सुन काण्डमा पक्राउ परेपछि महराले पार्टीबाट राजीनामा देलान् कि माओवादीले हटाउला ?

सुन काण्डमा पक्राउ परेपछि महराले पार्टीबाट राजीनामा देलान् कि माओवादीले हटाउला ?

A+ A A-

सुन तस्करीको अभियोगमा प्रहरी हिरासतमा पुगेका उपाध्यक्ष कृष्णबहादुर महराको सन्दर्भमा माओवादी केन्द्रको भूमिका चासोको विषय बनेको छ ।

६ चैतको पदाधिकारी बैठकमा महराको विषयमा विभिन्न मत देखिएका थिए । एकथरी नेताहरू विवादमा आई हिरासतमा पुगेका कारण उपाध्यक्षबाट बर्खास्त गर्नुपर्ने मतमा पनि थिए । कतिपयले भने बर्खास्तभन्दा पनि महरालाई राजीनामा गर्न लगाउने तर्क गरेका थिए ।

दोस्रोथरी नेताहरूले भने अदालतले ४ दिन हिरासतमा राख्न दिएका कारण त्यतिञ्जेल कुर्नुपर्ने तर्क गरेका थिए । पदाधिकारी बैठकले वर्खास्त गर्नेभन्दा पनि महराको स्वविवेकमा जिम्मा दिएको छ ।

हिरासतमा रहेका महरालाई उपाध्यक्षबाट राजीनामा दिने वा नदिने महराकै स्वविवेकमा जिम्मा दिएको माओवादी स्रोतको दाबी छ । हिरासतको म्याद सकिएर मुद्दा अदालतमा पुग्यो भने मात्रै पार्टी ठोस निर्णय लिने तयारी गरेको माओवादी स्रोतको दाबी छ ।

अदालतले दिएको समयसम्म कुर्नुपर्ने तर्क गरेका नेताहरू चाहिँ कारबाहीको पक्षमा नभएको बताइएको छ । माओवादी स्रोतका अनुसार अहिले महराको विषयलाई उठाएर पार्टीभित्र चर्को बन्ने पक्षमा भने कोही नेता पनि देखिएका छैनन् ।

पार्टी अध्यक्ष तथा प्रधानमन्त्री पुष्पकमल दाहाल प्रचण्डनिकट मानिने महरा माओवादीभित्र अधिक सूचना हुने नेतामा पर्छन् । पछिल्ला दिनमा माओवादीभित्र बलियो बन्दै गएका नेताहरू पनि महराकै चेला हुन् । त्यसैले, धेरै नेता पनि महराविरुद्ध बोल्न पनि डराउने गरेका छन् ।

तर, महराले जतिबेला नेत्रविक्रम चन्द विप्लवलाई माओवादी केन्द्रमा ल्याउने वार्ताको संयोजन गर्न थाले, त्यसपछि भने उनीविरुद्ध पार्टीभित्र गुटबन्दी सुरु भएको थियो । विप्लवलाई पार्टीभित्र ल्याई भावी महासचिवको रूपमा उभ्याउने महराको चाहना थियो । त्यसमा पार्टीका केही नेताहरू चर्को विरोधमा थिए ।

त्यतिमात्र होइन्, जानी दुश्मनको रूपमा रहेका नेताहरूको नाटकीय एकता देखिएको थियो । त्यसैले, महराविरुद्ध नै अभियान पनि चलेको थियो ।

प्रकाशित मिति: बुधबार, चैत ७, २०८० ०८:०५