प्रचण्ड र रवि गलाएर एमाले फकाउने कांग्रेसको दाउ सफल हाेला ?

सदनमा कांग्रेसकाे अवराेध नियाल्दै गरेका गृहमन्त्री रवि लामिछाने

A+ A A-

प्रमुख प्रतिपक्षी दल नेपाली कांग्रेसका नेताहरू सदनमा होस् या सार्वजनिक कार्यक्रममा, उपप्रधान तथा गृहमन्त्री रवि लामिछानेमाथि खनिएका हुन्छन् । सदनमा त सहकारी ठगी काण्डमा जोडिएका मन्त्री लामिछानेले स्वार्थ बाझिने गरी मन्त्रालयमा रहन नहुने भन्दै राजीनामा माग गरेका छन् ।

गृहमन्त्रीसँग सम्बन्धित कारबाहीहरूलाई सदनमा निषेध गरेको कांग्रेसले प्रधानमन्त्री पुष्पकमल दाहाल प्रचण्डबाट गृहमन्त्रीबारे जवाफ खोजिरहेको छ । जसको जवाफ प्रधानमन्त्रीले सदनमा दिनेछन् । त्यसपछि कांग्रेस आफ्नो बटमलाइनबाट पछि हट्ने नहट्ने थाहा हुनेछ । सोमबारको संसद बैठकमा कांग्रेस महामन्त्री गगन थापाले सुन तस्करी काण्डको छानबिन समिति बनाएर हुनुपर्ने कुरा सही रहेको बताए ।

‘केही समयअगाडि प्रतिपक्षमा हुँदा एमालेले सुन प्रकरणमा शक्तिशाली मानिसहरूलाई लुकाएको छ भनेर जोडदारसँग उठायो, प्रहरीको नियमित छानबिनबाट अनुसन्धान सही ठाउँमा पुग्न सक्दैन भनेर । शक्तिशाली नेताहरूलाई लुकाउन प्रपञ्च गरिएको रहेछ भन्ने तत्कालीन प्रतिपक्षको आशंका सही सावित भयो,’ उनले भनेका थिए, ‘आयोगले प्रतिवेदन बुझाएको छ, हामीले भर्खरै समाचार सुन्यौँ– कृष्णबहादुर महरा पक्राउ पर्नुभएको छ । सरकारलाई धन्यवाद छ । आयोगले किटान गरेको मान्छे छुट्नु हुन्न हाम्रो साथ छ । तलमाथि भयो भने सरकारलाई प्रश्न गर्ने हाम्रो भूमिका छ । तर, यसले एमालेले प्रतिपक्षको ठाउँमा यो कुरा नउठाएको भए आयोग नबन्ने रहेछ । आयोग नबनेको भए सुनकाण्ड फासफुस हुने रहेछ ।’

उपप्रधान तथा गृहमन्त्री लामिछानेविरुद्ध मोर्चाबन्दी गर्नुअघि कांग्रेस प्रधानमन्त्री प्रचण्डविरुद्ध खनिएको थियो । उसले धोका दिएर गठबन्धन भत्काएको आरोप प्रधानमन्त्रीलाई लगाएको थियो । प्रधानमन्त्रीसँगको धोकालाई हिसाबमा राखेर कांग्रेस अघि बढेको छ ।

अहिले कांग्रेस एमालेलाई चिढ्याउने पक्षमा देखिएको छैन । सत्ता सहकार्यको हात एमालेतर्फ कांग्रेसले बढाएको छ । संसदीय अभ्यासमा पहिलो र दोस्रो दलको सरकार बन्न नहुने मान्यता राख्ने कांग्रेस संसदको तेस्रो शक्ति माओवादीले प्रयोग गरेपछि अब एमालेसँग सहकार्य गर्नुपर्छ भन्ने मुडमा पुगेको हो । १० पुस २०७९ मा तत्कालीन गठबन्धन छाडेर एमालेसँग मिलेर माओवादी अध्यक्ष पुष्पकमल दाहाल प्रचण्ड प्रधानमन्त्री भए । राष्ट्रपतिको चुनावमा एमाले छाडेर कांग्रेससँग सहकार्य गर्न प्रधानमन्त्री प्रचण्ड आइपुगे । २० फागुन २०८० मा फेरि एमालेसँग मिल्न पुगे ।

