कर्णालीका ४५ हजार नागकिले लगाए कोरोनाविरुद्धको खोप

A+ A A-

कर्णाली प्रदेशका करिब ४५ हजार नागरिकले लगाए कोरोनाविरुद्धको फाइजर खोप लगाएका छन् । खोप कभरेज कम भएका कर्णालीका पाँच जिल्लामा संचालन भएको कोभिड–१९ विरुद्धको खोप अभियानका क्रममा यहाँका करिब ४५ हजार नागरिकले फाइजर खोप (बुस्टर डोज) लगाएका हुन् ।

कर्णाली प्रदेशमा कोरोना–१९ विरुद्धको खोप कभरेज कम भएका दैलेख, कालीकोट, जुम्ला, सल्यान र सुर्खेतमा खोप अभियान संचालन भएको थियो । जिल्लास्थित स्वास्थ्य सेवा कार्यालयको आयोजना तथा इपिक नेपाल र एफएचआई–३६० को आर्थिक तथा प्राविधिक सहयोगमा संचालन भएको कोरोना–१९ विरुद्धको फाइजर खोप अभियानसमेत सम्पन्न भएको छ । खोप अभियान चैत २ र ३ गते संचालन भएको थियो । खोप अभियान सम्पन्न भएसँगै आइतबार इपिक नेपालको सहयोगमा स्वास्थ्य सेवा निर्देशनालयले आयोजना गरेको कार्यक्रममा खोप कभरेजको अवस्थाबारे जानकारी गराइएको हो ।

इपिक नेपालका प्राविधिक विषेशज्ञ प्रदिप श्रेष्ठका अनुसार खोप कम कभरेज भएका कर्णालीका पाँच जिल्लाका १६ वटा पालिकाका यसअघि खोप लगाउन छुटेका नागरिकले खोप सेवा लिएका हुन् । खोप अभियान संचालनका लागि १६ वटा पालिकामा दुई सय ७८ वटा खोप केन्द्र स्थापना भएका थिए ।

खोप अभियानका लागि ६० हजार डोज प्राप्त भएको थियो । जसमध्ये करिब ४५ हजार नागरिकलाई कोभिड–१९ विरुद्धको खोप लगाईएको तथ्यांक प्राप्त भएको छ । अझै जिल्लागत अन्तिम तथ्यांक प्राप्त हुन भने बाँकी छ । हालसम्मको तथ्यांक अनुसार करिब २० हजार जना बढी पुरुष र २४ हजार बढी महिलाले खोप प्राप्त गरेका छन् ।

खोपको कुनै मात्रा नलिएका तथा बुस्टर डोजबाट छुटेका १२ वर्षमाथिको उमेर समूहका व्यक्तिहरु खोपबाट लाभान्वित भएका छन् । सुर्खेतको वीरेन्द्रनगर र पञ्चपुरी नगरपालिका तथा चौकुने र चिङगाड गाउँपालिकामा खोप अभियान संचालन भएको थियो ।

यस्तै कालीकोटको तिलागुफा, रास्कोट र खाडाचक्र नगरपालिका, जुम्लाको तातोपानी र गुठिचौर गाउँपालिका, सल्यानको सिद्धकुमाख, कालिमाटी र सारदा नगरपालिका र दैलेखको नारायण र चामुण्डाविन्द्रसैनी नगरपालिका तथा भगवतीमाई र गुराँस गाउँपालिकामा खोप अभियान संचालन भएको थियो ।

प्राविधिक विषेशज्ञ प्रदिप श्रेष्ठका अनुसार आगामी वैशाख महिनामा पनि कर्णाली फेरि खोप अभियान संचालन गर्ने तयारी छ । ‘योपटक पनि खोप लगाउन छुटेकाहरु वैशाखमा चल्ने खोप अभियानबाट लाभान्वित हुनसक्नेछन्’, उनले भने, ‘पहिलेको तुलनामा हाल नागरिकहरु खोप लगाउन उत्साहित देखिए । आगामी वैशाखमा संचालन हुने अभियान खोप कभरेज कम भएका कर्णाली, सुदूरपश्चिम र मधेश प्रदेशमा केन्द्रित हुनेछ ।’

कार्यक्रममा बोल्दै जनस्वाथ्य सेवा कार्यालय सुर्खेतका जनस्वास्थ्य निरीक्षक घनश्याम बुढाले अभियानको क्रममा नागरिकहरु खोप लगाउन उत्साहित देखिए पनि सोहीअनुसार खोप अभाव भउको उल्लेख गरे । आगामी दिनमा पनि खोप अभियान सञ्चालन गर्न जनप्रतिनिधि तथा शिक्षा क्षेत्रको भुमिका मुख्य रहने भन्दै थप अभियान संचालन गर्न आवश्यक रहेको उनले बताए ।

स्वास्थ्य सेवा निर्देशनालयका निर्देशक डा. रबिन खड्काले खोप कभरेज बढाउन कोभिड–१९ खोप अभियान संचालन पूर्व सरोकारवालासँग आवश्यक समन्वय, सहकार्य बढाउनुपर्ने बताए । हाल खपत भएको खोपअनुसार आगामी दिनमा पनि खोप कभरेज कम भएका जिल्ला र पालिकामा थप अभियान संचालन गर्नुपर्ने उनको भनाइ छ ।

खोप अभियान संचालन पूर्व अभियानलाई प्रभावकारी बनाउन स्थानीय खोप समन्वय समिति र स्वास्थ्यकर्मीसँग छलफल गरिएको थियो । यस्तै सबै पालिका अन्तर्गत रहेका सबै स्वास्थ्य संस्थामा कार्यरत स्वास्थ्यकर्मीको सहभागितामा खोप समन्वय समितिको बैठक र खोप अभियानमा सहभागि हुने स्वास्थ्यकर्मीलाई समेत अभिमुखीकरण गरिएको थियो ।

प्रकाशित मिति: आइतबार, चैत ४, २०८० १७:४४