कोशी सरकार परिवर्तनमा एमाले-माओवादीलाई भन्दा कांग्रेस नेतालाई नै हतारो

A+ A A-

कोशी प्रदेश सरकार परिवर्तनको प्रयास नयाँ सत्ता गठबन्धनले गरिसकेको छैन । नयाँ सत्ता गठबन्धन संवैधानिक जटिलताका कारण सरकार फेर्न उपायको खोजीमा देखिन्छ । त्यसका लागि अनौपचारिक प्रयास पनि गरिरहेका छन् ।

संविधानको धारा १६८ को उपधारा ५ अनुसार कांग्रेसका केदार कार्कीको नेतृत्वमा नयाँ सरकार बनेको थियो । २५ असोज २०८० मा बनेको यो सरकारलाई एमालेको समेत समर्थन थियो । तर, अहिले एमाले र माओवादी केन्द्रको नयाँ केन्द्रीय गठबन्धन बनेपछि प्रदेशमा पनि नयाँ सरकारको प्रयास भइरहेको हो ।

कांग्रेस र माओवादी केन्द्रको गठबन्धनमा सरकारका लागि आवश्यक बहुमत संख्या नपुगेका कारण कोशीमा जटिलता आएको थियो । अहिले एमाले र माओवादी मिल्दा मात्रै पनि बहुमत पुग्ने अवस्था रहेको छ । त्यसैले, सत्ता हेरफेरको खेल हुन थालेको हो । तर, नयाँ गठबन्धनले सत्ता परिवर्तनका जति प्रयास गरेको छ । त्योभन्दा धेरै चलखेलचाहिँ कांग्रेसभित्रै भइरहेको देखिन्छ ।

कार्कीलाई संसदीय दलको नेताहुँदै मुख्यमन्त्री हुनबाट रोक्ने अनेक प्रयास भएका थिए । कांग्रेसभित्र शेखर कोइराला समूहका नेता कार्कीलाई रोक्न कोशी प्रदेशमा कांग्रेसभित्रको संस्थापन समूहका नेता उद्धव थापादेखि कृष्ण सिटौलासहितको ठूलो टिम लागेको थियो ।

तर, परिस्थितिले कार्की मुख्यमन्त्री भए पनि उनलाई सहयोग भने पाइरहेका थिएनन् । संसदीय दलको नेता थापाले सार्वजनिक रूपमा सरकारको विरुद्धमा बोल्ने पनि गरेका छन् ।

अहिले थापाले बोल्ने मात्र होइन, अमृत अर्यालचाहिँ सरकार ढाल्ने खेलमै सक्रिय भएका छन् । उनी पहिला पनि मुख्यमन्त्रीको दाबीमा थिए । तर, उनको संसदीय दलमा उपस्थिति नै झिनो देखिएको थियो ।

संसदीय दलको नेताका लागि भएको चुनावी प्रतिस्पर्धामा अर्यालले जम्माजम्मी २ मत पाएका थिए । त्यतिबेला कार्कीलाई पराजित गरेर थापा निर्वाचित भएका थिए ।

संविधानको पछिल्लो धाराको उपयोगबाट हुने मुख्यमन्त्रीको दाबीमा थापाझैँ अर्याल पनि कार्कीलाई मुख्यमन्त्री रोक्न चाहन्थे । पार्टी केन्द्र र गठबन्धनको निर्णयविपरीत कार्कीले एमालेसँग सरकार बनाउन सफल भए । त्यही समयदेखि थापा र अर्याल मुख्यमन्त्री कार्कीको विपक्षमा उभिएका थिए ।

अहिले अर्याल भने खुलेर विरोधमा देखिएका छन् । एमाले अध्यक्ष केपी ओलीसँग भेटघाट गरेर नै कार्कीको विकल्पमा लागेका छन् ।

अर्यालनिकट स्रोतका अनुसार बुधबार साँझ ओलीसँग भेटेर अर्यालले कार्कीको विकल्प खोज्न आग्रह गरेका हुन् । यद्यपि, अर्यालले पनि मुख्यमन्त्रीमा रुचि देखाएका छन् । तर, एमाले र माओवादी मुख्यमन्त्री कांग्रेसलाई दिने पक्षमा भने छैनन् ।

कांग्रेसका नेता अर्याल खुलेर कार्कीको विकल्पमा देखिएका भए पनि थापा पनि सक्रिय भने रहेको कोशीका कांग्रेस नेताहरू बताउँछन् । कार्कीको समन्वयकारी भूमिका कमजोर भएकै कारण लामो समय सरकार विस्तारसमेत हुन सकेको थिएन । अझै पनि सरकारले पूर्णता पाएको छैन ।

प्रकाशित मिति: बिहीबार, चैत ८, २०८० १२:११