मधेशमा एमालेले मुख्यमन्त्रीकाे कुर्सी ताकेपछि झस्किएकाे जसपा कांग्रेससँग लचक

मधेशमा एमालेले मुख्यमन्त्रीकाे कुर्सी ताकेपछि झस्किएकाे जसपा कांग्रेससँग लचक

A+ A A-

मधेश प्रदेशका मुख्यमन्त्री सरोजकुमार यादवले केन्द्रमा बनेको नयाँ सत्ता गठबन्धनअनुसार मधेश प्रदेश सरकार पुनर्गठन गर्ने भएका छन् । केन्द्रमा नयाँ सत्ता गठबन्धनको सरकार बने पनि मधेश प्रदेशमा अहिलेसम्म पुरानै गठबन्धनको सरकार रहेको छ ।

जसपाका अध्यक्ष उपेन्द्र यादव उपप्रधान तथा स्वास्थ्यमन्त्रीको रूपमा प्रचण्ड नेतृत्वको सरकारको सहभागी छन् । साेही पार्टीबाट मुख्यमन्त्री बनेका यादवले सुरुमा मधेश प्रदेशका कांग्रेसका मन्त्रीहरूलाई राजीनामा दिएर सहयोग गर्न आग्रह गरेका थिए । तर, कांग्रेसका मन्त्रीहरूले राजीनामा नदिने बरु बर्खास्त गर्ने अधिकार मुख्यमन्त्रीसँग सुरक्षित रहेकाे जवाफ दिएका थिए ।

त्यसपछि कांग्रेसका मन्त्रीलाई बर्खास्त गर्नेबारे उनले एमालेका नेताहरूसँग छलफल गर्ने मनसाय बनाएका थिए । तर एमालेका नेताहरूले उल्टै मुख्यमन्त्रीमा दाबी गरेपछि यादव झस्केका छन् । एमालेले मुख्यमन्त्रीमा दाबी गर्ने देखेपछि यादव कांग्रेससँग मिलेर सरकार टिकाउने मनसायमा पुगेका हुन् ।

मुख्यमन्त्री यादवले तत्काल कांग्रेसका मन्त्रीहरूलाई बर्खास्त नगर्ने मनसाय बनाएकाे जसपाका एक सांसदले बताए ।उनले नयाँ प्रदेश प्रमुखले पदवाहाली गरेपछि सरकारमा केही हेरफेर हुने बताए ।

मुख्यमन्त्री यादवले पनि कांग्रेसका मन्त्रीलाई बर्खास्त नगर्ने बताए । 'नेपाली कांग्रेस पनि संघीयता पक्षधर पार्टी हो, उनले भने,‘ कांग्रेसका मन्त्रीहरूलाई बर्खास्त गर्दैनौँ । एकैचोटी नयाँ गठबन्धन अनुसार सरकार पुनर्गठन गर्छौं ।’

नयाँ गठबन्धनमा एमालेका २४, जसपाको १९, माओवादी केन्द्रका ९, एकीकृत संघीय समाजवादीका ६, नागरिक उन्मुक्ति पार्टीको १ गरी ५९ प्रदेश सांसद छन् । मधेश प्रदेशमा कुल १०७ सांसद रहेकोमा सरकारको लागि ५४ मत आवश्यक हुन्छ ।

अर्काेतर्फ कांग्रेसका २३, जनमतका १३, लोसपाको ९ र राप्रपाको १ गरी ४६ सांसद छन् । त्यसैगरी, सभामा १ स्वतन्त्र सांसद र रिजवान अन्सारी नेतृत्वको नेपाल संघीय समाजवादी पार्टीका १ सांसद रहेको छ ।

प्रकाशित मिति: बिहीबार, चैत १, २०८० २०:१८