कांग्रेसले माग्यो गृहमन्त्री रवि लामिछानेको राजीनामा

A+ A A-

प्रमुख प्रतिपक्षी दल नेपाली कांग्रेसले उपप्रधानमन्त्री तथा गृहमन्त्री रवि लामिछानेको राजीनामा मागेको छ ।

शुक्रबार बसेको प्रतिनिधिसभाको बैठकमा नेपाली कांग्रेसका सांसद प्रदीप पौडेलले गृहमन्त्री लामिछानेको राजीनामा मागेका हुन् । लामिछानेले नैतिकताका आधारमा पनि पदमा बसिरहन नमिल्ने उनको भनाइ छ ।

आफूमाथि प्रश्न हुँदाहुँदै लामिछानेले गृहमन्त्री बन्न नमिल्ने र प्रधानमन्त्रीले उनलाई गृहमन्त्री बनाउन नमिल्ने पौडेलको जिकिर छ । 'सहकारी ठगीसम्बन्धी अनुसन्धान भइरहेको व्यक्ति सरकारको मुख्य प्रमुख हुँदा पीडितहरूको काम कसरी पूरा हुन्छ ?' पौडेलले प्रश्न गरे ।

संसदमा प्रदीप पौडेलले के भने ?

अहिलेको गृहमन्त्रीले विगतमा प्रश्न गर्ने पेशा अपनाउनुभएको थियो । उहाँ प्रश्न गर्ने पेसाबाट आउनुभएको हो । राजनीतिमा प्रश्न गर्न मात्रै पाउनुपर्छ । आफ्नाविरुद्ध प्रश्नहरू उठाउन मिल्दैन । प्रश्नहरूलाई निषेध गर्न पाउनुपर्छ भन्न मिल्दैन ।

आफूमाथि प्रश्न बोकेर उहाँ गृहमन्त्री हुनुहुँदैन थियो । प्रधानमन्त्रीले प्रश्न भएको मानिसलाई गृहमन्त्री बनाउनु हुँदैन थियो । आज ३१ हजार सहकारीमा ७३ लाख वचतकर्ता छन् । त्यो वचतकर्ताको माग छ, सहकारी सञ्चालकको सम्पत्तिबाट हाम्रो बचत फिर्ता दिनुपर्छ भन्ने उनीहरूको माग छ । त्यस्तै, अनुसन्धानको घेराभित्र रहेको व्यक्ति सरकारको मुख्य पदमा रहँदा सहकारी पीडितहरूको माग कसरी पूरा हुन्छ ?

म प्रश्न गर्न चाहन्छु । पीडितहरूको विश्वास जित्न नसकेको सरकारले वित्तीय संकटलाई कसरी समाधान गर्न सक्छ ? पीडितहरूले आन्दोलनबाट सिर्जना गर्ने अस्तव्यस्ततालाई उसले कसरी थेग्न सक्छ ? म आग्रह गर्न चाहन्छु– मेरो मित्र माननीय गृहमन्त्रीज्यूलाई उच्च नैतिकताका आधारमा राजीनामा दिएर उदाहरण प्रस्तुत गर्नुस् ।

प्रकाशित मिति: शुक्रबार, चैत २, २०८० ११:५४