म अर्थमन्त्री बनेपछि ३० अर्बभन्दा बढी सामाजिक सुरक्षा भत्तामा पठाइसकेको छुः वर्षमान पुन

म अर्थमन्त्री बनेपछि ३० अर्बभन्दा बढी सामाजिक सुरक्षा भत्तामा पठाइसकेको छुः वर्षमान पुन

A+ A A-

अर्थमन्त्री वर्षमान पुनले आफूले अर्थ मन्त्रालयको कार्यभार सम्हालेपछि ३० अर्बभन्दा बढी रकम सामाजिक सुरक्षा भत्तामा पठाइसकेको दाबी गरेका छन् ।

'खर्चको पार्टमा हामीले अलिकति समस्या हुँदाहुँदै पनि म आउनेबित्तिकै झण्डै ३० अर्बभन्दा बढी पेन्सन, सामाजिक सुरक्षा भत्तामा पठाउने निर्णय गरी पठाइसकेका छौँ,' उनले भने ।

आइतबार साँझ सिंहदरबारस्थित मन्त्रालयमा नेपाल आर्थिक पकार संघ (नाफिज) सँगको भेटघाटमा पुनले उपभोक्ताको किन्न सक्ने क्षमता बढाए अर्थतन्त्र चलायमान हुने विश्वासका साथ मन्त्रालय सम्हालेलगत्तै बजारमा रकम पठाउन थालेको बताए ।

‘कहीँ न कहीँ बजारलाई किन्न सक्ने क्षमता अलिकति बढाइदियो भने अर्थतन्त्र अलि चलायमान हुन्छ भन्ने नै लागेको छ,' उनले भने ।

दुग्ध किसानहरूको मनोबल बढाउन दूधको भुक्तानीका लागि आइतबार मात्रै ३० करोड रकम पठाइसकेको बताए । उनले पछिल्लो सार्वजनिक खरिद नियमावलीको संशोधनपछि कम्तीमा ४० अर्बको दायित्व थपिने समस्या हुँदाहुँदै पनि आफूले पुँजीगत खर्च भइसकेका र बिल भुक्तानी गर्नुपर्ने ठाउँमा भुक्तानी गरेरै छोड्ने प्रतिबद्धतासहित काम अघि बढाएको बताए ।

पुँजीगत खर्च गर्ने ठूला मन्त्रालयलाई प्रक्रियागत रूपले फाइल पठाउन आग्रह गरिसकेको र भुक्तानी गर्नुपर्ने रकम दिन अर्थ मन्त्रालय तयार रहेको बताइसकेको पुनले बताए । अर्थमन्त्री पुनले यसबाट निर्माण व्यवसायी, निर्माणसम्बन्धी उत्पादन गर्नेहरूको हातमा रकम पुग्ने र अन्ततः अर्थतन्त्र चलायमान बन्ने विश्वास लिएको बताए ।

मन्त्री पुनले आगामी आर्थिक वर्षको बजेट सरकारले विगतमा गरेको प्रतिबद्धताअनुसार नै निर्माण हुने बताए । उनले अर्थ मन्त्रालय, राष्ट्र बैंक र सरकारको समन्वयात्मक पहलमा बजेट निर्माण गर्ने बताए ।

गत वर्ष नीति कार्यक्रम एउटा पार्टीको, मौद्रिक नीति अर्को पार्टीको, वित्त नीति अर्को पार्टीको भन्नेजस्ता व्यंग्य गरिएको भन्दै यस वर्ष सबै पक्षको सुझावका आधारमा सर्वसम्मत रूपमा देश र जनताका समस्या समेटेर बजेट निर्माण गर्ने पुनको भनाइ छ । बजेटका सिद्धान्त र प्राथमिकतामा छलफल सुरु भइसकेको र नीति कार्यक्रममा पनि छलफल सुरु भएको उनको भनाइ छ ।

नीति कार्यक्रमले राखेको अपेक्षा, बजेटका सिद्धान्तहरू प्राथमिकतामा संसद र सरोकारवाला निकायहरूबाट आएका सुझावलाई बेजटमा व्यवस्था गर्ने प्रतिबद्धता व्यक्त गरे ।

मन्त्री पुनले अहिलेको सरकारका सबैभन्दा ठूलो चनौती युवाहरूमा आएको निराशाको अन्त्य गरी आशा जगाउनु रहेको बताए । सरकारले निजी, सार्वजनिक र सहकारी क्षेत्रलाई सँगसँगै अघि बढाउने बताए । अहिलेको सरकार निजी क्षेत्रलाई अगाडि राखेर र अरुलाई सहयोगी बनाएर लैजाने प्रयत्न रहने उनको भनाइ छ ।

प्रकाशित मिति: सोमबार, चैत ५, २०८० ०९:५३