फुकुसिमा प्लान्टमा भूकम्पपछि विषालु पानी छाड्न बन्द

A+ A A-

जापानले समुद्रमा विषालु पानी छाड्न बन्द गरेको छ । शुक्रबार बिहानै फुकुसिमा परमाणु प्लान्ट क्षेत्रमा ५.८ रेक्टरको भूकम्प गएपछि पानी निष्कासन बन्द गरिएको हो ।

सन् २०११ मा जापानमा आएको शक्तिशाली भूकम्पपछि फुकुसिमा परमाणु प्लान्टमा क्षति पुगेको थियो । जापानले खराब भएको फुकुसिमा न्युक्लियर प्लान्टमा रहेको १३२ करोड लिटर रेडियोएक्टिभ पानी २४ अगस्ट २०२३ देखि प्रशान्त महासागरमा छाड्न सुरु गरेको थियो ।

विषाक्त पानी महासागरमा छाडेकोमा रुष्ट चीनले जापानबाट समुद्री खानेकुरा आयातमा रोक लगाएको थियो । प्रशान्त महासागरको तटीय क्षेत्रमा रहेका देशले समेत जापानको कदमको विरोध गरेका थिए । पानी प्रशान्त महासागरमा मिसाउने कार्यको रेखदेख गरिरहेको टोकियो इलेक्ट्रिक पावर प्लान्टले भूकम्पबाट पानी छाड्ने प्रक्रियामा असर नभएको तर सुरक्षालाई मध्यनजर गर्दै पानी छाड्न बन्द गरेको जनाएकोे छ ।

जापानी विदेश मन्त्रालयले पानी महासागरमा मिसाउनुअघि शुद्धीकरण गरेको जनाएको छ । तर, रिपोर्ट अनुसार शुद्धीकरणपछि पनि पानीमा घातक ट्राइटियमका कण छन् । रेडियो एक्टिभ पदार्थ ट्राइटियम पानीबाट अलग गर्न अत्यन्तै कठिन हुन्छ । यसबाट क्यान्सरजस्तो घातक रोग लाग्ने डरसमेत हुन्छ ।

चीन, दक्षिण कोरिया र अस्ट्रेलियासहितका देशले फुकुसिमाको पानी प्रशान्त महासागरमा फाल्ने निर्णयको विरोध गरेका थिए । सन् १९४० को दशकमा दक्षिण प्रशान्त महासागरमा अमेरिका, ब्रिटेन र फ्रान्सजस्ता देशले एकपछि अर्को परमाणु परीक्षण गरेका थिए । जसको परिणाम शुक्रबार पनि मार्सल आइल्यान्डमा रहने मानिसहरूले भोगिरहेका छन् ।

यद्यपि, परमाणु परीक्षण र परमाणु रिएक्टर्स चिस्याउन प्रयोग गरिएको पानी महासागरमा छाड्नु फरक विषय हुन् ।जापानको उत्तरपूर्वी तट होन्सुमा ९.१ रेक्टरस्केलको भूकम्पपछि सुनामी आएको थियो । १४ मिटर अग्लो सुनामीको पानी प्लान्टमा मिसिँदा ठूलो क्षति पुगेको थियो ।

राजधानी टोकियोदेखि २२० किलोमिटर टाढा रहेको यो प्लान्ट सन् १९७१ मा बनेको थियो । जसमा ८ रेक्टरसम्मको भूकम्प धान्ने क्षमता थियो । यो परमाणु प्लान्टबाट जापानले ४.६९ गिगावाट विद्युत् उत्पादन गर्दै आएको थियो । भूकम्प र सुनामीपछि २० किलोमिटर क्षेत्रको भूमिगत पानीमा रेडिएसन फैलिएको थियो । जसबाट पानीका साथै त्यहाँ उत्पादन भएका सागसब्जीमा समेत खतरनाक रसायन पाइएको थियो ।

प्रकाशित मिति: शुक्रबार, चैत २, २०८० १६:५८