धाेनीले अचानक किन छाेडे चेन्नई सुपर किंग्सकाे कप्तानी ?

A+ A A-

भारतीय क्रिकेट टोलीका कप्तान रहिसकेका महेन्द्र सिंह धोनीले बिहीबार आफ्नो परिचित शैलीमा चेन्नई सुपर किंग्स (सीएसके) को टोली व्यवस्थापनलाई आफूले टोलीको कप्तानी छोडेको जानकारी दिए । यसअघि उनले आफ्ना अन्य सहकर्मीसँग ब्रेकफास्ट टेबलमा यस विषयमा छलफल गरेका थिए ।

भारतीय अखबार द इन्डियन एक्सप्रेसमा प्रकाशित समाचारअनुसार धोनीले सीएसके व्यवस्थापन टोलीलाई आफ्नो निर्णयबारे जानकारी दिँदै ऋतुराज गायकवाडलाई कप्तान बनाउने फैसला सुनाए । गायकवाडलाई कप्तानकाे भूमिकाका लागि केही समयदेखि तयार पारिँदै थियाे ।

सीएसकेका मुख्य कार्यकारी अधिकारी काशी विश्वनाशनले यसअघि नै ऋतुराजलाई कप्तानका लागि दुई वर्षदेखि तयार पारिन थालिएकाे बताएका थिए । पछिल्लाे निर्णय अकस्मात्‌को हो, तर सन् २०२२ मा रविन्द्र जडेजा कप्तान हुँदाको तुलनामा अहिले टोली राम्रो अवस्थामा रहेको अखबारले लेखेको छ ।

त्यतिबेला कप्तानी छाेड्ने धोनीको निर्णयले सीएसकेलाई ठूलो झट्का लागेको थियो । तर, यसपटक कोच स्टिफन फ्लेमिङले टोली राम्रो स्थितिमा रहेको बताएका छन् । फ्लेमिङले भने, 'ठूलो कुरा के हो भने, केही वर्षअघि हामी धोनीले कप्तानी छोड्नका लागि पूर्ण रूपमा तयार थिएनौँ, त्यसबेला टोलीको नेतृत्व डगमगाएको थियो । तर, अहिले हामीले पुरानाे गल्ती नदोहोर्‍याउन सक्दो प्रयास गरेका छौँ ।'

अन्तर्राष्ट्रिय खेलाडीको सूचीसहितको यो टोलीको कप्तानी ऋतुराज गायकवाडलाई दिनु टोलीको सिद्धान्तबमोजिम हो । उनी शान्त स्वभावका छन् र अत्यन्तै तनावपूर्ण परिस्थितिहरू ह्यान्डल गर्ने तरिकाका लागि उनकाे प्रशंसा गरिन्छ ।

धोनी आफैँले पारेका थिए तयार

२७ वर्षीय गायकवाड २०१९ मा सीएसकेमा अनुबन्ध भएका थिए । त्यतिबेला उनको आधार मूल्य २० लाख भारु थियो । त्यसयता उनको ग्राफ बढ्दै गएको छ । उनले २०२२ मा ओरेन्ज क्याप पाएका थिए र सीएसकेले ६ करोडमा राखेका केही खेलाडीहरूमध्ये थिए । अहिले उनी सबैभन्दा सस्ता कप्तान भएका छन् ।

द इन्डियन एक्सप्रेसले लेखेको छ कि गायकवाडलाई धोनीपछि कप्तानी आफ्नो हातमा हुनेछ भन्ने थाहा थियो तर अर्को सिजनअगाडि यो समय आउँदैन भन्ने लागेकाे थियाे । खासमा धोनी आफैँ खेलाडी हुँदा गायकवाडलाई यो भूमिकाका लागि तयार गर्न चाहन्थे ।

विश्वनाथले अखबारलाई भने, 'मुख्य प्रशिक्षकसँग कुरा गरेपछि उनले हामीलाई बिहान आफ्नो निर्णयको बारेमा जानकारी गराए । धाेनीले जुन निर्णय गरेका छन् त्याे सीएसकेको लागि सही हुनेछ ।'

प्रकाशित मिति: शुक्रबार, चैत ९, २०८० १७:२७