माण, वित्तीय साक्षरता, दिगो विकासलगायतका क्षेत्रहरूमा काम गर्दै आएको छ ।

प्रकाशित मिति: शुक्रबार, चैत ९, २०८० १८:१०