रमजानमा खाना लिन पुगेका माथि इजरायली हमला, २९ प्यालेस्टाइनीको मृत्यु

A+ A A-

प्यालेस्टाइनको गाजा क्षेत्रमा रहेको अल–नुसिरत क्याम्पनजिकै सहायता वितरण केन्द्रमा इजरायलले गरेको हवाई हमलामा ८ जनाको मृत्यु भएको छ ।

उत्तरी गाजामा रहेको अर्को सहायता केन्द्रमा खाना लिन पुगेका प्यालेस्टाइनीमाथि इजरायली सेनाले गोली चलाउँदा २१ जनाले ज्यान गुमाएका छन् । दुवै हमलामा कुल २९ जना प्यालेस्टाइनी सर्वसाधारण मारिएका छन् ।

यता १९ नोभेम्बरमा हुती विद्रोहीले कार्गो सिप ग्यालेक्सी लिडरलाई अपहरण गरेका थिए, जसमा २५ जना चालक दलका सदस्यहरूलाई बन्धक बनाइएको छ ।

गाजामाथि इजरायली हमलाको विरोधमा रेड सी क्षेत्रमा पानीजहाजलाई निशाना बनाइरहेको हुथीले अब २५ जना क्रु मेम्बर्सको ज्यान हमासको हातमा भएको बताएको छ ।

पानीजहाज अपहरणको ११६ दिनपछि पनि १७ जना फिलिपिन्स, २ जना बुल्गेरिया, ३ जना युक्रेन, २ जना मेक्सिको र एक जना रोमानियाका गरी २५ जना चालक दलका सदस्यबारे कुनै जानकारी छैन ।

टर्कीबाट भारत आउँदै गरेको यो पानीजहाजबाट पक्राउ गरिएका उनीहरू इजरायलले गाजामाथिको हमला नरोकेसम्म रिहा हुने सम्भावना कम छ ।

इजरायली डिफेन्स फोर्सेस (आईडीएफ) का अनुसार ब्रिटिस कम्पनीका नाममा दर्ता रहेको जहाजमा बहमासको झण्डा लगाइएको थियो । जुन पानी जहाजमा इजरायली व्यापारी अब्राहम उंगरको पनि आंशिक लगानी थियो । हुथी विद्रोहीले कब्जा गरेको पानीजहाज छाड्न अस्वीकार गरेका छन् । १४ मार्चमा हुथीका प्रवक्ता अस्र अल–दीन आमेरले गाजामाथिको हमला नरोकिएसम्म उनीहरु रिहा नहुने बताउँदै उनीहरूको रिहाइ हमासले नै तय गर्ने जवाफ दिएको छ ।

गत ७ अक्टोबरमा हमासको अल कासिम ब्रिगेडले इजरायलमाथि हमला गरेपछि इजरायलले गाजामाथि निरन्तर हवाई र जमिनबाट कारबाही चलाइरहेको छ । जसमा हालसम्म ३१ हजारभन्दा बढीको मृत्यु भइसकेको छ ।

पछिल्ला दिनमा इजरायलले गाजामा हमासभन्दा पनि सर्वसाधारणलाई बढी निशाना बनाइरहेको छ । उता हमासको समर्थनमा हुथीले चलाएको रेडी सीको कारबाहीले यो क्षेत्र झनै जोखिमपूर्ण बन्दै गएको छ ।

एकातिर इजरायलले हमासको अन्त्य गर्ने भन्दै गाजामा सर्वसाधारणमाथि बम बर्साउने र अर्कोतिर हमास र हुथीजस्ता विद्रोही संगठनको मिलनले मध्यपूर्व दीर्घकालीन हिंसामा फस्ने चिन्ता बढेको छ ।

प्रकाशित मिति: शुक्रबार, चैत २, २०८० १६:०८