सुशीला कार्कीको प्रशंसा गर्दै कानुनमन्त्रीले भने- महिलाले कसरी उडान भर्छन् देखाइदिनुभयो

सुशीला कार्कीको प्रशंसा गर्दै कानुनमन्त्रीले भने- महिलाले कसरी उडान भर्छन् देखाइदिनुभयो

A+ A A-

कानुन न्याय तथा संसदीय मामिलामन्त्री पदम गिरीले अवसर पाउँदा महिलाहरूले पुरुषहरूले भन्दा पनि अब्बल तरिकाले कार्यसम्पादन गर्ने बताएका छन् ।

शुक्रबार महिला न्यायाधीशहरूको प्रथम राष्ट्रिय सम्मेलनलाई सम्बोधन गर्दै मन्त्री गिरीले यो कुरा नेपालकी पहिलो महिला प्रधानन्यायाधीश सुशीला कार्कीले प्रमाणित गरेर देखाइदिएको बताए ।

सम्मेलनमा सहभागी कार्कीलाई सम्बोधन गर्दै मन्त्री गिरीले उनलाई पहिलो महिला प्रधानन्यायाधीशका रूपमा पाउनु आफूहरूका लागि गर्वको विषय भएको पनि बताए । 'सुशील कार्कीज्यू यहीँ हुनुहुन्छ । देशको प्रधानन्यायाधीशको रूपमा हामीले पायौँ । धेरै ठूलो गर्वको विषय हो,' उनले भने ।

कार्की प्रधानन्यायाधीश बन्दै गर्दा उनले गर्ने कामबारे आफूलाई पनि निकै चासो लागेको गिरीको भनाइ छ । तर, कार्कीले आफूले पाएको जिम्मेवारी सफलतापूर्वक सम्पन्न गरेको बताए ।

'उहाँ प्रधानन्यायाधीशको रूपमा रहँदै गर्दाखेरी मेरो बुझाइले उहाँले कस्तो नेतृत्व प्रदान गर्नुहुन्छ होला भनेर बडो गम्भीरताका साथ हेरेको थिएँ । तर, उहाँका प्रत्येक दिनहरू, प्रत्येक पलहरू हेर्दै जाँदा यस्तो माइलेज दिँदै गयो । महिलाहरूले साँच्चै नेतृत्व पाउँदा हरेक क्षेत्रमा पखेटा फिँजाएर उड्न पाउँदा कसरी उड्दा रहेछन्, कति गति लिँदा रहेछन् भन्ने कुरा उहाँबाट देख्न पाइयो,' गिरीले भने ।

मन्त्री गिरीले पितृसत्तात्मक समाजका कारण कार्कीले महाभियोगको सामना गर्नुपरेको बताए । 'तर, पितृसत्तात्मक समाज हो । हाम्रा सोचहरू संकीर्ण छन् । उहाँले नै महाभियोग सामना गर्नुपर्नेजस्तो नमीठो अनुभव हामीले गर्‍यौँ,' उनले भने ।

उनले महिला न्यायाधीशहरूसँग समाजले ठूलो अपेक्षा राखेको बताए । न्यायसम्पादन सदैव सही हुन्छ भन्न नसकिने र त्यसमा सुधारको गुञ्जायस रहने गिरीको भनाइ छ । तर, महिला न्यायाधीशहरूले सम्पादन गरेको न्याय आफूलाई बढी विश्वसनीय लाग्ने उनको भनाइ छ ।

कलेजमा कानुन पढ्ने अवस्थादेखि नै छात्राहरूलाई यसतर्फ आकार्षित गर्न नसकिए एकैपटक महिला न्यायाधीशको संख्या बढाउन नसकिने मन्त्री गिरीको भनाइ छ । कानुन पढ्दादेखि नै छात्राहरूलाई यसतर्फ आकर्षित गर्नुपर्नेमा उनले जोड दिए ।

प्रकाशित मिति: शुक्रबार, चैत ९, २०८० ११:४९