चुनावी नारामा सीमित धनगढी-स्याउले सडक बन्ने सम्भावना

A+ A A-

धनगढी–स्याउले सडकखण्ड सधैं चुनावका नारामा पर्छ तर विकासको प्राथमिकतामा पर्दैन । पटकपटकका चुनावी नारा र नेताहरूका आश्वासनले थलिएको यो सडकखण्डको स्तरोन्नतीका लागि यसपटक भने तीनै तहका जनप्रतिनिधिले प्रतिबद्धता जनाएका छन् ।

शनिवार स्थानीय तह, प्रदेशका मन्त्री र प्रतिनिधि सभाका सांसदसहितको टोलीले उक्त सडकको अनुगमन गरेका छन् । यससँगै सुदूरपश्चिम प्रदेशको समृद्धिसँग जोडिएको धनगढी–दिपायल, चैनपुर, ताक्लाकोट द्रुतमार्ग अन्तर्गतको १० किलोमिटर लामो धनगढी–स्याउले खण्ड मर्मत गर्न धेरै समयदेखि आवाज उठाइरहेका स्थानीयको माग सम्बोधन हुने सम्भावना देखिएको छ ।

गर्मीमा धुलाम्य र वर्षामा हिलाम्य हुने सडकका कारण आसपासका नागरिक र सो सडक भएर यात्रा गर्ने यात्रुले निकै सास्ती खेप्नुपरेको छ । लामो समय आश्वासन र भाषणमा सिमित भएको यो सडक मर्मतको माग अब भने सम्बोधन हुने देखिएको हो ।

सुदूरपश्चिमको विकास र सम्वृद्धिका लागी धनगढी–दिपायल, चैनपुर, ताक्लाकोट द्रुत मार्गको नामबाट यस पटक संघीय सरकारले रातो किताबमै योजना निकालेको छ । सुदूरपश्चिमका ४ जिल्ला जोड्ने यो सडकले प्रदेशको आर्थिक विकासमा टेवा पुग्ने अपेक्षा गरिएको छ ।

सडक डिभिजन कार्यालय कञ्चनपुरका प्रमुख अर्जुन कुमार बमका अनुसार धनगढी–स्याउले १० किलोमिटर सडक कालोपत्रे गर्नको लागि तिहार लगत्तै एस्टिमेट तयार पारिने छ । सडक विभागले स्वकृती दिएपछि कात्तिकभित्रै सडक कालोपत्रेका लागि टेन्डर आह्वान गरिने पनि उनले बताए ।

धनगढी–स्याउले सडक खण्डका स्थानीय तथा यात्रुको समस्यालाई ध्यानमा राखी पहिलो चरणमै सो सडक कालोपत्रे गर्ने तयारी भइरहेको उनले बताए । सडक कालोपत्रे गर्नका लागी कति लेनको बनाउने भन्ने विषयमा जनप्रतिनिधीहरुले विज्ञ र स्थानीयसँग छलफल थालेका छन् । स्थानीयसँग अनुगमनकै क्रममा जनप्रतिनिधीले छलफल गरेका थिए ।

जनप्रतिनिधी सकेसम्म २ लेनको सडक बनाउने पक्षमा देखिएका छन् । धनगढी उपमहानगरपालिकाकी उपमेयर सुशीला मिश्र भट्टले सडक निर्माणमा सहजता दिलाउन उपमहानगर तयार रहेको बताइन् । प्रतिनिधि सभा सदस्य नारदमुनि राना, प्रदेश मन्त्री, स्थानीय तहका जनप्रतिनिधीसहित आयोजना प्रमुखको टोलीले सडक अनुगमन तथा छलफल गरेको थियो ।

प्रतिनिधि सभाका सदस्य नारदमुनि रानाले प्रदेश सरकारले वर्षभरको सबै बजेट खर्चिंदा पनि सडक नबन्ने अवस्था भएकाले संघीय सरकारले योजना खोसेको बताए । संघीय सरकार र मन्त्रीसँग पटकपटकको आग्रहपछि सो सडकखण्डको मर्मत रातो किताबमै उल्लेख भएको पनि उनले थपे ।