नेपालको क्रिकेटबाट आशावादी भएर फर्किँदै आईसीसी अध्यक्ष बार्कले

तस्वीर : सुशील श्रेष्ठ/शिलापत्र

A+ A A-

नेपालको चारदिने भ्रमण सकेर अन्तर्राष्ट्रिय क्रिकेट काउन्सिलका अध्यक्ष ग्रेग बार्कले बिहीबार भारत जाँदैछन् । १८ मार्चमा काठमाडौं आइपुगेका बार्कलेले बुधबार प्रधानमन्त्री पुष्पकमल दाहाल प्रचण्ड, खेलकुदमन्त्री विराजभक्त श्रेष्ठ र राष्ट्रिय खेलकुद परिषद्सँग छलफल गरे । योबीचमा नेपाल क्रिकेट संघ (क्यान) का पदाधिकारीसँग त उनको दैनिक जसो छलफल भयो । त्यति मात्र होइन, उनले कीर्तिपुर पुगेर त्रिवि अन्तर्राष्ट्रिय क्रिकेट मैदानको अवलोकन गरे भने मूलपानी पनि पुगे ।

बार्कले नेपाल आउनुअघि नै नेपालमा बढ्दो क्रिकेट क्रेजबारे उनी जानकार थिए । खास गरी नेपाल टी २० विश्वकपमा छनोट भएको र विश्वकप लिग २ मा नेपालले पाएको सफलताले नेपालको क्रिकेट क्रेज निकैमाथि पुर्‍याएको छ । त्रिवि मैदानमा भएको खेलमा नेपाली दर्शक छाता ओढेर खेल हेरेको तस्वीरले त आईसीसीको ध्यान नेपालतर्फ खिचेको नै थियो ।

यसरी एक क्रिकेट राष्ट्रको रुपमा उदाउँदै गरेको नेपाल आएर आईसीसी अध्यक्ष बार्कलेले नेपालको वातावरण क्रिकेटिङ पाएका छन् । भारत जानुअघि बुधबार पत्रकार सम्मेलनमा उनले भने, ‘मैले राष्ट्रिय खेलकुद परिषद्का सदस्य सचिव, खेलकुदमन्त्री र प्रधानमन्त्रीलाई भेटेँ । नेपाली क्रिकेटको भविष्यलाई लिएर केही सकारात्मक प्रभाव परेको छ ।’

उनले आगामी दिनमा नेपाल र आईसीसी दुवैलाई फाइदा हुनेसमेत बताए । उनले आईसीसीले भौतिक संरचनामा लगानी गर्ने सम्भावना नभए पनि इभेन्टमा जोड दिने भएकाले भौतिक संरचना बन्ने वातावरण पनि बन्ने बताए । उनले अहिले आफूले अवलोकन गरेका दुईवटा क्रिकेट मैदान ठिकठाक रहे पनि अझै धेरै गर्न आवश्यक रहेको बताए । उनले आईसीसीका प्रतियोगिता र द्विपक्षीय खेलहरू आयोजना गर्न भौतिक पूर्वाधार उच्चस्तरीय हुनुपर्ने बताए ।

greg barcley1710944048.jpg

तर, प्रधानमन्त्री प्रचण्डसँगको भेटमा आफू उत्साहित भएको बार्कलेको भनाइ छ । नेपाल सरकारले क्रिकेटमा लगानी गरेको र अझै लगानी गर्ने आफूले बुझेको बताए ।

कार्यक्रममा क्यानका अध्यक्ष चतुरबहादुर चन्दले आईसीसी अध्यक्षको नेपाल भ्रमण ऐतिहासिक रहेको बताए । उनले यो भ्रमणले क्रिकेट प्रेमीमा सकरात्मक सन्देश जाने मात्र नभई नेपालबारे अन्य क्रिकेट मुलुकले पनि बुझ्ने र आईसीसीले पनि बुझ्ने अवसर पाएको बताए ।

प्रकाशित मिति: बुधबार, चैत ७, २०८० १९:५८