प्रचण्डले संसदका प्रमुख ठूला दुई दललाई सत्ताको नाममा फनफनी घुमाएका छन् । यस्तोमा कांग्रेसले प्रस्ताव गर्न थालेको छ– कांग्रेस र एमाले मिलेर सरकार चलाऔँ, देशलाई स्थिरतामा हिँडाऔँ । कांग्रेस सरकारमा भएको बेलामा प्रमुख प्रतिपक्ष भएको एमालेले यो प्रस्ताव बारम्बार राख्दा बेवास्ता गर्‍यो ।

एमालेसँग सहकार्य गर्न वर्तमान सरकारमा खटपट पर्खिरहेको छ कांग्रेस । त्यसका लागि सहकारी ठगी प्रकरणमा मुछिएको भन्दै उपप्रधान तथा गृहमन्त्री रवि लामिछानेको राजीनामा माग गरेको छ कांग्रेसले । मंगलबार प्रधानमन्त्री प्रचण्डले मन्त्री लामिछानेबारेमा प्रस्टीकरण दिए पनि त्यसले चित्त नबुझेको कांग्रेसले बताएको छ ।

उसले संसदीय समिति बनाएर लामिछानेको संलग्नता छानबिन हुनुपर्ने माग राखेको छ । सो माग पूरा नगरे भोलिबाटै संसद नचल्ने कांग्रेसले चेतावनी दिएको छ । ‘प्रधानमन्त्री प्रचण्डजीले गृहमन्त्री लामिछानेका विषयमा दिएको जवाफ हामीलाई चित्त बुझेको छैन । हामीले संसदीय समिति गठन गर्न माग गरेका छौँ । त्यो माग पूरा नगरे भोलिदेखि संसद चल्दैन, त्यो काम सरकारको हातमा छ,’ कांग्रेस सांसद रामहरि खतिवडाले भने । उनले संसद अघि बढाउने वा नबढाउने भन्ने निर्णय सरकारको हातमा रहेको बताए ।

यता एमाले भने उपप्रधानमन्त्री लामिछानेको बचाउमा उत्रिएको छ । एमाले अध्यक्ष केपी शर्मा ओलीले कांग्रेसले भनेजस्तो संसदीय छानबिन समिति सम्भव नरहेको बताए । ‘सरकारभन्दा बाहिर हुनेबित्तिकै कांग्रेसजस्तो पार्टीले कुनै आवेश, उत्तेजना देखाउने, प्रतिशोधपूर्ण अभिव्यक्ति, क्रियाकलाप गर्ने र संसद अवरुद्ध गर्नेजस्ता क्रियाकलाप गर्नु हुँदैन । हामी कांग्रेसबाट एउटा परिपक्व प्रतिपक्षको भूमिका माग्दछौँ, ओलीले भने, ‘गृहमन्त्री लामिछानेमाथि छानबिन गर्न संसदीय छानबिन समिति कसरी र केका लागि बन्ने ? सम्भव नै छैन ।’

कांग्रेस प्रचार विभाग प्रमुख मीन विश्वकर्मा अहिलेको संसदमा बहुमत पुग्ने अभ्यासमा कांग्रेस र एमालेको सहकार्य बाँकी रहेको बताउँछन् । ‘कांग्रेस–माओवादी सहकार्य गरेर हेर्‍यौँ, एमाले–माओवादी सहकार्य गरेर हेर्‍यौँ । यसमा रास्वपा, राप्रपालगायत दलहरूको पनि कुनै गठबन्धनमा सहयोग रह्यो । अब स्थायित्वका लागि कांग्रेस–एमालेको सहकार्य बाँकी छ । विकास र समृद्धिका लागि त्यो गर्नुपर्छ भन्ने छ,’ उनले शिलापत्रसँग भने ।

एमालेका नेताहरू पनि तत्काल कांंग्रेस–एमालेबीच सहकार्यको सम्भावना नरहेको बताउँछन् । एमालेका सांसद गोकुल बाँस्कोटा सरकार परिवर्तनलाई लिएर भूकम्प आउने कल्पना नगर्न आग्रह गर्छन् । ‘राजनीतिमा विश्वास, सिद्धान्त, नीति नेतृत्व, संगठन मिल्यो भने धेरै कुरा मिल्ला । खास घटनालाई लिएर भूकम्प आउँछ भनेर कल्पना नगरौँ,’ उनले भने ।

प्रकाशित मिति: मंगलबार, चैत ६, २०८० २०:३२