बागमती प्रदेशका जिल्लामा माओवादी इन्चार्जहरू परिवर्तनपछि चर्को असन्तुष्टि

बागमती प्रदेशका जिल्लामा माओवादी इन्चार्जहरू परिवर्तनपछि चर्को असन्तुष्टि

A+ A A-

नेकपा माओवादी केन्द्रले बागमती प्रदेशका सबै जिल्लाका इन्चार्ज हेरफेर गरेको छ । माओवादीको बागमती प्रदेशमा जिल्ला र महानगरपालिकामा इन्चार्ज हेरफेर भएका छन् । जसमा रसुवा कल्पना शर्मा, धादिङ पुष्पविक्रम मल्ल, चितवन घनश्याम दाहाल, मकवानपुर विजय गौतम, सिन्धुली बुद्धिमान माझी, रामेछाप श्यामकुमार श्रेष्ठ, दोलखा विशाल खड्का, काभ्रेपलाञ्चोक तेजबहादुर मिजार, सिन्धुपाल्चोक केशव नेपाल, नुवाकोट हीरानाथ खतिवडा, काठमाडौंं सूर्य सुवेदी पथिक, ललितपुर हरि दाहाल, भक्तपुर दीलिप प्रजापति, काठमाडौं महानगर मुक्तिनारायण प्रधान, ललितपुर महानगर राजकाजी महर्जन, हेटौँडा उपमहानगर प्रल्हाद लामिछाने रहेका छन् । केहीलाई जिल्ला इन्चार्जबाट महानगर इन्चार्जमा पठाइएको छ । कोही पहिलोपटक जिल्ला इन्चार्ज बनेका छन् ।

इन्चार्जको हेरफेर भएपछि बागमती प्रदेशमा असन्तुष्टि बढेको छ । माओवादीले देशभर पहिलादेखि नै पार्टी काममा खट्ने र अभियानमा खट्नेहरूको कार्यक्षमता मूल्याङ्कन गरेको छ । जुन सबै प्रदेशले केन्द्रमा पठाएका छन् । बागमती प्रदेशमा पनि सबैभन्दा बढी खट्ने नेताहरूको कार्यक्षमता मूल्याङ्कन गरेर केन्द्रमा बुझाइएको छ । पार्टीले मूल्याङ्कन प्रतिवेदन बाहिर ल्याएको छैन । तर, बागमती प्रदेश संयोजन समितिले प्रदेशका सबै जिल्लाका इन्चार्ज हेरेफेर गरेपछि काम गर्नेको मूल्याङ्कन नभएको बागमती प्रदेशका एक केन्द्रीय सदस्यले बताए । ती केन्द्रीय सदस्यले भने, ‘कार्यक्षमताको मूल्याङ्कन गरेको छ । नम्बर पनि दिएको छ । तर, कार्यक्षमता मूल्याङ्कनमा अगाडि भएका धेरै जनाले जिम्मेवारी पाउनु भएन । फिल्डमा कम खट्नेलाई उल्टै बढुवा गरेजस्तो भयो । यसले गर्दा काम गर्ने नेताहरू रुष्ट बनेका छन् ।’

बागमती प्रदेशमा जनप्रतिनिधिहरूलाई पार्टी जिम्मेवारीबाट हटाएर अरु नेताहरूलाई जिम्मेवारी दिइएको छ । नयाँ जिम्मेवारी दिँदा पनि केन्द्रीय समितिको बैठकको स्पिरिटअनुसार नभएको केन्द्रीय सदस्य हिमाल शर्मा बताउँछन् । उनले भने, ‘केन्द्रीय समितिमा काम गर्नेलाई पुरस्कार दिने, काम नगर्नेलाई दण्डित गर्ने भनिएको थियो, तर त्यो भएन । काठमाडौं सधैँ परीक्षणको केन्द्र बनाइयो । स्थायी तरिकाले काठमाडौंका बारेमा सोचिएन । यहीँ काम गर्ने क्षमतावान् साथीहरू हुनुहुन्थ्यो । हटाउनेलाई किन हटाइयो ? ल्याउनेलाई किन ल्याइयो ? केही थाहा छैन ।’

चितवनमा रेणु दाहाल, मकवानपुरमा कुमारी मोक्तान, धादिङमा शालिकराम जम्मकट्टेललगायतको दोहोरो जिम्मेवारी थियो । उनीहरूलाई इन्चार्जबाट हटाइएको छ । तर, प्रदेशका अध्यक्ष सरल सहयात्री पनि दोहोरो जिम्मेवारीमा हुँदा नहटाइएको भन्दै विरोध भइरहेको छ ।

बागमती प्रदेश पार्टी अध्यक्ष सरल सहयात्री भने निर्वाचित नेतृत्वलाई नहटाउने भनिएकाले आफू अध्यक्ष र प्रदेश सांसद पार्टीको नीतिअनुसार रहेको बताउँछन् । उनले भने, ‘अहिलेको इन्चार्जको फेरबदल केही कार्यमूल्याङ्कनका आधारमा भएको छ । केही जनप्रतिनिधिको ठाउँमा अरु साथीहरूलाई जिम्मेवारी दिइएको छ । मेरो हकमा निर्वाचित नेतृत्व भएकाले नहटेको हुँ । जुन पार्टी नीतिअनुसार हो ।’

