महासेठले ओलीलाई फाेन लगाएपछि मधेशमा राेकिएकाे थियाे तीन मन्त्रीकाे शपथ, यादवलाई थप जिम्मेवारी

महासेठले ओलीलाई फाेन लगाएपछि मधेशमा राेकिएकाे थियाे तीन मन्त्रीकाे शपथ, यादवलाई थप जिम्मेवारी

A+ A A-

सोमबार भौतिक पूर्वाधार तथा विकासमन्त्रीको पदभार सम्हालेका नेकपा एमाले संसदीय दलका नेता सरोज यादवलाई थप दुई मन्त्रालयको जिम्मेवारी तोकिएको छ । नयाँ सत्ता गठबन्धन अनुसार चारवटा मन्त्रालय लिएर मधेश प्रदेश सरकारमा सहभागी भएको एमालेका संसदीय दलका नेता यादवलाई भौतिक पूर्वाधार मन्त्रालयका साथै मंगलबार गृह, सञ्चार तथा कानुन मन्त्रालय र स्वास्थ्य तथा जनसंख्या मन्त्रालयको जिम्मेवारी थप गरिएको छ ।

मुख्यमन्त्री सरोजकुमार यादवले मंगलबार मन्त्री यादवलाई थप दुई मन्त्रालयको जिम्मेवारी दिएका हुन् । उनले सोमवार नै कांग्रेसका मन्त्रीहरूलाई पदमुक्तको सिफारिस गरी एमालेका संसदीय दलका नेता यादवलाई क्याबिनेटमा ल्याएर सरकारको पुनर्गठन गरेका थिए ।

यता, मंगलबार नेता यादवसँगै एमालेबाट रजकुमार लेखी गृह, सञ्चार तथा कानुनमन्त्री, शारदा थापा स्वास्थ्य तथा जनसंख्यामन्त्री र शत्रुधनप्रसाद सिंह शिक्षा तथा संस्कृतिमन्त्रीको रूपमा शपथ लिने भनेर पार्टीकै सांसदहरूले सार्वजनिक गरेका थिए । तर, मन्त्रीको नाम छनोटमा पार्टीभित्र विवाद भएपछि अन्तिम समयमा नेता यादवले मात्रै शपथ लिएका लिए ।

एमाले अध्यक्ष केपी शर्मा ओलीले मधेश प्रदेशकाे १२ प्रतिशतभन्दा बढी जनसंख्या रहेको मुस्लिम सामुदायबाट कम्तीमा एक जनालाई मन्त्री बनाउनुपर्ने सुझाव दिएका थिए । स्रोतका अनुसार मुख्यमन्त्री यादवले पनि संविधानअनुसार प्रदेशमा १२ प्रतिशत जनसंख्या रहेको मुस्लिम समुदायबाट कम्तीमा एक जना पनि आफ्नो क्याबिनेटमा मुस्लिम समुदायको राख्नुपर्ने सुझाव दिएका थिए ।

त्यसैगरी, पार्टीका सचिव तथा उपप्रधान तथा भौतिक पूर्वाधारमन्त्री रघुवीर महासेठले पनि दलका नेता यादवले मन्त्री छनोटमा एकलौटी गरेको भन्दै तत्काल रोक्न पार्टी अध्यक्ष ओलीसँग आग्रह गरेका थिए । मधेश आफ्नो प्रदेश रहेको भन्दै मन्त्री छनाैटमा आफूलाई उपेक्षा गर्न मिल्दैन भनेर महासेठले अध्यक्ष ओलीलाई फोन गरेर तत्काल मन्त्री नपठाउन अडान लिएपछि नेता यादवले मात्रै शपथ लिएको एमालेका एक सांसदले बताए ।