एमालेले भन्यो– बजेटका सिद्धान्त र प्राथमिकतालाई पुनः लेखन गर्नुपर्छ

A+ A A-

नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेलले आगामी आर्थिक वर्षको बजेटका सिद्धान्त र प्राथमिकतालाई पुनःलेखन गर्न सुझाव दिएका छन् । बिहीबार प्रतिनिधिसभा बैठकको बजेटका प्राथमिकता र सिद्धान्तमाथि छलफलमा भाग लिँदै उनले अर्थमन्त्री वर्षमान पुनलाई यस्तो सुझाव दिएका हुन् ।

उनले अर्थमन्त्री पुनलाई निवर्तमान अर्थमन्त्री डा. प्रकाशशरण महतले पेस गरेको प्रस्तावलाई संसदमा भएको छलफल र सांसदहरूको धारणाका आधारमा पूर्ण रूपमा परिमाजर्न गर्न आग्रह गरे । उनले अघिल्ला अर्थमन्त्रीले संसदमा प्रस्तुत गरेको बजेटका सिद्धान्त र प्राथमिकतालाई कानुनी र व्यावहारिक समस्याले संसदमा छलफल गर्नुपरेको टिप्पणी गरे । उनले बजेटका सिद्धान्त र प्राथमिकता प्रस्तुत गर्ने अर्थमन्त्री नभएपछि वर्तमान अर्थमन्त्रीले पुन: बजेटका सिद्धान्त र प्राथमिकता प्रस्तुत गर्न पाउनुपर्ने आशय व्यक्त गरे ।

पूर्वअर्थमन्त्री पौडेलले बजेटका सिद्धान्त र प्राथमिकतालाई देशका समस्या समाधान हुने गरी परिवर्तन गर्न अर्थमन्त्रीलाई सुझाव दिए । उनले अघिल्ला अर्थमन्त्री महतले पेस गरेको आगामी आर्थिक वर्षको बजेटका सिद्धान्त र प्राथमिकता ‘शब्द र वाक्यको भिड मात्रै’ भएको धारणा राखे । उनले बजेटका सिद्धान्त र प्राथमिकता परिमार्जन नगरेसम्म समर्थन गर्न लायक नभएको जिकिर गरे ।

पौडेलले यो सिद्धान्त र प्राथमिकताले वर्तमान अर्थतन्त्रका कुनै समस्या समाधान गर्न नसक्ने दाबी गरे । उनले बजेटका सिद्धान्त र प्राथमिकतामा सिद्धान्त र प्राथमिकता दुवै नभेटिएको भन्दै पेपर पोलुसन गर्ने काम मात्रै भएको धारणा राखे । उनले यो सिद्धान्त र प्राथमिकताको प्रस्तावमा छलफलले संसदको समयलाई अपव्यय हुने बताए । उनले यो बजेटका सिद्धान्त र प्राथमिकताले अर्थतन्त्रका कुनै पनि विषयलाई निर्देशित नगर्ने ठोकुवा गरे ।

प्रकाशित मिति: बिहीबार, चैत १, २०८० १६:३९