माओवादीमा सिनियर नेतालाई पालिका र जुनियरलाई जिल्लाको इन्चार्ज बनाएको भनेर पनि असन्तुष्टि बढेको छ । कसलाई के कारणले हटाएको हो, अहिलेसम्म कुनै जानकारी नदिएको भन्दै नेताहरूले असन्तुष्टि जनाएका छन् ।

बिहीबार सार्वजनिक भएको कार्यविभाजन मनपरी तरिकाले गरिएको र पार्टी सक्ने मेसोमा लागेको केन्द्रीय सदस्य दिपेश महर्जनले बताए । उनले भने, ‘सकिने मेलो हो । पार्टीभित्र छलफल छैन । मनलाग्दी गरेको छ । म जिल्ला इन्चार्ज थिएँ । हटाएको छ भन्ने सुनेको छु । तर, हटाउनुको कारण उल्लेख गरिएको छैन । हटाउँदा पार्टी अनुशासनमा नबसेको, पार्टीका काम नगरेको, पार्टीको हितविपरीत काम गरेको हो भने भन्नुपर्‍यो । कांग्रेससँग गठबन्धन तोडेर एमालेसँग गठबन्धन गर्नुको कारण छ नि । हामीलाई हटाउनुको कारण चाहिन्छ । तर, केही भनेको छैन । पहिला जिम्मेवारी दिँदा किन दिएको ? हटाउँदा किन हटाएको, कारण चाहिन्छ ।’

केन्द्रीय सदस्य लेखनाथ दाहाल राजन भन्छन्, ‘परिणाम निकाल्न सक्नेलाई जिम्मेवारी दिनुपर्छ । अहिले पार्टीले निर्णय गरेको छ । त्यो कार्यान्वयनमा जानुपर्छ । तर, आन्दोलनले नयाँ गति लिँदैन । राम्रो परिणाम आउँदैन ।’ उनले निर्वाचित जनप्रतिनिधिहरू कार्यकारी पोस्टमा नबस्ने निर्णय भएको र दोहारो जिम्मेवारीमा नबस्ने भन्ने रहेको बताए । तर, लोकप्रियहरूलाई जिम्मेवारी दिनुपर्ने उनको भनाइ छ । उनले भने, ‘समग्रमा यो निर्णयले पार्टी र सरकारबीच अन्तरसम्बन्ध झन् टाढा हुन्छ, जसका कारण परिणाम आउँदैन । तर, पार्टीको निर्णय मान्छौँ ।’

माओवादीमा जिम्मेवारी पाउने सन्तुष्ट हुने र नपाउनेले विरोध गर्ने चलन पुरानै भएको एक प्रदेश समिति सदस्य बताउँछन् । केही नेताहरू भने नयाँ र पुरानाले जिम्मेवारी पाएकाले सही भएको बताउँछन् ।

माओवादीमा कार्य विभाजन गर्दा मापदण्ड नभएकाले सधैँ विवाद भइरहने एक केन्द्रीय सदस्य बताउँछन् । ती केन्द्रीय सदस्यले भने, ‘माओवादीमा मापदण्ड नै छैन । भएको मापदण्ड पनि नेताको इच्छाअनुसार लागू हुन्छ । कोही दोदोरो जिम्मेवारीमा छन्, कोही छैनन् । काम नगर्नेलाई जिम्मेवारी दिने, काम गर्नेलाई यत्तिकै भूमिकाविहीन बनाउने तरिकाले पार्टी कमजोर हुँदै गएको छ । बागमतीमा पनि केही हदसम्म त्यही भयो ।’

माओवादीमा केही जनप्रतिनिधिहरू भूगोलमा पनि खट्छन् । उनीहरू पार्टी र जनप्रतिनिधिको भूमिका राम्रोसँग निभाइरहेका छन् । उनीहरूको भूमिका खोस्नु गलत भएको एक नेता बताउँछन् । माओवादीमा नेताहरूले पार्टीको काम कसले कति गर्‍यो भन्दा पनि गुटको नजरले बढी हेर्दा समस्या आएको नेताहरू बताउँछन् ।

माओवादीका उपमहासचिव जनार्दन शर्मालाई बागमतीबाट हटाउनु नै दोहोरो भूमिकाको कुरा ल्याएको एक केन्द्रीय सदस्य बताउँछन् । ती केन्द्रीय सदस्यले भने, ‘जनार्दन शर्मालाई भूमिकाविहीन बनाउनका लागि दोहोरो जिम्मेवारीको कुरा ल्याएको हो । यसले पार्टीलाई फाइदा होइन, धेरै नोक्सान हुँदैछ । जनार्दनलाई झन् भूमिका दिनुपर्थ्यो । भूमिकाविहीन बनाइयो । माओवादी गलत दिशामा हिँड्यो ।’

माओवादीमा अहिले पार्टी अध्यक्ष पुष्पकमल दाहाल प्रचण्ड र प्रदेशका अध्यक्षहरूले भने दोहोरो भूमिका निभाउन पाउने भएका छन् । माओवादीको बामगती प्रदेशमा केही नेताहरूलाई न्याय भए पनि धेरैमाथि अन्याय भएको भन्दै रुष्ट बनेका छन् ।

प्रकाशित मिति: शुक्रबार, चैत ९, २०८० १७:०१