माओवादी बैठकमा प्रचण्डको ब्रिफिङः नयाँ सहकार्य गर्ने भनेपछि ४८ घण्टामा तयारी भयो

माओवादी बैठकमा प्रचण्डको ब्रिफिङः नयाँ सहकार्य गर्ने भनेपछि ४८ घण्टामा तयारी भयो

A+ A A-

माओवादी केन्द्रको स्थायी समिति बैठकमा प्रधानमन्त्री तथा पार्टी अध्यक्ष पुष्पकमल दाहाल प्रचण्डले कांग्रेसले कोशीमा पटकपटक धोका दिएको बताएका छन् । नेपाली कांग्रेसलाई अब विश्वास गर्न नसकिने आवाज सबै तर्फबाट आएपछि एमालेसँग सहकार्य गर्न पुगेकाे प्रचण्डको भनाइ रहेको एक स्थायी समिति सदस्यले बताए ।

प्रचण्डको भनाइ भन्दै ती स्थायी समिति सदस्यले भने, ‘हाम्रो राष्ट्रियसभाको उम्मेदवार हराउने कार्य भयो । कोशीमा माओवादीको मुख्यमन्त्री नबन्ने अवस्था आयो । एमालेले पनि यहि समयमा सहकार्य गरेर जाने प्रस्ताव गरेपछि नयाँ सहकार्यको लागि तयार भएको हौँ । उसले पनि केही गल्ती भएको रियलाइजेसन गरेका पायौँ ।’

अर्थमन्त्रीसँग सबैभन्दा बढी विवाद हुँदा सरकारमा समस्या आएको पनि प्रचण्डले बैठकमा बताएका छन् । ‘अर्थमन्त्रीले उदारवादबाहेक अर्को विकल्प देख्नुभएन । हामीले समाजवादी बाटोमा जानुपर्छ भन्यौँ । जनतामा नयाँ कार्यक्रम लैजाउँ भन्दा मान्नुभएन । केही पनि सकिँदैन मात्र भन्नुभयो । साह्रै अप्ठ्यारोमा पारेकाले काम गर्न सकिए,’ प्रचण्डले बैठकमा भनेको स्थायी समिति सदस्यले बताए ।

केही समय यही गठबन्धन टिकाउन सकिन्छ कि भनेर तीन महिनादेखि पटकपटक पहल गरे तर त्यो पनि भएन । तर अर्कोतर्फ पनि अवस्था परिपक्क नहुँदा राजीनामा दिएर निस्कनुपर्ने अवस्था पनि आएको प्रचण्डले बैठकमा बताएका छन् ।

‘माओवादी कांग्रेसका मन्त्री फेरेर पनि केहि नयाँ गरौ भनेर सोचियो तर सकिएन । परराष्ट्रमन्त्रीले पनि विदेशीले भनेको मान्ने र हामीलाई दबाब दिने काम मात्र गर्नु भयो,’ प्रचण्डको भनाइ थियो ।

प्रचण्डले बैठका गठबन्धनमा बस्दा भित्रबाट उकुसमुकुस भएपछि मन्त्रिपरिषद् फेरबदल गर्न खोजेको ब्रिफिङ गरेका छन् । उनको ब्रिफिङ थियो, ‘सरकारमा उकुसमुकुस भएर बस्नुपरेको थियो । अर्को बाटो तयार पनि भएको थिएन । राजीनामा दिएर हिँड्न पनि नहुने अवस्था थियो । एक विकल्प त थियो राजीनामाको । तर एमाले पनि त्यही समयमा प्रस्ताव लिएर आयो ।’

'टीआरसीको विषयमा एमालेसँग छलफल भइरहेको थियो । उहाँहरूले पनि पहिलाको गल्ती रियलाइजेसन गरेको पाएँ । यहिँबाट पनि कोर्स करेक्सन भएन भने पुग्ने ठाउँ भनेको पश्चिम बंगाल हो भन्ने निस्कर्षमा पुग्यौँ र सहकार्य सुरु गरेका हाैँ ।'

एमाले सिध्याउदा माओवादी पनि सकिने माओवादी सिध्याउदा एमाले सकिने अवस्था अगाडि देखिन थालेपछि दुवै पार्टी मिलेको उनले दाबी गरेका छन् ।

बैठकमा प्रचण्डले भनेका थिए, ‘कांग्रेससँग गठबन्धन गर्दा निर्वाचनमा भोट हामीतर्फ ट्रान्सफर भएन । जसरी वामपन्थीबीच भोट ट्रान्सफर भएका थिए ।’ कांग्रेससँगको गठबन्धन देशैभरि पनि उत्साहजनक नभएको बताएका छन् ।

'हामीले भोट हालेर ठूलो पार्टी बनाएको कांग्रेस न गठबन्धन गर्ने न उल्टै धारे हात लाउने गर्न थाल्यो । यसरी किन गठबन्धन गरेर बस्नु भनेर बाटो बदेले'को उनको तर्क थियो । समाजवादको आधार तयार पार्न पनि वामपन्थी एक ठाउँमा भएकाे र राष्ट्रियसभाको अध्यक्ष लिनुपर्ने पनि भएकाले वामपन्थी सहकार्य भएको उनले बताएका छन् । उनले भनेका छन्, ‘अझै बजेट फेल गर्न सकिन्छ कि भनेर कांग्रेस चलखेल गर्न थालेको छ । अब बजेट फेल गर्छु भन्ने नसोचे हुन्छ । त्यो सम्भव छैन ।’

प्रकाशित मिति: शुक्रबार, चैत २, २०८० २२:००