गृहमन्त्री लामिछानेबारे प्रधानमन्त्री प्रचण्डले दिएको जवाफ कांग्रेसलाई बुझेन चित्त

गृहमन्त्री लामिछानेबारे प्रधानमन्त्री प्रचण्डले दिएको जवाफ कांग्रेसलाई बुझेन चित्त

A+ A A-

प्रमुख प्रतिपक्षी दल नेपाली कांग्रेसले उपप्रधानमन्त्री तथा गृहमन्त्री रवि लामिछानेका विषयमा प्रधानमन्त्री पुष्पकमल दाहाल प्रचण्डले दिएको जवाफ चित्तबुझ्दो नभएको बताएको छ ।

मंगलबारको प्रतिनिधिसभा बैठकमा प्रधानमन्त्रीसँग प्रश्नोत्तर कार्यक्रममा प्रधानमन्त्री प्रचण्डले गृहमन्त्री लामिछानेबारे कांग्रेसले उठाएका प्रश्नको जवाफ दिएका थिए । तर, कांग्रेसले पोखराको सूर्य दर्शन सहकारी ठगी प्रकरणमा गृहमन्त्री लामिछाने संलग्न भएको विषयमा प्रधानमन्त्री प्रचण्डले चित्तबुझ्दो जवाफ नदिएको बताएको हो ।

सहकारी ठगी प्रकरणमा गृहमन्त्री लामिछानेविरुद्ध कास्की प्रहरीमा उजुरी दर्ता भएको र छानबिनको दायरामा ल्याउनुपर्ने माग गर्दै कांग्रेसले उनको राजीनामा माग्दै आएको छ । प्रधानमन्त्री प्रचण्डले १३ सांसदले गरेका प्रश्नको जवाफ दिएपछि कांग्रेसले बैठकमा अवरोध गरेको थियो । त्यसपछि सभामुख देवराज घिमिरेले कांग्रेस प्रमुख सचेतक रमेश लेखकलाई बोल्न समय दिएका थिए । प्रमुख सचेतक लेखकले प्रधानमन्त्री प्रचण्डले गृहमन्त्री लामिछानेबारे दिएको जवाफ चित्तबुझ्दो नभएको बताए ।

‘प्रधानमन्त्री प्रचण्डजीले गृहमन्त्री लामिछानेबारे दिएको जवाफ हामीलाई पटक्कै चित्त बुझेको छैन । हामीलाई चिन्ता लागेको कि प्रधानमन्त्रीजीलाई गलत जानकारी दिइएको छ,' उनले भने, 'प्रधानमन्त्री अँध्यारोमा हुनुहुन्छ । अब यसको छानबिन हुन्छ ?’

प्रमुख सचेतक लेखकले गृहमन्त्री लामिछानेविरुद्ध छानबिनका लागि पर्याप्त प्रमाण भएको दाबी गरे । ‘सम्माननीय प्रधानमन्त्री प्रचण्डजीले कुनै प्रमाण छैन भन्नुभएको छ । म भन्छु- कुनै होइन, पर्याप्त प्रमाण छ । यसको छिनोफानो कसले गर्छ ?,’ उनले भने ।

प्रमुख सचेतक लेखकले सहकारी अनियमिततामा गृहमन्त्री लामिछानेको संलग्नताबारे छानबिन गर्न संसदीय समिति गठन गर्न माग गरे । ‘प्रधानमन्त्री प्रमाण छैन भन्दै हुनुहुन्छ । म प्रमाण छ भन्दै छु । यही सदनभित्र छानबिन समिति गठन गरौँ । प्रमाण छ कि छैनऽ त्यो पनि हेरौँ,’ उनले भने ।

कांग्रेसले उठाएका प्रश्नको जवाफ दिँदै प्रधानमन्त्री प्रचण्डले गृहमन्त्री लामिछाने सहकारीको सञ्चालक समिति, लेखा समिति, ऋण समिति, कर्मचारीलगायत कुनै पनि जिम्मेवारी र भूमिकामा नरहेको र अदालतमा विचाराधीन मुद्दामा पनि कहीँकतै नजोडिएको बताएका थिए ।

प्रधानमन्त्री प्रचण्डले सूर्यदर्शन बचत तथा सहकारी संस्थाका एक हजारभन्दा बढी बचतकर्ताले आफ्नो रकम हिनामिना गरेको भन्दै २२ साउन २०८० मा गरेको जाहेरी दरखास्तमा लामिछानेको नाम नकिटिएको पनि दाबी गरेका थिए ।

'मूल उजुरी परेको ६ महिनापछि गएको १६ माघमा कास्की जिल्ला प्रहरी कार्यालयमा पूरक जाहेरी दिइएको थियो, जसमा उहाँसमेत १८ व्यक्ति तथा कम्पनीलाई विपक्षी बनाइएको थियो । मूल उजुरीपछि थप प्रमाणहरू भेटिएमा पूरक जाहेरी दिई अनुसन्धान गर्न सकिने प्रावधान हुन्छ । तर, उक्त जाहेरीमा उहाँ सहकारी हिनामिनामा संलग्न भएको कुनै पनि आधार प्रमाण पेस गरिएको छैन,' प्रधानमन्त्री प्रचण्डले भनेका थिए ।

एकपटक अनुसन्धान सकिएर अदालतमा मुद्दा दायर भइसकेको मुद्दामा आधार प्रमाणबिनाको जाहेरी पुनः दर्ता गर्न आवश्यक नहुने प्रधानमन्त्री प्रचण्डको भनाइ थियो ।

यी पनि:

कांग्रेसले संसदमा फेरि माग्यो गृहमन्त्री लामिछानेको राजीनामा

प्रधानमन्त्री प्रचण्डको प्रस्टीकरण- सहकारी ठगी प्रकरणमा रविको संलग्नता देखिएन, राजनीतीकरण नगरौँ

गृहमन्त्री लामिछानेको बचाउ गर्दै ओलीले भने- कांग्रेस बदनाम गराउने र फसाउने खेलमा लाग्यो

प्रकाशित मिति: मंगलबार, चैत ६, २०८० १४:२८